ఉద్యోగుల బకాయి జీతాలపై చర్చించిన ఏపీ మంత్రులు…

రాష్ట్రంలోని చెక్కర కర్మాగారాల నిర్వాహణ , పునరుద్ధరణ అంశాలపై ఏపీ గ్రూప్ ఆఫ్ మినిస్టర్స్ సమావేశమయ్యారు. దీనికి కురసాల కన్నబాబు , బొత్స సత్యనారాయణ , మేకపాటి గౌతమ్ రెడ్డి, అధికారులు హాజరయ్యారు. వర్చువల్ గా చెరకు ఫ్యాక్టరీలు, రైతుల సమస్యలపై మంత్రివర్గ ఉపసంఘం భేటీ అయ్యింది. చెరకు రైతులు, చక్కెర ఫ్యాక్టరీల ఉద్యోగుల జీతాల బకాయిలపై ప్రత్యేకంగా చర్చించారు మంత్రులు. విజయదశమికి చెరకు రైతులు, చక్కెర ఫ్యాక్టరీలలోని ఉద్యోగుల జీతాల చెల్లింపులకు ప్రభుత్వం కసరత్తు చేస్తుంది అని మంత్రులు తెలిపారు. ముఖ్యమంత్రితో సమావేశమైన తర్వాత అన్నింటిపై స్పష్టత తీసుకురావాలన్న యోచనలో మంత్రులు ఉన్నారు.

ఇక టెండర్ అనంతరం , అక్టోబర్ 5 తర్వాత మరో భేటీకి మంత్రుల నిర్ణయం తీసుకోనున్నారు. ఈ ఏడాదికి గానూ చోడవరం, తాండవ సహా పలు చక్కెర కర్మాగారాలకు సంబంధించిన బకాయిల మొత్తం రూ.70 కోట్లని వెల్లడించారు వ్యవసాయశాఖ మంత్రి కన్నబాబు. ఏటికొప్పాక, తాండవ ఫ్యాక్టరీల బకాయిల విలువే అత్యధికం..ఇప్పటికే రూ.72 కోట్లు చెల్లించినట్లు మంత్రులకు వివరించారు ప్రత్యేక ప్రధాన కార్యదర్శి పూనం మాలకొండయ్య. హైకోర్టు తీర్పుతో చెరకు రైతులకు మేలు జరిగిందన్నారు పరిశ్రమల శాఖ మంత్రి మేకపాటి.చక్కెర ధర పెరిగిన నేపథ్యంలో వీలైనంత త్వరగా అమ్మకాల ప్రక్రియ పూర్తి చేయాలన్న మంత్రి కన్నబాబు… చక్కెర అమ్మకాల మొత్తంలో రైతులకు చెల్లించటమే మొదటి ప్రాధాన్యత… తర్వాత ఉద్యోగులకు జీతాల బకాయిలను చెల్లించేందుకు నిర్ణయం తీసుకుంటామని… చోడవరం ఫ్యాక్టరీలోని చక్కెరను అమ్మితే రూ.100కోట్లకు పైనా వస్తాయనే అంచనాను వివరించారు మంత్రి కన్నబాబు. షుగర్స్ కమిషనర్ తో పాటు ఒక ఉన్నతాధికారిని ఏర్పాటు చేసి వేగంగా చక్కెర డిస్పోజల్ పూర్తి చేయాలని ఆదేశించారు బొత్స సత్యనారాయణ.