History Of Tata Indica : ఇండికా కారుతో రతన్‌టాటాకి ఎమోషనల్ బాండింగ్!

దిగ్గజ వ్యాపారవేత్త, టాటా గ్రూప్స్ గౌరవ చైర్మన్, టాటా సన్స్ మాజీ ఛైర్మన్ రతన్ టాటా కన్నుమూశారు. ముంబైలోని బ్రీచ్ కాండీ ఆసుపత్రిలో చికిత్స పొందుతూ బుధవారం రాత్రి తుది శ్వాస విడిచిన రతన్ టాటా.. బీపీ అకస్మాత్తుగా పడిపోవడంతో సోమవారం నుంచి ముంబైలోని బ్రీచ్ కాండీ హాస్పిటల్ లో చేరారు. అక్కడ ఇంటెన్సివ్ కేర్ యూనిట్‌లో చికిత్స పొందుతూ తుది శ్వాస విడిచారు రతన్ టాటా. ఇదిలా ఉండగా.. రతన్ టాటా ఎమోషనల్ కారు ఇండికా గురించి తెలుసుకుందాం..

1995లో ఈ మిషన్‌కు శ్రీకారం..
రతన్ టాటా 1995లో ఈ మిషన్‌కు సంబంధించిన పనిని ప్రారంభించారు. అప్పటికి టాటా గ్రూప్‌, టాటా మోటార్స్‌కు ఛైర్మన్‌ కూడా అయ్యారు. “మేము జెన్ పరిమాణంలో.. అంబాసిడర్ అంత అంతర్గత స్థలంతో మారుతి 800 ధరతో, డీజిల్ యొక్క ఎకనామిక్ రేటుతో నడిచే కారును తయారు చేస్తాం.” అని రతన్ టాటా ప్రకటించారు. ఇది నెరవేరదని అందరూ అభిప్రాయపడ్డారు. భారతదేశం సొంతంగా కార్లను తయారు చేయగలదని రతన్ టాటా చేసిన ప్రకటనకు అందరూ నవ్వుకున్నారు. కానీ రతన్ టాటా ధీటుగా సమాధానమిచ్చారు. టాటా ఇండికాను తయారు చేయడం ద్వారా విజయం సాధించారు.

ఈ పూణే ఆధారిత కంపెనీకి పని అప్పగింత…
రతన్ తన కంపెనీకి చెందిన పూణేలోని ఇంజినీరింగ్ రీసెర్చ్ సెంటర్ ఇంజనీర్లకు ఇండికాను తయారు చేసే పనిని అప్పగించారు. ఇంతకు ముందెన్నడూ కారు తయారు చేయని కంపెనీకి అది. చిన్న కుటుంబాలకు తగినంత స్థలం ఉండాలనే రతన్ టాటా యొక్క సవాలును నెరవేర్చగలిగేలా దాని రూపకల్పన కూడా ఉండాలి. ఇదంతా అంత తేలిగ్గా జరగలేదు. కారును తయారు చేయడానికి, ఆ సమయంలో తయారీ కర్మాగారం అవసరం. కొత్త ప్లాంట్ కోసం $2 బిలియన్లు అవసరం. ఆ సమయంలో టాటా పెట్టుబడి పెట్టడం సాధ్యం కాదు. ఇక్కడ మళ్లీ రతన్ టాటా మనసు చలించిపోయింది. ఆయన ప్రపంచవ్యాప్తంగా వెతకడం ప్రారంభించారు. ఆస్ట్రేలియాలో మూసివున్న నిస్సాన్ ప్లాంట్‌ను కనుగొన్నారు. టాటా ఇంజినీర్లు అక్కడికి చేరుకుని మొత్తం మెటీరియల్‌ని విప్పి సముద్ర మార్గంలో భద్రంగా పూణెకు తీసుకొచ్చి ప్లాంట్ మొత్తాన్ని ఇక్కడ అమర్చారు. ఈ పని కేవలం 6 నెలల్లో పూర్తయింది. అది కూడా కొత్త ప్లాంట్ ఖర్చులో 20% మాత్రమే.

1998 సంవత్సరంలో ఇండికా విడుదల…
టాటా సుమారు 26 సంవత్సరాల క్రితం 1998 సంవత్సరంలో దేశంలో తన మొట్టమొదటి చిన్న కారు టాటా ఇండికాను విడుదల చేసింది. అప్పటి వరకు ట్రక్కు, బస్సుల తయారీ కంపెనీగా పేరుగాంచిన టాటా ఈ కారుతో ప్యాసింజర్ కార్ల తయారీ కంపెనీగా గుర్తింపు పొందింది. ఈ టాటా కారు బ్రిటన్‌లో కూడా అమ్ముడయ్యింది. భారతదేశపు ప్రముఖ ఆటోమొబైల్ తయారీ కంపెనీ టాటా మోటార్స్ తన మొదటి చిన్న కారు ఇండికాను యూకేకి కూడా రవాణా చేసింది. అక్కడ ఈ కారును సిటీ రోవర్ పేరుతో సూపర్ మినీ సెగ్మెంట్లో ఎమ్‌జీ రోవర్ గ్రూప్ విడుదల చేసింది. 2003 సంవత్సరంలో ఈ కారును బ్రిటన్‌లో ప్రారంభించారు. అయితే ఇది యూకేలో కేవలం రెండేళ్లపాటు మాత్రమే అమ్మకానికి అందుబాటులో ఉంచారు. ఇలా ఎన్నో సవాళ్ల మధ్య ఆయన విజయం సాధించారు.

భారతదేశంలో టాటా ఇండికా..
దేశంలో ఈ కారు 1998లో లాంచ్ అయిన వెంటనే ఇండియన్ మార్కెట్లో హిట్ అయింది. ప్రారంభించిన రెండు సంవత్సరాలలో టాటా మోటార్స్ ఈ వాహనం కోసం దాదాపు 1.25 లక్షల ఆర్డర్‌లను దక్కించుకుంది. వాణిజ్య వాహనాల తయారీ సంస్థ యొక్క మొదటి చిన్న కారుగా ఇండికాను ఇష్టపడిన వారిలో రతన్ టాటా కూడా ఉన్నారు.