Indane Xtralite Now: ఇండేన్ ఎక్స్‌ట్రాలైట్ నౌ ప్రారంభం.. తేలికైన LPG సిలిండర్, 4 గంటల్లో హోమ్ డెలివరీ.. బుకింగ్ ఇలా..

దేశంలోని ఎల్‌పీజీ వినియోగదారులకు మరింత సౌకర్యవంతమైన సేవలను అందించేందుకు ఇండియన్ ఆయిల్ కార్పొరేషన్ (IOC) కొత్తగా ‘ఇండేన్ ఎక్స్‌ట్రాలైట్ నౌ (Indane Xtralite Now)’ సేవను ప్రారంభించింది. ఈ కొత్త కనెక్షన్‌లో తేలికైన కాంపోజిట్ LPG సిలిండర్‌తో పాటు వేగవంతమైన హోమ్ డెలివరీ, సులభమైన కనెక్షన్ ప్రక్రియ వంటి ఆధునిక సౌకర్యాలను అందుబాటులోకి తీసుకొచ్చింది. అంతేకాకుండా, ప్రజాదరణ పొందిన 5 కేజీల ‘చోటు’ LPG సిలిండర్ కోసం కూడా ఎక్స్‌ప్రెస్ హోమ్ డెలివరీ సేవను ప్రారంభించినట్లు ఇండియన్ ఆయిల్ ప్రకటించింది.

ఇండేన్ ఎక్స్‌ట్రాలైట్ నౌ ప్రత్యేకతలు

ఆధునిక కుటుంబాల అవసరాలను దృష్టిలో ఉంచుకుని రూపొందించిన ఇండేన్ ఎక్స్‌ట్రాలైట్ నౌ వినియోగదారులకు మరింత సురక్షితమైన, సౌకర్యవంతమైన LPG అనుభవాన్ని అందించేందుకు రూపొందించారు.

ఈ సేవలో లభించే ముఖ్యమైన ప్రయోజనాలు:

తేలికైన, తుప్పు పట్టని కాంపోజిట్ LPG సిలిండర్
సిలిండర్‌లో మిగిలిన గ్యాస్ పరిమాణాన్ని సులభంగా గుర్తించే పారదర్శక బాడీ
బుకింగ్ చేసిన 4 గంటల్లోపు ఎక్స్‌ప్రెస్ హోమ్ డెలివరీ
వినియోగదారులు తమకు అనుకూలమైన డెలివరీ సమయాన్ని ఎంచుకునే అవకాశం
కొత్త కనెక్షన్ కోసం తక్కువ పత్రాలతో సులభమైన ప్రక్రియ
5 కేజీల ‘చోటు’ సిలిండర్‌కు కూడా వేగవంతమైన డెలివరీ

ఇండియన్ ఆయిల్ తన 5 కేజీల చోటు LPG సిలిండర్ కోసం కూడా ఎక్స్‌ప్రెస్ హోమ్ డెలివరీ సేవను ప్రారంభించింది. బుకింగ్ చేసిన నాలుగు గంటల్లోపే సిలిండర్‌ను ఇంటికే అందజేస్తామని కంపెనీ తెలిపింది. ప్రత్యేకించి పట్టణ ప్రాంతాల్లో నివసించే ఉద్యోగులు, చిన్న కుటుంబాలు, ఒంటరిగా నివసించే వారికి ఈ సేవ ఎంతో ఉపయోగకరంగా ఉంటుందని సంస్థ పేర్కొంది.

ప్రస్తుతం ఈ నగరాల్లో అందుబాటులో

పూణే
గురుగ్రామ్
ఇండోర్
కోయంబత్తూరు

ఇండియన్ ఆయిల్ ప్రణాళిక ప్రకారం.. 2026 ఆగస్టు నాటికి మరో 25 నగరాలకు ఈ సేవను విస్తరించనుంది. 2026 అక్టోబర్ చివరి నాటికి దేశంలోని ప్రధాన నగరాలన్నింటికీ ఈ సేవను అందుబాటులోకి తీసుకురావాలని లక్ష్యంగా పెట్టుకుంది.

బుకింగ్ ఎలా చేసుకోవాలి?

వినియోగదారులు కొత్త కనెక్షన్ పొందేందుకు లేదా రీఫిల్ బుక్ చేసుకునేందుకు ఈ క్రింది మార్గాలను ఉపయోగించవచ్చు.

IndianOil ONE App
Indian Oil అధికారిక కస్టమర్ వెబ్‌సైట్
త్వరలో WhatsApp (7588888824) ద్వారా కూడా బుకింగ్ సౌకర్యం అందుబాటులోకి రానుంది.
ఈ సేవలు ఇండియన్ ఆయిల్‌కు చెందిన ఇండేన్ డిస్ట్రిబ్యూటర్ల నెట్‌వర్క్ తో పాటు ఎంపిక చేసిన ఇండియన్ ఆయిల్ రిటైల్ అవుట్‌లెట్ల ద్వారా అందుబాటులో ఉంటాయి.

ఇండియన్ ఆయిల్ ఛైర్మన్ ఏమన్నారు?

కొత్త టెక్నాలజీ అసలు ఉద్దేశం వినియోగదారుల జీవితాన్ని మరింత సులభతరం చేయడమేనని ఇండియన్ ఆయిల్ ఛైర్మన్ ఎ.ఎస్. సాహ్నీ తెలిపారు. ఆయన మాట్లాడుతూ, ఇండేన్ ఎక్స్‌ట్రాలైట్ నౌ ద్వారా ఆధునిక కాంపోజిట్ సిలిండర్ టెక్నాలజీని మెరుగైన సర్వీస్ మోడల్‌తో కలిపి వినియోగదారులకు మరింత సురక్షితమైన, సులభమైన, సౌకర్యవంతమైన LPG సేవలను అందిస్తున్నామని చెప్పారు. భవిష్యత్ అవసరాలకు అనుగుణంగా ఇంధన సేవలను అభివృద్ధి చేయడంతో పాటు వినియోగదారుల సేవలో కొత్త ప్రమాణాలను నెలకొల్పే దిశగా ఇది కీలక ముందడుగని ఇండియన్ ఆయిల్ పేర్కొంది.