TRAI New Recharge Rules: TRAI కొత్త నిబంధనలు.. Jio, Airtel, Vi రీఛార్జ్ ప్లాన్లలో కీలక మార్పులు..

TRAI New Recharge Rules: టెలికాం రెగ్యులేటరీ అథారిటీ ఆఫ్ ఇండియా (TRAI) కొత్త రూల్స్‌ తెచ్చింది.. టెలికాం వినియోగదారులకు మరిన్ని రీఛార్జ్ ఆప్షన్లు అందుబాటులోకి తీసుకురావడానికి TRAI ఈ కొత్త నిబంధనలు తీసుకొచ్చింది. ముఖ్యంగా మొబైల్ డేటా అవసరం లేని వినియోగదారుల కోసం కేవలం వాయిస్ కాల్స్, SMSలతో కూడిన రీఛార్జ్ ప్లాన్లను మరింతగా అందించాలని టెలికాం సంస్థలను ఆదేశించింది. ఈ నిబంధనలు రిలయన్స్ జియో, భారతి ఎయిర్‌టెల్, వొడాఫోన్ ఐడియా (Vi) సహా అన్ని టెలికాం ఆపరేటర్లకు వర్తిస్తాయి. 2026 సెప్టెంబర్ 22న ప్రచురించిన Telecom Consumers Protection (13th Amendment) Regulations, 2026 ప్రకారం.. ప్రస్తుతం డేటా, కాల్స్, SMS కలిపిన ప్లాన్లకు ప్రత్యామ్నాయంగా డేటా లేని వాయిస్-అండ్-SMS-ఓన్లీ ప్లాన్లను అందించాల్సి ఉంటుంది. ఇప్పటికే 30 రోజులు లేదా అంతకంటే తక్కువ కాలపరిమితి ఉన్న బండిల్‌డ్ Special Tariff Voucherను అందిస్తున్న ఆపరేటర్లు, అదే కాలపరిమితికి వాయిస్, SMS మాత్రమే ఉండే ప్రత్యామ్నాయ ప్లాన్‌ను కూడా అందించాలి. సంబంధిత బండిల్‌డ్ ప్లాన్‌తో పోలిస్తే ఈ ప్లాన్‌కు తగినంత తక్కువ టారిఫ్ ఉండాలి.

నెలవారీ రీఛార్జ్ ఆప్షన్
ప్రతి నెల ఒకే తేదీన పునరుద్ధరించుకునేలా కనీసం ఒక వాయిస్-అండ్-SMS-ఓన్లీ ప్లాన్‌ను టెలికాం సంస్థలు అందించాలి. ఒక నెలలో అదే తేదీ లేకపోతే ఆ నెల చివరి రోజున రీఛార్జ్‌ను పునరుద్ధరించుకునే అవకాశం కల్పించాలి. అలాగే ఎక్కువ కాలపరిమితి ఉన్న బండిల్‌డ్ ప్లాన్లను అందించే ఆపరేటర్లు, డేటా అవసరం లేని వినియోగదారుల కోసం కనీసం ఒక లాంగ్-వాలిడిటీ వాయిస్, SMS-ఓన్లీ ప్లాన్‌ను కూడా అందించాలి. అయితే, TRAI చాలా కాలంగా డేటా లేని వాయిస్, SMS ప్రీపెయిడ్ ప్యాక్‌లను అందుబాటులో ఉంచుతోంది. అయితే వినియోగదారులకు మరిన్ని ఎంపికలు అవసరమని గుర్తించిన తర్వాత ఈ మార్పులు తీసుకొచ్చింది. 2026 ఏప్రిల్ 7న 13వ సవరణపై ముసాయిదాను ప్రజల అభిప్రాయాల కోసం విడుదల చేసింది. అనంతరం సంప్రదింపుల ప్రక్రియ పూర్తయ్యాక సెప్టెంబర్ 22న తుది సవరణను ప్రకటించింది.

Jio, Airtel, Vi యూజర్లపై ప్రభావం
కొత్త నిబంధనలతో కేవలం కాల్స్, SMSల కోసం మొబైల్ కనెక్షన్‌ను ఉపయోగించే వారికి మరిన్ని ప్రీపెయిడ్ ఆప్షన్లు లభించనున్నాయి. డేటా అవసరం లేని ఫీచర్ ఫోన్ వినియోగదారులు తమ అవసరానికి సరిపోయే ప్లాన్‌ను ఎంచుకునే అవకాశం ఉంటుంది. అయితే వారు చెల్లించాల్సిన అసలు రీఛార్జ్ మొత్తం, ప్లాన్ ధరలు, కాలపరిమితి వంటి అంశాలు ఆయా టెలికాం కంపెనీలు ప్రకటించే కొత్త ప్లాన్లపై ఆధారపడి ఉంటాయి.

28 రోజుల ప్లాన్లు 30 రోజులకు మారుతాయా?
TRAI కొత్త నిబంధనల వల్ల ప్రస్తుతం ఉన్న 28 రోజుల రీఛార్జ్ ప్లాన్లు తప్పనిసరిగా 30 రోజుల ప్లాన్లుగా మారాల్సిన అవసరం లేదు. 28 రోజుల ప్లాన్ల వ్యవధిని మార్చడం ఈ నిబంధనల ఉద్దేశం కాదు. డేటా అవసరం లేని వినియోగదారులకు మరిన్ని వాయిస్, SMS-ఓన్లీ ఎంపికలు కల్పించడం, ముఖ్యంగా నెలవారీగా పునరుద్ధరించుకునే సౌకర్యాన్ని అందించడం ప్రధాన లక్ష్యం. అందువల్ల ప్రస్తుత 28 రోజుల ప్లాన్లు ఆటోమేటిక్‌గా క్యాలెండర్-మంత్ ప్లాన్లుగా మారుతాయని వినియోగదారులు భావించకూడదు.