Met Gala 2026 : బంగారు కాళ్లతో మెరిసిన మోడల్.. ప్రాణాల మీదకు తెచ్చిన ఆ ఒక్క పొరపాటు.!

ప్రపంచవ్యాప్తంగా ఫ్యాషన్ ప్రియులు ఎంతగానో ఎదురుచూసే మెట్ గాలా 2026 వేడుకలు మే 4న న్యూయార్క్ నగరంలో అత్యంత వైభవంగా జరిగాయి. విభిన్నమైన ఆహార్యాలు, వింత ఆభరణాలతో సెలబ్రిటీలు రెడ్ కార్పెట్‌పై సందడి చేసినప్పటికీ, వారందరిలో ఒక మహిళ మాత్రం తన “బంగారు కాళ్లతో” అందరి దృష్టిని ఆకర్షించింది. ఆమె మరెవరో కాదు, ప్రముఖ మోడల్ లారెన్ వాసెర్. ప్రబల్ గురుంగ్ డిజైన్ చేసిన బంగారు రంగు సూట్ ధరించి, తన సిగ్నేచర్ గోల్డ్ ప్రొస్తెటిక్ కాళ్లతో మెరిసిన ఆమె, రెడ్ కార్పెట్‌పై “బంగారు కాళ్ల అమ్మాయి”గా గుర్తింపు పొంది సోషల్ మీడియాలో వైరల్ అయ్యారు.

ప్రస్తుతం 38 ఏళ్ల వయసున్న లారెన్ వాసెర్ అంతర్జాతీయ మోడలింగ్ రంగంలో అత్యంత విజయవంతమైన మహిళగా కొనసాగుతున్నారు. వోగ్, గ్లామర్ వంటి మేటి మ్యాగజైన్ల కవర్ పేజీలపై మెరిసిన ఆమె, ఫోర్బ్స్ ’30 అండర్ 30′ జాబితాలోనూ చోటు దక్కించుకున్నారు. అయితే ఆమె జీవితం 2012లో ఒక చిన్న పొరపాటు వల్ల ఊహించని మలుపు తిరిగింది. పీరియడ్స్ సమయంలో టాంపాన్ (Tampon) ఉపయోగించిన ఆమెకు, అది ప్రాణాంతకమైన టాక్సిక్ షాక్ సిండ్రోమ్ (TSS) సోకడానికి కారణమైంది. తన పడకగదిలో అపస్మారక స్థితిలో పడి ఉన్న ఆమెను ఆసుపత్రికి తరలించేసరికి మరణానికి కేవలం 10 నిమిషాల దూరంలో ఉన్నారు. అవయవాలు విఫలమవడంతో ఆమెను కోమాలోకి పంపాల్సి వచ్చింది, అంతేకాక ఆమె బతికే అవకాశం కేవలం ఒక శాతం మాత్రమే ఉందని వైద్యులు అప్పట్లో స్పష్టం చేశారు.

TSS ఇన్ఫెక్షన్ కారణంగా ఆమె కాళ్లు నల్లగా మారిపోవడంతో, ప్రాణాలను కాపాడటానికి వైద్యులు తొలుత ఆమె కుడి కాలును, ఆ తర్వాత 2018లో ఎడమ కాలును తొలగించాల్సి వచ్చింది. ఆ సమయంలో తీవ్రమైన నిరాశకు లోనైనప్పటికీ, తన తమ్ముడి కోసం బతకాలన్న సంకల్పంతో ఆమె తిరిగి పుంజుకున్నారు. ఈ చేదు అనుభవం తర్వాత లారెన్ కేవలం మోడల్‌గానే మిగిలిపోకుండా, మహిళల ఆరోగ్య భద్రత కోసం గళం ఎత్తుతున్నారు. పీరియడ్ ఉత్పత్తులలో ఉపయోగించే రసాయనాలు , సింథటిక్ ఫైబర్ల వల్ల కలిగే ఆరోగ్య ప్రమాదాలపై పరిశోధన చేయాలని కోరుతూ అమెరికాలో ‘రాబిన్ డేనియల్సన్ చట్టం’ కోసం ఆమె చురుగ్గా పోరాడుతున్నారు. టాంపాన్‌లను 4 నుండి 8 గంటల కంటే ఎక్కువ సమయం ఉపయోగించడం వల్ల ఈ ప్రమాదం పొంచి ఉంటుందని, ప్రతి ఒక్కరూ అప్రమత్తంగా ఉండాలని ఆమె తన కథనం ద్వారా హెచ్చరిస్తున్నారు.