Honda Rebel 500 Recall: హోండా కీలక ప్రకటన.. Rebel 500 బైక్‌లు రీకాల్‌.. అసలు సమస్య ఏంటంటే?
- Follow Us :
-
-
Add as a preferred
source on google
Honda Rebel 500 Recall: హోండా మోటార్‌సైకిల్‌ అండ్‌ స్కూటర్‌ ఇండియా (HMSI) తన ప్రీమియం క్రూయిజర్‌ బైక్‌ Rebel 500కు సంబంధించి రీకాల్‌ ప్రకటించింది. ఏప్రిల్‌ 2025 నుంచి ఆగస్టు 2025 మధ్య తయారైన 96 యూనిట్లను ఈ రీకాల్‌ పరిధిలోకి తీసుకొచ్చింది. ఈ చర్య భారత్‌లోనే కాకుండా హోండా చేపట్టిన గ్లోబల్‌ రీకాల్‌ క్యాంపెయిన్‌లో భాగంగా ఉంది.
అసలు సమస్య ఏంటి?
హోండా తెలిపిన వివరాల ప్రకారం.. ప్రభావిత బైక్‌లలో హ్యాండిల్‌ లాక్‌కు అమర్చిన ఫిక్సింగ్‌ స్క్రూ అసెంబ్లీ సమయంలో నిర్దేశిత ప్రమాణాల ప్రకారం బిగించబడకపోయి ఉండొచ్చు. కొన్ని పరిస్థితుల్లో ఈ స్క్రూ కాలక్రమేణా వదులయ్యే అవకాశం ఉంది. అలా జరిగితే స్టీరింగ్‌ కదలికపై ప్రభావం పడే అవకాశం ఉన్నందున ముందుజాగ్రత్త చర్యగా రీకాల్‌ చేపట్టినట్లు కంపెనీ తెలిపింది. అయితే ఈ సమస్యకు సంబంధించి 2026 సెప్టెంబర్‌ 30 నాటికి భారత్‌లో ఎలాంటి ఘటనలు నమోదుకాలేదని హోండా పేర్కొంది. అయినప్పటికీ వినియోగదారుల భద్రతను దృష్టిలో పెట్టుకుని ప్రభావిత బైక్‌లలో హ్యాండిల్‌-లాక్‌ ఫిక్సింగ్‌ స్క్రూను ఉచితంగా మార్చనుంది. బైక్‌ వారంటీలో ఉన్నా లేకపోయినా ఈ రీకాల్‌ సర్వీస్‌ ఉచితంగానే అందించనుంది.
నవంబర్‌ నుంచి రీకాల్‌ సర్వీస్‌
ఈ రీకాల్‌ క్యాంపెయిన్‌ 2026 నవంబర్‌ మొదటి వారంలో అధీకృత హోండా BigWing డీలర్‌షిప్‌ల వద్ద ప్రారంభం కానుంది. ప్రభావిత బైక్‌ల యజమానులను హోండా ఫోన్‌ కాల్స్‌, SMS, ఇమెయిల్‌ ద్వారా సంప్రదించనుంది. డీలర్‌షిప్‌ యజమానులతో మాట్లాడి సర్వీస్‌ అపాయింట్‌మెంట్‌ను షెడ్యూల్‌ చేస్తుంది.
మీ బైక్‌ రీకాల్‌ పరిధిలో ఉందో ఇలా తెలుసుకోండి
మీ వద్ద Honda Rebel 500 ఉంటే.. మీ బైక్‌ ఈ రీకాల్‌ పరిధిలో ఉందో లేదో ఆన్‌లైన్‌లో చెక్‌ చేసుకోవచ్చు. ఇందుకోసం హోండా అధికారిక వెబ్‌సైట్‌లోని Recall Campaign విభాగంలోకి వెళ్లి మీ బైక్‌ 17 అంకెల VIN/Chassis Number నమోదు చేయాలి. బైక్‌ రీకాల్‌ పరిధిలో ఉంటే అక్కడ సమాచారం కనిపిస్తుంది. రీకాల్‌ పరిధిలో ఉన్న బైక్‌ యజమానులు సమీపంలోని Honda BigWing డీలర్‌షిప్‌ను సంప్రదించి అపాయింట్‌మెంట్‌ తీసుకోవాలని కంపెనీ సూచిస్తోంది. ఈ రీకాల్‌లో భాగంగా చేయాల్సిన మార్పుకు ఎలాంటి ఛార్జీ ఉండదు.