Vijayawada CI Ali Death Case: సీఐ అలీ మృతి కేసులో కీలక పరిణామం.. కానిస్టేబుల్ ఫిర్యాదుతో..!

Vijayawada CI Ali Death Case: విజయవాడలో సీఐ అలీ మృతి కేసులో కీలక పరిణామం చోటుచేసుకుంది. అలీ అనుమానాస్పద, అసహజ స్థితిలో మృతి చెందినట్లు సత్యనారాయణపురం పోలీసులు కేసు నమోదు చేసి దర్యాప్తు ప్రారంభించారు. కానిస్టేబుల్ సుధాకర్ ఇచ్చిన ఫిర్యాదు ప్రకారం.. సచివాలయ ఉద్యోగులు నిర్వహించిన నిరసన సమయంలో సీఐ అలీని వారు నెట్టుకుంటూ వెళ్లడంతో ఆయన కిందపడిపోయారని పేర్కొన్నారు. కిందపడిన అనంతరం అలీకి శ్వాస తీసుకోవడంలో ఇబ్బందులు ఏర్పడ్డాయని కానిస్టేబుల్ తన ఫిర్యాదులో తెలిపారు. ఆ తర్వాత అలీకి హార్ట్ స్ట్రోక్ వచ్చినట్లు కానిస్టేబుల్ సుధాకర్ ఫిర్యాదు చేసినట్లు సమాచారం. ఈ ఘటనకు సంబంధించిన పరిస్థితులు, అలీ మృతికి దారితీసిన కారణాలపై సత్యనారాయణపురం పోలీసులు దర్యాప్తు చేస్తున్నారు. కేసు నమోదు చేసి ఘటనకు సంబంధించిన వివరాలను సేకరిస్తున్నారు..

కాగా, స్వర్ణ గ్రామ, స్వర్ణ వార్డు సచివాలయ ఉద్యోగులు బెజవాడలో నిర్వహించిన ఆందోళనల్లో విషాద ఘటన చోటు చేసుకున్న విషయం విదితమే.. విధుల్లో ఉన్న సర్కిల్‌ ఇన్‌స్పెక్టర్‌ షేక్‌ అహ్మద్‌ అలీ (54) గుండెపోటుతో మరణించారు.. ఆందోళన నేపథ్యంలో ఆదివారం ఉదయం 6 గంటల నుంచే పోలీసు బందోబస్తు ఏర్పాటు చేయగా.. ధర్నాచౌక్‌, అలంకార్‌ సెంటర్‌లో విధులు నిర్వర్తిస్తున్న అలీకి గుండెలో స్వల్ప నొప్పి రాగా.. వెంటనే సూర్యారావుపేటలోని ఓ ఆస్పత్రికి వెళ్లారు.. అయితే, కాసేపటి తర్వాత బాగానే ఉందంటూ మళ్లీ బందోబస్తుకు వచ్చారు.. కానీ, అలంకార్‌ సెంటర్‌లో నిలబడిన 10 నిమిషాలకు మళ్లీ అస్వస్థతకు గురుకావడం.. ఆ వెంటనే జీపులో మరో ఆస్పత్రికి తరలించేలోగానే ఆయన స్పృహ కోల్పోయారు. ఇక, మెరుగైన చికిత్స కోసం ఆంధ్రా హార్ట్‌ అండ్‌ బ్రెయిన్‌ హాస్పిటల్‌కు తరలించారు. సీపీఆర్‌ చేసినా శరీరంలో కదలిక లేకపోవడంతో.. అలీ మృతిచెందినట్లు వైద్యులు ప్రకటించారు.. అయితే, ఇప్పుడు కానిస్టేబుల్‌ సుధాకర్‌ ఫిర్యాదుతో ఈ కేసులో కీలక పరిణామం చోటు చేసుకుంది..