Union Budget 2026: జీఎస్టీ మినహాయింపులు.. ఆటో రంగానికి బూస్ట్..

Union Budget 2026: కేంద్ర బడ్జెట్ 2026 సమీపిస్తున్న వేళ, భారత ఆటోమొబైల్ పరిశ్రమ ప్రభుత్వం నుంచి భారీ ఆశలు పెట్టుకుంది. గత ఏడాది అమలులోకి వచ్చిన GST 2.0 సంస్కరణలు ఆటో రంగానికి గణనీయమైన ఊతమిచ్చిన నేపథ్యంలో, ఈసారి బడ్జెట్‌లో మరింత స్థిరమైన విధానాలు, పన్ను ఉపశమనాలు, ఎలక్ట్రిక్ వాహనాలకు (EV) ప్రోత్సాహకాలు అందిస్తారని పరిశ్రమ వర్గాలు ఆశిస్తున్నాయి. ఆర్థిక మంత్రి నిర్మలా సీతారామన్ ఫిబ్రవరి 1న తన తొమ్మిదవ బడ్జెట్‌ను పార్లమెంట్‌లో ప్రవేశపెట్టనున్నారు. బడ్జెట్‌కు ముందు దేశంలోని అన్ని రంగాలు తమ డిమాండ్లను ప్రభుత్వానికి తెలియజేస్తుండగా, ఆటో పరిశ్రమ కూడా కీలక సూచనలతో ముందుకొచ్చింది.

గత జీఎస్టీ సంస్కరణల ప్రభావం
గత ఏడాది సెప్టెంబర్‌లో అమలైన GST కోతలతో వాహన ధరలు తగ్గాయి. ఫలితంగా వాహన విక్రయాలు గణనీయంగా పెరిగాయి. ముఖ్యంగా ICE (పెట్రోల్, డీజిల్) వాహనాల విక్రయాల్లో స్పష్టమైన వృద్ధి కనిపించింది. ఈ మార్పులు ఆటోమేకర్లకు ఊరటనిచ్చినప్పటికీ, రంగం పూర్తి స్థాయిలో కోలుకోవాలంటే తాజా బడ్జెట్‌లో మరింత మద్దతు అవసరమని పరిశ్రమ భావిస్తోంది. ఆటో పరిశ్రమ ప్రభుత్వం నుంచి కోరుతున్న ప్రధాన అంశం విధానాల్లో స్థిరత్వం. వాహనాల అభివృద్ధి, తయారీకి సంవత్సరాలు పడుతుండటంతో, తరచూ నిబంధనలు మారితే దీర్ఘకాల ప్రణాళికలు దెబ్బతింటాయని కంపెనీలు ఆందోళన వ్యక్తం చేస్తున్నాయి. స్థిరమైన విధానాలు విదేశీ పెట్టుబడులను ఆకర్షించడంతో పాటు, దేశీయ తయారీ, సాంకేతిక అభివృద్ధికి దోహదపడతాయని పరిశ్రమ విశ్వసిస్తోంది.

జీఎస్టీపై మరిన్ని అంచనాలు
ICE వాహనాలపై జీఎస్టీ మినహాయింపులతో సంతోషంగా ఉన్న పరిశ్రమ, ఇప్పుడు హైబ్రిడ్ మరియు ఎలక్ట్రిక్ వాహనాలపై కూడా పన్ను తగ్గింపు కోరుతోంది. దీంతో EV ధరలు పెట్రోల్, డీజిల్ వాహనాలకు దగ్గరగా ఉండే అవకాశం ఉంటుంది. అలాగే, చిన్న ఇంజిన్ ద్విచక్ర వాహనాలపై ఏకరీతి పన్ను విధానం ఉండాలని, 350cc కంటే ఎక్కువ సామర్థ్యం కలిగిన బైక్‌లపై ఉన్న అధిక పన్నులు తగ్గించాలని తయారీదారులు కోరుతున్నారు.

ఎలక్ట్రిక్ వాహనాల మౌలిక సదుపాయాలపై దృష్టి
EV విక్రయాలు పెరుగుతున్నప్పటికీ, ఛార్జింగ్ మౌలిక సదుపాయాల కొరత పెద్ద సవాలుగా మారింది. ముఖ్యంగా పబ్లిక్ ఛార్జింగ్ స్టేషన్ల సంఖ్యను పెంచాలని EV తయారీదారులు ప్రభుత్వాన్ని కోరుతున్నారు. మరిన్ని ఛార్జింగ్ పాయింట్లు, పన్ను ఉపశమనాలు, సులభమైన ఫైనాన్సింగ్ అందుబాటులోకి వస్తే, ప్రజలు వేగంగా EVల వైపు మొగ్గు చూపుతారని పరిశ్రమ అభిప్రాయపడుతోంది. కైనెటిక్ వాట్స్ మరియు వోల్ట్స్ లిమిటెడ్ వైస్ చైర్మన్ అజింక్య ఫిరోడియా మాట్లాడుతూ, అధిక కాలుష్యం కలిగించే వాహనాలపై అదనపు పన్నులు విధించి, పాత వాహనాలను రద్దు చేసి EVలను ఎంచుకునే వారికి మరింత ప్రోత్సాహకాలు ఇవ్వాలని సూచించారు. అలాగే, EV రంగంలో పెట్టుబడులు పెట్టే స్టార్టప్‌లు, మధ్య తరహా సంస్థలకు ప్రత్యేక PLI పథకాలు అవసరమన్నారు.

ఇటీవలి సంవత్సరాల్లో సరఫరా సమస్యలు ఆటో రంగాన్ని తీవ్రంగా ప్రభావితం చేశాయి. దీంతో దేశీయ తయారీ, స్థానిక భాగాల వినియోగం, సరఫరాదారుల అభివృద్ధిపై దృష్టి పెట్టాలని పరిశ్రమ కోరుతోంది. కీలక భాగాలపై కస్టమ్ సుంకాలు తగ్గితే, ఖర్చులు తగ్గి దిగుమతులపై ఆధారపడటం తగ్గుతుందని నిపుణులు చెబుతున్నారు. RSB గ్రూప్ ఎగ్జిక్యూటివ్ డైరెక్టర్ రజనీకాంత్ బెహెరా మాట్లాడుతూ, బడ్జెట్ 2026 భారత తయారీ రంగానికి కొత్త దిశానిర్దేశం చేయగలదని అన్నారు. సాంకేతిక అప్‌గ్రేడేషన్, పరిశ్రమ 4.0కు మద్దతు, పారదర్శక క్లియరెన్స్ విధానాలు ఎగుమతులను పెంచుతాయని పేర్కొన్నారు.

పరిశోధన, నైపుణ్యాభివృద్ధిపై దృష్టి
భవిష్యత్తును దృష్టిలో పెట్టుకుని ఆటో కంపెనీలు R&D, కొత్త టెక్నాలజీలు, ఉద్యోగుల శిక్షణపై పెట్టుబడులు పెడుతున్నాయి. ఈ నేపథ్యంలో, పరిశోధన, అభివృద్ధికి పన్ను మినహాయింపులు, నైపుణ్యాభివృద్ధికి మద్దతు ఇవ్వాలని పరిశ్రమ కోరుతోంది. ఇది ఉపాధి అవకాశాలను పెంచడంతో పాటు, భారత ఆటో రంగాన్ని గ్లోబల్ హబ్‌గా మార్చడంలో కీలక పాత్ర పోషిస్తుందని విశ్లేషకులు అభిప్రాయపడుతున్నారు.