Microsoft Layoffs: ఐటీ ఉద్యోగులకు మళ్లీ బ్యాడ్ న్యూస్.. మైక్రోసాఫ్ట్‌లో 5,000 మంది అవుట్! ఎవరెవరి ఉద్యోగాలు ఊడనున్నాయంటే?

Microsoft Layoffs: ప్రపంచవ్యాప్తంగా పనిచేస్తున్న ఐటీ నిపుణులకు టెక్ దిగ్గజం మైక్రోసాఫ్ట్ (Microsoft) కోలుకోలేని షాక్ ఇవ్వబోతోంది. సంస్థలో మరోసారి భారీ ఎత్తున ఉద్యోగ కోతలు విధించడానికి ప్రణాళికలు సిద్ధం చేస్తున్నట్లు అంతర్జాతీయ మీడియా నివేదికలు పేర్కొంటున్నాయి. ఈ కొత్త లేఆఫ్స్ పరంపరలో భాగంగా కంపెనీ తన గ్లోబల్ వర్క్‌ఫోర్స్ నుంచి సుమారు 2.5 శాతం మంది సిబ్బందిని తొలగించనుందట. దీనివల్ల ఒకేసారి 5,000 మందికి పైగా ఉద్యోగుల జీవనోపాధి దెబ్బతినే ప్రమాదం ఉందని సమాచారం.

ఏఐ (AI) రేసు..

మైక్రోసాఫ్ట్ ప్రస్తుతం ఆర్టిఫిషియల్ ఇంటెలిజెన్స్ (AI), జెనరేటివ్ ఏఐ టెక్నాలజీ మౌలిక సదుపాయాలలో వేల కోట్ల పెట్టుబడులు పెడుతోంది. ఈ కొత్త సాంకేతికత సంస్థ యొక్క పాత సాఫ్ట్‌వేర్ వ్యాపారాన్ని దెబ్బతీస్తుందేమోనని ఇన్వెస్టర్లు భయపడుతున్నారు. దీంతో ఏఐ వైపు వేగంగా అడుగులు వేస్తున్న మైక్రోసాఫ్ట్.. ఆ ఖర్చులను భర్తీ చేయడం కోసం సాధారణ వ్యయాలను తగ్గించుకుంటోంది. ఇందులో భాగంగానే సేల్స్, కన్సల్టింగ్, గేమింగ్ విభాగాల్లోని ఉద్యోగులపై వేటు వేయనున్నారు. ప్రస్తుతం మైక్రోసాఫ్ట్‌లో దాదాపు 2,20,000 మంది ఉద్యోగులు ఉన్నారు.

వాలంటరీ రిటైర్మెంట్ స్కీమ్

యూఎస్ (US) ఉద్యోగుల కోసం ఇప్పటికే సంస్థ ఒక ప్రత్యేక స్వచ్ఛంద పదవీ విరమణ కార్యక్రమాన్ని కూడా తెచ్చింది. వయస్సు, మొత్తం సర్వీసు అనుభవం కలిపి 70 సంవత్సరాలు దాటిన వారికి ఈ సదుపాయం వర్తించనుంది. గత నెల రోజుల్లో మైక్రోసాఫ్ట్ స్టాక్ ఏకంగా 17 శాతం మేర పతనమైంది. ఈ తీవ్ర ఆర్థిక ఒత్తిడి కారణంగానే కంపెనీ ఖర్చులను అదుపు చేయడానికి ఉద్యోగులను రోడ్డున పడేసే కఠిన నిర్ణయానికి మొగ్గు చూపుతోందని అంటున్నారు. ఇప్పటికే గూగుల్, అమెజాన్, మెటా, ఒరాకిల్ వంటి సంస్థలు వేలాది మందిని తొలగించగా.. ఇప్పుడు ఆ జాబితాలోకి మైక్రోసాఫ్ట్ కూడా చేరడం ఐటీ రంగాన్ని వణికిస్తోంది. అయితే ఈ లేఆఫ్స్ వార్తలపై మైక్రోసాఫ్ట్ యాజమాన్యం ఇంకా అధికారిక ప్రకటన విడుదల చేయాల్సి ఉంది.

హార్డ్‌వేర్ తయారీ ఖర్చులు భారీగా పెరగడంతో, ఎక్స్‌బాక్స్ ఉత్పత్తుల ధరలను ఏకంగా $150 (సుమారు రూ.12,500) వరకు పెంచాల్సి వచ్చింది. దీంతో మార్కెట్‌లో నిలదొక్కుకోవడానికి గేమింగ్ బృందంలో పెద్ద ఎత్తున పునర్వ్యవస్థీకరణ చేపడుతున్నారు. నిజానికి మైక్రోసాఫ్ట్ ఉద్యోగులకు ఈ పింక్ స్లిప్స్ భయాలు కొత్తేమీ కాదు. గత ఏడాది మే నెలలో 6,000 మందిని, ఆ తర్వాత జూలైలో మరో 9,000 మందిని.. ఇలా మొత్తంగా 15,000 మందిని (4% సిబ్బందిని) ఇప్పటి వరకు సంస్థ తొలగించింది. ఇప్పుడు మళ్లీ కొత్తగా 5,000 మంది ఉద్యోగాలకు లేఆఫ్‌లు ఇవ్వనున్నట్లు కనిపిస్తుండటంతో సాఫ్ట్‌వేర్ ఉద్యోగుల్లో తీవ్ర ఆందోళన వ్యక్తమవుతోంది.