Credit Card: డెబిట్ కార్డ్ కంటే క్రెడిట్ కార్డ్ ఉత్తమమా..?

క్రెడిట్ కార్డ్.. ఈ పేరు వినగానే చాలామంది భయాందోళనల్ని వ్యక్తపరుస్తుంటారు. క్రెడిట్ కార్డ్ అంటే.. జేబులో అప్పులు పెట్టుకొని తిరిగినట్టేనని అభిప్రాయాలు తెలియజేస్తారు. అందుకే, చాలామంది క్రెడిట్ కార్డ్ అనగానే ఆమడ దూరంలో ఉంటారు. అయితే, కొన్నిసార్లు క్రెడిట్ కార్డ్ వాడటం మంచిదేనని నిపుణులు సూచిస్తున్నారు. క్రెడిట్ కార్డ్ ఉంది కదా అని, ఎప్పుడు పడితే అప్పుడు స్వైప్ చేస్తే నష్టాలు తప్పవు. అలా కాకుండా తెలివిగా, సమర్థవంతంగా ఉపయోగిస్తే.. దాని నుంచి గరిష్ట లాభం పొందవచ్చని చెప్తున్నారు.

ఆన్‌లైన్‌లో సినిమా, బస్, రైలు టికెట్ల బుకింగ్ కోసం క్రెడిట్ కార్డ్ వాడితే.. కొంత రాయితీ వచ్చే అవకాశం ఉంది. సినిమా బుకింగ్ ప్లాట్‌ఫామ్స్‌పై కొన్ని రకాల క్రెడిట్ కార్డుల ఉపయోగంతో.. ఒక టికెట్‌పై మరో టికెట్ ఉచితంగా ఇస్తున్నారు. ఆన్‌లైన్‌లో జరిగే మోసాల నుంచి కూడా తప్పించుకోవచ్చు. డెబిట్ కార్డ్‌ని వినియోగించినప్పుడు ఏదైనా మోసం జరిగితే, ఖాతాలో ఉన్న డబ్బు మొత్తం రిస్క్‌లో ఉన్నట్టే. క్రెడిట్ కార్డ్ విషయంలో అలాంటి మోసాలు జరగవు. డెబిట్ కార్డ్ స్వైప్ చేసినప్పుడు ఎక్కువ అమౌంట్ ఎంటర్ చేస్తే, దాన్ని తిరిగి ఖాతాలోకి రప్పించేందుకు చాలా సమయం పడుతుంది. అదే క్రెడిట్ కార్డ్‌తో ఇలాంటి పరిస్థితి ఏర్పడితే.. సంబంధిత వర్గాల్ని సంప్రదించి, వెంటనే క్రెడిట్‌ను తెప్పించుకోవచ్చు.

ఖరీదైన వస్తువులు కొనుగోలు చేయడానికి క్రెడిట్ కార్డ్ ఉపయోగపడుతుంది. దాన్ని EMIగా కన్వర్ట్ చేసుకొని, నెలకు వీలైనంత అమౌంట్ కట్టుకోవచ్చు. క్రెడిట్‌కార్డ్‌ని సమర్థవంతంగా ఉపయోగించడం వల్ల.. మంచి క్రెడిట్ స్కోర్ సాధించొచ్చు. ఫలితంగా.. బ్యాంకుల నుంచి లోన్స్ త్వరగా మంజూరు అవుతాయి. క్రెడిట్ కార్డ్ వల్ల మరో ప్రయోజనం ఏమిటంటే.. ఖర్చులు హద్దుమీరకుండా అదుపు చేసుకోవచ్చు. ఎంత ఖర్చు చేస్తున్నామో ఓ రికార్డ్ మెయింటెయిన్ చేసినట్టు అవుతుంది.