VMC Contractors Strike: విజయవాడ మున్సిపల్ కార్పొరేషన్ (వీఎంసీ) పరిధిలో బకాయిల చెల్లింపుల కోసం సమ్మె చేపట్టిన మున్సిపల్ కాంట్రాక్టర్లు ఆందోళన విరమించారు. బకాయి ఉన్న సుమారు రూ.350 కోట్లను చెల్లిస్తామని మంత్రి నారాయణ, వీఎంసీ కమిషనర్ హామీ ఇవ్వడంతో కాంట్రాక్టర్లు సమ్మెను విరమిస్తున్నట్లు ప్రకటించారు. ప్రస్తుతం రూ.50 కోట్లు చెల్లిస్తామని మంత్రి నారాయణ హామీ ఇచ్చారు. మిగిలిన బకాయిలను కూడా విడతల వారీగా చెల్లిస్తామని అధికారులు స్పష్టం చేశారు. వచ్చే ఏడాది జూన్ నాటికి బకాయిలన్నింటినీ చెల్లించేలా చర్యలు తీసుకుంటామని వీఎంసీ కమిషనర్ హామీ ఇచ్చారు. అలాగే TREDS ద్వారా, బ్యాంకు రుణాల సహకారంతో కాంట్రాక్టర్లకు బకాయిలను చెల్లించేందుకు చర్యలు తీసుకుంటామని మంత్రి, అధికారులు తెలిపారు. బకాయిల చెల్లింపుపై స్పష్టమైన హామీ లభించడంతో కాంట్రాక్టర్లు తమ సమ్మెను విరమించారు.