BYD Atto 8 EV: ఎలక్ట్రిక్ కార్లు కొనాలనుకునే వారిని ఎక్కువగా వేధించే సమస్యలు రేంజ్, ఛార్జింగ్ సమయం. అయితే ఈ సమస్యలకు పరిష్కారం చూపేలా చైనా ఆటోమొబైల్ కంపెనీ BYD సరికొత్త ఎలక్ట్రిక్ SUVను పరిచయం చేసింది. BYD Atto 8 పేరుతో పేర్కొన్న ఈ 7 సీటర్ ఎలక్ట్రిక్ SUVలో అత్యంత వేగవంతమైన ఛార్జింగ్ టెక్నాలజీ, ఆకట్టుకునే డ్రైవింగ్ రేంజ్, శక్తివంతమైన మోటార్లు, లగ్జరీ ఫీచర్లతో వస్తోంది. ఫ్లాష్ ఛార్జింగ్ టెక్నాలజీతో ఈ కారును 10 శాతం నుంచి 97 శాతం వరకు సుమారు 9 నిమిషాల్లో ఛార్జ్ చేయవచ్చని కంపెనీ పేర్కొన్నది. అయితే ఈ ఛార్జింగ్ వేగం ప్రత్యేక ఫ్లాష్ ఛార్జర్‌తోనే సాధ్యమవుతుంది. సాధారణ ఛార్జర్‌తో ఇంత వేగంగా ఛార్జింగ్ సాధ్యం కాదు.
BYD Atto 8 బ్యాటరీ, రేంజ్ వివరాలు
ఈ ఎలక్ట్రిక్ SUVలో 115kWh సామర్థ్యం కలిగిన రెండో తరం LFP బ్లేడ్ బ్యాటరీని అందించినట్లు సమాచారం. ఈ బ్యాటరీతో పాటు e-Platform 3.0 Evo ప్లాట్‌ఫామ్, Cell-to-Body (CTB) టెక్నాలజీని ఉపయోగించినట్లు పేర్కొన్నారు. ఈ నిర్మాణం వాహనం బాడీ, బ్యాటరీ వ్యవస్థ మధ్య సమన్వయాన్ని మెరుగుపరచడంలో సహాయపడుతుంది. రేంజ్, పవర్ విషయానికి వస్తే ఈ SUV రెండు వేరియంట్లలో అందుబాటులోకి వచ్చే అవకాశం ఉంది.
RWD వేరియంట్: 448 bhp పవర్, ఒక్కసారి ఛార్జ్ చేస్తే 651 కిలోమీటర్ల వరకు రేంజ్.
AWD వేరియంట్: 754 bhp పవర్, ఒక్కసారి ఛార్జ్ చేస్తే 602 కిలోమీటర్ల వరకు రేంజ్.
4.6 సెకన్లలో 100 కి.మీ. వేగం
పనితీరుకు ప్రాధాన్యత ఇచ్చే వారికి BYD Atto 8 AWD వేరియంట్ ఆసక్తికరంగా ఉండనుంది. ఈ వేరియంట్ కేవలం 4.6 సెకన్లలో గంటకు 0 నుంచి 100 కిలోమీటర్ల వేగాన్ని అందుకోగలదని సమాచారం. 754 bhp పవర్‌తో వేగవంతమైన యాక్సిలరేషన్‌ను అందించే సామర్థ్యం దీనికి ఉంది.
కేవలం 9 నిమిషాల్లో 97 శాతం ఛార్జింగ్!
ఈ SUVలో ప్రధాన ఆకర్షణ ఫ్లాష్ ఛార్జింగ్ టెక్నాలజీ. అందుబాటులో ఉన్న వివరాల ప్రకారం.. 10% నుంచి 70% ఛార్జింగ్‌కు సుమారు 5 నిమిషాలు. 10% నుంచి 97% ఛార్జింగ్‌కు సుమారు 9 నిమిషాలు. మైనస్ 30 డిగ్రీల సెల్సియస్ ఉష్ణోగ్రతలో సైతం 97% ఛార్జింగ్‌కు సుమారు 12 నిమిషాలు పడుతుందని పేర్కొన్నారు.
BYD Atto 8 సుమారు 5 మీటర్ల పొడవుతో మూడు వరుసల సీట్లను కలిగిన 7 సీటర్ SUVగా వస్తోంది. పెద్ద కుటుంబాలకు అనువుగా ఉండేలా క్యాబిన్‌లో ప్రీమియం ఫీచర్లను అందించినట్లు సమాచారం.
ప్రధాన ఫీచర్లు:
15.6 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్.
10.25 అంగుళాల డిజిటల్ ఇన్‌స్ట్రుమెంట్ క్లస్టర్.
26 అంగుళాల హెడ్-అప్ డిస్‌ప్లే.
14-వే ఎలక్ట్రిక్ అడ్జస్ట్‌మెంట్‌తో కూడిన సీట్లు.
సీట్లకు హీటింగ్, వెంటిలేషన్, మసాజ్ సదుపాయాలు.
పనోరమిక్ సన్‌రూఫ్.
21-స్పీకర్ ఆడియో సిస్టమ్.
128 రంగులతో యాంబియంట్ లైటింగ్.
మెరుగైన రైడ్ కంఫర్ట్ కోసం DiSus-C ఇంటెలిజెంట్ డ్యాంపింగ్ సస్పెన్షన్.