Best Bikes: బడ్జెట్ ధరలో.. రోజువారీ ప్రయాణానికి బెస్ట్ బైక్స్..

రోజువారీ ప్రయాణం కోసం తక్కువ ధరలో మంచి మైలేజ్, నమ్మకమైన పనితీరు, తక్కువ నిర్వహణ ఖర్చులు కలిగిన బైక్ కోసం చూస్తున్న వారికి మార్కెట్లో అనేక మంచి బైక్స్ అందుబాటులో ఉన్నాయి. బడ్జెట్‌లో కమ్యూటర్, స్పోర్టీ సెగ్మెంట్లలో కొన్ని బైక్‌లు వినియోగదారులను ఆకట్టుకుంటున్నాయి. వాటిలో టాప్ 5 మోడళ్ల వివరాలు ఇవే.

1. బజాజ్ ప్లాటినా 110

బజాజ్ ప్లాటినా 110 తక్కువ ధరలో అధిక మైలేజ్ కోరుకునే వారికి మంచి ఎంపికగా నిలుస్తోంది. ఇందులో 115.45 సీసీ ఇంజన్ ఉండి 8.6 హెచ్‌పీ పవర్, 9.81 ఎన్ఎం టార్క్‌ను ఉత్పత్తి చేస్తుంది. 5-స్పీడ్ గేర్‌బాక్స్‌తో వచ్చే ఈ బైక్ సుమారు 70 కిలోమీటర్ల వరకు మైలేజ్ అందిస్తుంది. సౌకర్యవంతమైన సస్పెన్షన్ కారణంగా గ్రామీణ ప్రాంత రోడ్లపై కూడా సాఫీగా ప్రయాణించవచ్చు. దీని ప్రారంభ ధర సుమారు రూ.72,428.

2. టీవీఎస్ స్టార్ సిటీ ప్లస్

టీవీఎస్ స్టార్ సిటీ ప్లస్ భారత మార్కెట్లో అత్యంత ప్రజాదరణ పొందిన కమ్యూటర్ బైక్‌లలో ఒకటి. 109.7 సీసీ ఇంజన్‌తో పనిచేసే ఈ బైక్ 8.1 హెచ్‌పీ పవర్, 8.7 ఎన్ఎం టార్క్‌ను ఉత్పత్తి చేస్తుంది. 67 నుంచి 83 కిలోమీటర్ల వరకు మైలేజ్ ఇవ్వగల సామర్థ్యం దీని ప్రత్యేకత. LED హెడ్‌లైట్, USB ఛార్జింగ్ పోర్ట్, ఎకో ఇండికేటర్ వంటి ఫీచర్లు ఇందులో ఉన్నాయి. ధర రూ.75, 200 నుంచి ప్రారంభమవుతుంది.

3. హోండా షైన్ 125

125 సీసీ సెగ్మెంట్‌లో అత్యంత నమ్మకమైన బైక్‌లలో హోండా షైన్ ఒకటి. 123.9 సీసీ ఇంజన్‌తో పనిచేసే ఈ బైక్ 10.5 హెచ్‌పీ పవర్, 11 ఎన్ఎం టార్క్‌ను ఉత్పత్తి చేస్తుంది. 55 నుంచి 65 కిలోమీటర్ల వరకు మైలేజ్ అందిస్తుంది. డిజిటల్ డిస్‌ప్లే, USB టైప్-C ఛార్జింగ్ పోర్ట్, ట్యూబ్‌లెస్ టైర్లు వంటి ఫీచర్లు ఉన్నాయి. దీని ధర రూ.85,862 నుంచి ప్రారంభమవుతుంది.

4. హీరో సూపర్ స్ప్లెండర్ ఎక్స్‌టెక్

హీరో సూపర్ స్ప్లెండర్ ఎక్స్‌టెక్ ఫీచర్ల పరంగా మంచి విలువను అందించే బైక్. 124.7 సీసీ ఇంజన్, 5-స్పీడ్ గేర్‌బాక్స్‌తో వచ్చే ఈ బైక్ రోజువారీ ప్రయాణాలకు అనువుగా ఉంటుంది. 60 నుంచి 65 కిలోమీటర్ల వరకు మైలేజ్ ఇస్తుంది. బ్లూటూత్ కనెక్టివిటీ, డిజిటల్ మీటర్, LED హెడ్‌లైట్ వంటి ఆధునిక ఫీచర్లు ఇందులో ఉన్నాయి. దీని ధర సుమారు రూ.88,044 నుంచి ప్రారంభమవుతుంది.

5. బజాజ్ పల్సర్ 125

స్పోర్టీ లుక్‌తో పాటు మంచి పనితీరు కోరుకునే వారికి బజాజ్ పల్సర్ 125 మంచి ఎంపిక. 124.4 సీసీ ఇంజన్‌తో పనిచేసే ఈ బైక్ శక్తివంతమైన రైడింగ్ అనుభవాన్ని అందిస్తుంది. 50 నుంచి 55 కిలోమీటర్ల వరకు మైలేజ్ ఇస్తుంది. ఆకర్షణీయమైన డిజైన్, కంఫర్టబుల్ రైడింగ్ పొజిషన్ దీని ప్రత్యేకతలు. దీని ప్రారంభ ధర రూ.91,757.