YCP Leader Nagabhushanam Arrested In Red Sandal Smuggling: ‘పుష్ప’ సినిమా తరహాలోనే ఎర్రచందనాన్ని స్మగ్లింగ్ చేయాలని చూసిన వైసీపీ నేత ఒకరు అడ్డంగా దొరికిపోయారు. ఈ స్మగ్లింగ్ విషయం తెలుసుకున్న పోలీసులు.. కాపు కాచి రెడ్ హ్యాండెడ్‌గా పట్టుకున్నారు. ఆ నేతతో పాటు మరో ఎనిమిది మందిని సైతం అరెస్ట్ చేశారు. ఆ నేత పేరు నాగభూషణం. చంద్రగిరి మండలం, అరిగెలవారిపల్లెకు చెందిన ఆయన.. కడప జిల్లా, ఒంటిమిట్ట మండలం, సర్వకాటపల్లి గ్రామం, యల్లాపుల్లల బావికొండల్లో ఎర్రచందనాన్ని అక్రమంగా రవాణా చేస్తున్నాడు. సమాచారం తెలుసుకున్న పోలీసులు, ఆ నేతను అరెస్ట్ చేశారు. ఆ నేతతో పాటు మరో ఎనిమిది మందిని అదుపులోకి తీసుకున్న పోలీసులు.. 49 ఎర్రచందనం దుంగలు, రెండు కార్లు, రెండు బైకులను స్వాధీనం చేసుకున్నారు. స్మగ్లర్లను కడప సబ్ జైలుకు తరలించారు.
ఈమధ్య ఎర్రచందనం స్మగ్లింగ్ వ్యవహారాలు ఆంధ్రప్రదేశ్‌లో తరచూ వెలుగు చూస్తున్నాయి. కొన్ని రోజుల క్రితమే.. కడప జిల్లా గోపవరం మండలం బ్రాహ్మణపల్లి అటవీ ప్రాంతంలో ఆరుగురు స్మగ్లర్లను పోలీసులు అరెస్ట్ చేశారు. వారి వద్ద నుంచి 26 ఎర్రచందనం దుంగలు, కారును స్వాధీనం చేసుకున్నారు. అంతకుముందు కూడా సినీ ఫక్కీలో స్మగ్లర్లు పోలీసుల ముందు నుంచే తరలించే ప్రయత్నం చేసిన ఘటన వెలుగు చూసింది. పోలీసులు తనిఖీ చేస్తున్న సమయంలో.. గంగాధర నెల్లూరు మండలం ముష్టిపల్లి వద్ద రోడ్డుపై ఒక ఆగి ఉన్న వాహనం కనిపించింది. రిపేర్ వచ్చిందేమో సహాయం చేద్దామని దగ్గరికి వెళ్లి చూస్తే.. లోపల ఎర్రచందనం దుంగలు కనిపించాయి. స్మగ్లర్లు పారిపోయేందుకు ప్రయత్నించారు కానీ, వారిని చేజ్ చేసి పట్టుకున్నారు. రెండు వాహనాలను, 30 ఎర్రచందనం దుంగలను స్వాధీనం చేసుకున్నారు.
