Maruti Suzuki e Vitara: మారుతి సుజుకీ e-విటారా లాంచ్.. రూ. 10.99 లక్షల ప్రారంభ ధర..

Maruti Suzuki e Vitara: మారుతి సుజుకి ఈ విటారా(Maruti Suzuki e Vitara ) భారత మార్కెట్లో లాంచ్ అయింది. మారుతి సుజుకి ఇండియా తన తన మొదటి ఎలక్ట్రిక్ కార్‌ను తీసుకువచ్చింది. ఈ విటారా ఇండియన్ మార్కెట్‌లో రూ. 10.99 లక్షల (ఎక్స్-షోరూమ్) పరిచయ ప్రారంభ ధరతో బ్యాటరీ-యాజ్-ఎ-సర్వీస్ మోడల్‌తో కి.మీకి రూ. 3.99 బ్యాటరీ EMIతో లాంచ్ చేసింది. అంటే, బ్యాటరీని కొనుగోలు చేయకుండా, ఉపయోగించిన కిలోమీటర్లకు ఛార్జ్ చెల్లించే విధానాన్ని తీసుకువచ్చింది.

ఈ ధర మార్చ్ 31 వరకు చెల్లుబాటు అవుతుంది. దీంతో ఇది ధరల పరంగా మార్కెట్‌లో ఉన్న ఇతర ఎలక్ట్రిక్ SUVలతో పోలిస్తే తక్కువ ధరకు లభిస్తుంది. హ్యుందాయ్ క్రెటా ఎలక్ట్రిక్, టాటా కర్వ్ ఈవీ, ఎంజీ విండ్‌సర్, మహీంద్రా BE6, విన్‌ఫాస్ట్ VF6 వంటి ప్రత్యర్థి కార్లకు ఇది పోటీని ఇస్తుంది. బుకింగ్ విషయానికి వస్తే రూ. 21,000లతో ఈ కార్‌ను బుక్ చేసుకోవచ్చు. వాహనం+బ్యాటరీపై 8 ఏళ్ల వారంటీ ఇస్తున్నారు. 1 ఏడాది ఉచిత ఛార్జింగ్ సౌకర్యాన్ని ఇవ్వడంతో పాటు రూ. 50,000 విలువైన హోమ్ ఛార్జర్ ఇన్‌స్టలేషన్ ఉచితంగా ఇస్తుంది.

మోటార్ -పవర్:

మోటార్, పవర్ విషయానికి వస్తే ఈ కారు హార్టెక్ట్-ఇ ప్లాట్‌ఫామ్‌పై నిర్మితమైంది. ఇందుల్లో eAxlesను ఉపయోగించారు. ఇది మోటార్, ఇన్వర్టర్‌ను ఒకే యూనిట్‌గా అనుసంధానిస్తుంది. మారుతి సుజుకి ఈ విటారా 49 kWh , 61 kWh రెండు బ్యాటరీ ప్యాక్స్‌లో లభ్యమవుతుంది. ఇవి 440 కి.మీ, 543 కి.మీ రేంజ్ ఇస్తుందని కంపెనీ చెబుతోంది. చిన్న బ్యాటరీ ప్యాక్ 144 బీహెచ్‌పీ, 189 ఎన్ఎం టార్క్ ప్రొడ్యూస్ చేస్తే, పెద్ద బ్యాటరీ 174 బీహెచ్‌పీ, 189 ఎన్ఎం శక్తిని జనరేట్ చేస్తుంది. ఇది సెట్ టూ ప్యాక్ టెక్నాలజీని కలిగి ఉంది, -30°C నుంచి 60°C వరకు ఆపరేట్ అయ్యేలా రూపొందించారు.

డిజైన్, సేఫ్టీ, ఫీచర్లు:

మారుతి ఇ-విటారాలో ట్రై-LED డేటైమ్ రన్నింగ్ లైట్లు, ముందు భాగంలో క్లోజ్డ్ గ్రిల్ ఉన్నాయి. ఏరోడైనమిక్ 18 ఇంచ్ అల్లాయ్ వీల్స్, ఇది 4,275 mm పొడవు, 1,800 mm వెడల్పు, 1,640 mm హైట్, 2,700 mm వీల్ బేస్ కలిగి ఉంది. ఎకో, నార్మల్, స్పోర్ట్స్, స్నో డ్రైవింగ్ మోడ్‌లు కార్‌లో ఉన్నాయి. రిజెనరేటివ్ బ్రేకింగ్‌తో వన్ పెడల్ డ్రైవింగ్ ఉంది.

ఇంటీరియర్స్‌లో ప్రీమియం క్యాబిన్, ట్విన్ డాష్ లేఅవుట్, 10.1-inch ఇన్ఫోటైన్‌మెంట్, 10.25-inch డిజిటల్ క్లస్టర్, వైర్‌లెస్ కనెక్టివిటీ, హార్మన్ సౌండ్ సిస్టమ్ వెంటిలేటెడ్ ఫ్రంట్ సీట్లు వంటి ఫీచర్లతో పాటు లెవల్ -2 ADAS, 7 ఎయిర్ బ్యాగ్స్ కలిగి ఉంది. అడ్వాన్స్డ్ బ్యాటరీ ప్రొటెక్షన్, ఆల్ డిస్క్ బ్రేక్, ఎలక్ట్రానిక్ పార్కింగ్ బ్రేక్(ఈపీబీ) వంటి సేఫ్టీ ఫీచర్లు ఉన్నాయి.