Samsung గెలాక్సీ డబుల్ ధమాకా.. ఫోల్డబుల్ ఫోన్లు, స్మార్ట్ గ్లాసెస్ లాంచ్‌కు ముహూర్తం ఖరారు..

సంవత్సరం ప్రారంభంలో గెలాక్సీ S26 సిరీస్‌ను విడుదల చేసిన శాంసంగ్, ఇప్పుడు లండన్‌లో జూలై 22న జరగనున్న రెండవ గెలాక్సీ అన్‌ప్యాక్డ్ ఈవెంట్ కు సిద్ధమైంది. ఈ వేడుకలో కొత్త ఫోల్డబుల్ ఫోన్లు, స్మార్ట్ గ్లాసెస్, స్మార్ట్‌వాచ్‌లు విడుదల కానున్నాయి.

ఎక్కడ చూడవచ్చు..?
లండన్‌లో జూలై 22 మధ్యాహ్నం 2 గంటలకు (భారత కాలమానం ప్రకారం సాయంత్రం 6:30 గంటలకు) ప్రారంభమయ్యే ఈ ఈవెంట్‌ను శాంసంగ్ అధికారిక వెబ్‌సైట్, యూట్యూబ్ ఛానెల్‌లో లైవ్ స్ట్రీమింగ్ ద్వారా వీక్షించవచ్చు. ఈ ఈవెంట్‌లో ప్రధానంగా శాంసంగ్ గెలాక్సీ Z ఫోల్డ్ 8 సిరీస్ (మొదటి వైడ్-ఫోల్డింగ్ ఫోన్), Z ఫోల్డ్ 8 అల్ట్రా, Z ఫ్లిప్ 8 ఫోన్లు; అలాగే గెలాక్సీ వాచ్ 9, వాచ్ అల్ట్రా 2, కంపెనీ మొట్టమొదటి స్మార్ట్ గ్లాసెస్ విడుదలయ్యే అవకాశం ఉంది.

ఫోల్డబుల్ ఫోన్ల అంచనాలు..
Z ఫోల్డ్ 8 అనేది శాంసంగ్ మొదటి వైడ్-ఫోల్డింగ్ ఫోన్. ఇది బయట 5.5-అంగుళాల, లోపల 7.6-అంగుళాల QHD+ AMOLED డిస్‌ప్లేలు, డ్యూయల్ రియర్ కెమెరా సెటప్‌తో రానుంది. Z ఫోల్డ్ 7 కు కొనసాగింపుగా రానున్న Z ఫోల్డ్ 8 అల్ట్రా, బయట 6.5 అంగుళాలు, లోపల 8 అంగుళాల డిస్‌ప్లేలతో, ట్రిపుల్ కెమెరాతో రావచ్చు. ఈ రెండు ఫోన్లు పవర్‌ఫుల్ ‘స్నాప్‌డ్రాగన్ 8 ఎలైట్ జెన్ 5’ ప్రాసెసర్ తో పాటు కొత్త ‘ఫ్లెక్స్ టైటానియం’ డిస్‌ప్లే టెక్నాలజీతో వస్తాయని అంచనా.

గెలాక్సీ Z ఫ్లిప్ 8: ఈ క్లామ్‌షెల్ ఫోన్ బయట 4.1 అంగుళాల స్క్రీన్, లోపల 6.9-అంగుళాల AMOLED డిస్‌ప్లేను కలిగి ఉంటుంది. ఇందులో 50MP మెయిన్, 12MP అల్ట్రావైడ్ కెమెరాలతో కూడిన డ్యూయల్ సెటప్, 4300mAh బ్యాటరీ ఉంటాయి. కొన్ని దేశాల్లో ఎక్సినోస్ 2600 ప్రాసెసర్‌తో ఇది రావచ్చు.

గెలాక్సీ వాచ్ 9 క్రీమ్, గ్రీన్, గ్రాఫైట్ రంగులలో (40mm, 44mm సైజులు), వాచ్ అల్ట్రా 2 సింగిల్ 47mm సైజులో (గ్రే, సిల్వర్ రంగులు) వస్తాయని లీక్‌ల ద్వారా తెలిసింది. వార్బీ పార్కర్, జెంటిల్ మాన్‌స్టర్ భాగస్వామ్యంతో తయారైన శాంసంగ్ మొట్టమొదటి స్మార్ట్ గ్లాసెస్ కూడా ఈ ఈవెంట్‌లో ఆవిష్కృతం కానున్నాయి. మొత్తంగా చూస్తే.. సరికొత్త టెక్నాలజీలతో శాంసంగ్ మరోసారి టెక్ ప్రపంచాన్ని ఆకర్షించేందుకు సిద్ధంగా ఉంది.