Air India: ఎయిర్ ఇండియా చేతికి మొట్టమొదటి ఎయిర్‌బస్ A350-900.. ఆకాశంలో ఇంద్రభవనం ఈ విమానం..

Air India: టాటా చేతిలోకి వచ్చిన తర్వాత ఎయిర్ ఇండియా రూపురేఖలు మారిపోతున్నాయి. ఇప్పటికే భారీ సంఖ్యలో ఎయిర్‌బస్, బోయింగ్ సంస్థలకు విమానాల ఆర్డర్లను ఇచ్చింది. ఇదిలా ఉంటే శనివారం రోజు ఎయిర్ ఇండియా చేతికి మొట్టమొదటి వైడ్ బాడీ క్యారియర్ ఎయిర్‌బస్ A350-900 అందింది. ఫ్రాన్స్ లోని ఎయిర్‌బస్ ఫెసిలిటీ నుంచి బయలుదేరిన ఈ విమానం ఈ రోజు మధ్యాహ్నం ఢిల్లీకి చేరుకుంది. ఈ తరహా విమానం కలిగిన తొలి భారతీయ ఎయిర్ లైనర్‌గా ఎయిర్ ఇండియా నిలిచింది.

ఎయిర్ ఇండియా 20 ఎయిర్ బస్ A350-900 ఆర్డర్లలో ఇది మొదటి విమానం. మరో ఐదు విమానాలు మార్చి 2024 వరకు డెలివరీ కానున్నాయి. ఎయిర్ బస్ A350-900 జనవరి 2024 నుంచి కమర్షియల్ సర్వీసులోకి ప్రవేశించనుంది. ప్రారంభంలో సిబ్బందికి, ఇతర టెక్నీషియన్లకు పరిచయం కోసం దేశీయంగా పనిచేస్తుంది. ఆ తర్వాత ఈ విమానాన్ని ఇంటర్నేషనల్ రూట్లలో ఆపరేట్ చేయనున్నారు. సుదూర ప్రాంతాలకు నాన్ స్టాప్ మార్గాల్లో ప్రయాణించడం ఈ విమానం ప్రత్యేకత అని ఎయిర్ ఇండియా సీఈఓ, ఎండీ కాంప్‌బెల్ విల్సన్ అన్నారు.

ఎయిర్ ఇండియా A350-900లో 3 క్లాస్ క్యాబిన్ కాన్ఫిగరేషన్‌లో ఉంటుంది. మొత్తం 316 సీట్లు ఉంటాయి. 28 ప్రైవేట్ బిజినెస్ క్లాన్ సూట్లు కాగా.. 24 ప్రీమియం ఎకానమి.. 264 ఎకానమీ క్లాస్ సీట్లు ఉంటాయి. సాధారణంగా చెప్పాలంటే ఆకాశంలో ప్రయాణించే ఇంద్ర భవనంగా ఈ విమానాన్ని అభివర్ణించవచ్చు.

ఎయిర్ ఇండియా ఎయిర్‌బస్ సంస్థతో 250 విమానాల కోసం ఒప్పందం చేసుకుంది. ప్రస్తుతం వచ్చిన విమానం ఈ ఒప్పందంలో మొదటిది. ఎయిర్ ఇండియా మొత్తం 20 A350 విమానాలు, 20 A350-900 విమానాలు, 210 A320neo విమానాల కోసం ఒప్పందం కుదుర్చుకుంది. మరోవైపు మరో విమాన తయారీ సంస్థ బోయింగ్‌తో 220 విమానాల కోసం ఒప్పందం కుదుర్చుకుంది. బోయింగ్, ఎయిర్‌బస్ నుంచి 470 కొత్త విమానాలను ఎయిర్ ఇండియా కొనుగోలు చేస్తోంది.

India's first @Airbus A350-900 has come home in the bold, new Air India livery, and it received a grand welcome at @DelhiAirport.

It is touchdown of a new Air India. For a new, resurgent India.#AI350 #AirIndia #FlyAI #ThisIsNewAirIndia pic.twitter.com/V1vKk6m81V

— Air India (@airindia) December 23, 2023