Dharmana Prasada Rao: స్థానిక సంస్థల ఎన్నికల్లో బీసీలకు 34 శాతం రిజర్వేషన్లపై ఏపీ హైకోర్టు సంచలన తీర్పు వెలువరించింది.. అయితే స్థానిక సంస్థల ఎన్నికల్లో బీసీలకు 34 శాతం రిజర్వేషన్ల అంశంపై మాజీ మంత్రి, వైసీపీ నేత ధర్మాన ప్రసాదరావు కీలక వ్యాఖ్యలు చేశారు. బీసీ రిజర్వేషన్లు 50 శాతానికి మించకూడదన్న గత న్యాయ తీర్పుల నేపథ్యంలో 34 శాతం రిజర్వేషన్ల జీవోలు కొట్టివేయబడతాయని తాము ముందే చెప్పామని ఆయన అన్నారు. అన్ని విషయాలు తెలిసి కూడా బీసీలను మభ్యపెట్టడం ఎందుకని ధర్మాన ప్రశ్నించారు. 34 శాతం రిజర్వేషన్లు ఇవ్వాలనే ఉద్దేశం ఉంటే వాటిని చట్టబద్ధంగా అమలు చేయాలని, కేవలం ప్రకటనలు చేయడం కాకుండా బీసీలకు ప్రయోజనం చేకూర్చే విధంగా చర్యలు తీసుకోవాలని అన్నారు. స్థానిక సంస్థల ఎన్నికలు సమీపిస్తున్న నేపథ్యంలో ప్రభుత్వం తన చిత్తశుద్ధిని నిరూపించుకోవాలని డిమాండ్ చేశారు.
వైసీపీ ప్రభుత్వ హయాంలో బీసీలకు వివిధ పదవుల్లో ప్రాధాన్యం కల్పించామని ధర్మాన పేర్కొన్నారు. అప్పటి ముఖ్యమంత్రి జగన్ 13 మేయర్ పదవుల్లో 9 పదవులను బీసీలకు కేటాయించారని, 13 జిల్లా పరిషత్‌లలో ఆరుగురిని జెడ్పీ చైర్మన్లుగా నియమించారని చెప్పారు. అలాగే 11 రాజ్యసభ స్థానాల్లో నాలుగు స్థానాలను బీసీలకు ఇచ్చామని, తొమ్మిది మంది బీసీలను మంత్రులుగా నియమించామని తెలిపారు. కేవలం ప్రకటనలు చేయడం కాకుండా పదవులు కేటాయించి బీసీలకు రాజకీయ ప్రాతినిధ్యం కల్పించామని ధర్మాన అన్నారు. రిజర్వేషన్ల జీవోలు కోర్టులో నిలవవని తెలిసే బీసీలతో పాలాభిషేకాలు చేయించుకోవడం సరికాదని విమర్శించారు.
బీసీలను చంద్రబాబు అసమర్థులుగా భావిస్తున్నారని ధర్మాన ఆరోపించారు. గవర్నర్‌, వైస్‌ ఛాన్సలర్‌ వంటి ఉన్నత పదవుల్లో బీసీలకు అవకాశం ఇవ్వలేదని విమర్శించారు. టీడీపీ ఎప్పుడూ బీసీల పార్టీ అని చెప్పుకుంటుందని, అయితే బీసీలకు వాస్తవంగా ఏం చేసిందో చూపించాలని ధర్మాన ప్రసాదరావు డిమాండ్ చేశారు. ఇదిలా ఉండగా, ఆంధ్రప్రదేశ్ హైకోర్టు ఇటీవల స్థానిక సంస్థల్లో బీసీలకు 34 శాతం రిజర్వేషన్లకు సంబంధించిన జీవోలను సవాలు చేసిన పిటిషన్లపై విచారణ చేపట్టింది. ప్రభుత్వం రిజర్వేషన్లకు ఆధారంగా ఉపయోగించిన గణాంకాలు, నిర్ణయ ప్రక్రియపై కోర్టు ప్రశ్నలు లేవనెత్తింది.
