AP Rain Alert: ఏపీ ప్రజలకు అలర్ట్.. 4 రోజుల పాటు వర్షాలు.. పలు జిల్లాలకు పిడుగుల హెచ్చరిక

AP Rain Alert: ఆంధ్రప్రదేశ్‌లో ఈశాన్య రుతుపవనాల ప్రభావంతో రానున్న నాలుగు రోజుల పాటు చెదురుమదురుగా భారీ వర్షాలు కురిసే అవకాశం ఉందని రాష్ట్ర విపత్తుల నిర్వహణ సంస్థ వెల్లడించింది. రేపు రాష్ట్రవ్యాప్తంగా మేఘావృతమైన వాతావరణం ఉంటుందని, పలు ప్రాంతాల్లో పిడుగులతో కూడిన మోస్తరు వర్షాలు కురిసే అవకాశం ఉందని తెలిపింది. విజయనగరం, పార్వతీపురం మన్యం, అల్లూరి సీతారామరాజు, వైఎస్సార్ కడప, అన్నమయ్య, చిత్తూరు, తిరుపతి జిల్లాల్లో అక్కడక్కడ పిడుగులతో కూడిన మోస్తరు వర్షాలు కురిసే అవకాశం ఉందని పేర్కొంది.

ఇక, ఎల్లుండి అల్లూరి సీతారామరాజు, కృష్ణా, బాపట్ల, నెల్లూరు, వైఎస్సార్ కడప, చిత్తూరు జిల్లాల్లో పిడుగులతో కూడిన మోస్తరు వర్షాలు కురిసే అవకాశముందని తెలిపింది. మిగిలిన జిల్లాల్లో తేలికపాటి నుంచి మోస్తరు వర్షాలు పడవచ్చని అంచనా వేసింది.

తిరుపతి జిల్లాలో అత్యధిక వర్షపాతం
మరోవైపు.. గురువారం సాయంత్రం 5 గంటల నాటికి రాష్ట్రంలోని పలు ప్రాంతాల్లో గణనీయమైన వర్షపాతం నమోదైంది. తిరుపతి జిల్లా అలివేలుమంగాపురంలో అత్యధికంగా 87.5 మిల్లీమీటర్ల వర్షం కురిసింది. నెల్లూరు జిల్లా దగదర్తిలో 57.2 మి.మీ., కావలిలో 53.3 మి.మీ., చిత్తూరు అర్బన్‌లో 51.5 మి.మీ. వర్షపాతం నమోదైంది. తిరుపతి జిల్లా ఓబులవారిపల్లెలో 50.4 మి.మీ., పెన్నేపల్లిలో 45.7 మి.మీ., రేణిగుంటలో 41.2 మి.మీ., పుత్తూరులో 40.5 మి.మీ., నెల్లూరు జిల్లా నాయుడుపేటలో 38.4 మి.మీ. వర్షం కురిసినట్లు రాష్ట్ర విపత్తుల నిర్వహణ సంస్థ వెల్లడించింది. రానున్న రోజుల్లో వర్షాలు, పిడుగులు పడే అవకాశం ఉన్న నేపథ్యంలో ప్రజలు అప్రమత్తంగా ఉండాలని సూచించింది.