Nokia 300 Charge: నోకియా 300 Charge ఫీచర్ ఫోన్ వచ్చేసింది.. 10W రివర్స్ ఛార్జింగ్, 3,700mAh బ్యాటరీతో!

Nokia 300 Charge Feature Phone Launched: ఫీచర్ ఫోన్ మార్కెట్లో ప్రత్యేక గుర్తింపు ఉన్న HMD మరో కొత్త నోకియా ఫీచర్ ఫోన్‌ను విడుదల చేసింది. Nokia 300 Charge పేరుతో వచ్చిన ఈ ఫోన్ ప్రత్యేకంగా భారీ బ్యాటరీ, దృఢమైన డిజైన్, రివర్స్ ఛార్జింగ్ ఫీచర్‌తో ఆకట్టుకుంటోంది. సాధారణ ఫీచర్ ఫోన్లలో కనిపించే బ్యాటరీలతో పోలిస్తే ఇందులో చాలా పెద్ద 3,700mAh బ్యాటరీను అందించారు. అంతేకాకుండా ఫోన్‌ను పవర్ బ్యాంక్‌లా ఉపయోగించుకునేందుకు 10W రివర్స్ ఛార్జింగ్ సదుపాయం కూడా ఉంది.

Nokia 300 Charge ధర ఎంత?

Nokia 300 Chargeను ప్రస్తుతం ఫిలిప్పీన్స్ మార్కెట్లో విడుదల చేశారు. అక్కడ దీని ధర PHP 2,190, భారత కరెన్సీలో సుమారు రూ.3,400గా ఉంటుంది. ఈ ఫోన్ మూడు రంగుల్లో అందుబాటులో ఉంది. Green, Sandstone, Black. అయితే భారత్‌తో పాటు ఇతర అంతర్జాతీయ మార్కెట్లలో Nokia 300 Charge విడుదలపై HMD ఇప్పటివరకు ఎలాంటి అధికారిక సమాచారం వెల్లడించలేదు.

3,700mAh భారీ బ్యాటరీ

Nokia 300 Chargeలో ప్రధాన ఆకర్షణ 3,700mAh బ్యాటరీ. సాధారణ ఫీచర్ ఫోన్లలో కనిపించే బ్యాటరీ సామర్థ్యంతో పోలిస్తే ఇది చాలా ఎక్కువ. HMD ప్రకారం, ఇందులోని రిమూవబుల్ బ్యాటరీ 40 రోజుల వరకు స్టాండ్‌బై టైమ్ అందించగలదు. దీంతో తరచుగా ఛార్జింగ్ చేసుకునే అవసరం తగ్గుతుంది. ప్రయాణాలు, అత్యవసర పరిస్థితులు, ఎక్కువ రోజులు ఫోన్‌ను ఉపయోగించాల్సిన సందర్భాల్లో ఈ భారీ బ్యాటరీ ఉపయోగపడే అవకాశం ఉంది.

రివర్స్ ఛార్జింగ్‌తో పవర్ బ్యాంక్‌లా..

Nokia 300 Chargeలో ప్రత్యేకంగా రివర్స్ ఛార్జింగ్ బటన్ ను అందించారు. ఫోన్ కుడివైపు ఉన్న ఫిజికల్ బటన్‌ను ఉపయోగించి ఈ ఫీచర్‌ను యాక్టివేట్ చేయవచ్చు. USB Type-C పోర్ట్ ద్వారా 10W రివర్స్ ఛార్జింగ్ సపోర్ట్ లభిస్తుంది. అంటే అవసరమైనప్పుడు Nokia 300 Charge బ్యాటరీని ఉపయోగించి ఇతర పరికరాలకు పవర్ అందించవచ్చు.

పైన ప్రత్యేక టార్చ్

ఫోన్ పైభాగంలో ప్రత్యేకమైన టార్చ్ లైట్ ను అందించారు. ఇది సాధారణ కెమెరా LED ఫ్లాష్ కాదని HMD స్పష్టం చేసింది. చీకటిలో దారి చూసుకోవడానికి ప్రత్యేక టార్చ్ ఉపయోగపడుతుంది. ఫీచర్ ఫోన్ వినియోగదారులను దృష్టిలో పెట్టుకుని ఈ ఫీచర్‌ను అందించినట్లు తెలుస్తోంది.

2.4 అంగుళాల QVGA డిస్‌ప్లే

Nokia 300 Chargeలో 2.4 అంగుళాల QVGA డిస్‌ప్లే ఉంది. టచ్‌స్క్రీన్‌కు బదులుగా ఫిజికల్ కీప్యాడ్‌తో ఫోన్‌ను ఉపయోగించుకోవచ్చు. ఫోన్ దృఢమైన డిజైన్‌ను కలిగి ఉంది. దీని కొలతలు 136.55 × 55 × 14.94mm, బరువు సుమారు 138 గ్రాములు.

Unisoc చిప్‌సెట్, S30+ సాఫ్ట్‌వేర్

పనితీరు కోసం Nokia 300 Chargeలో Unisoc SC6531E చిప్‌సెట్ ను ఉపయోగించారు. ఈ ఫోన్ HMD S30+ సాఫ్ట్‌వేర్ పై పనిచేస్తుంది. RAM, స్టోరేజ్ విషయానికి వస్తే 4MB RAM, 4MB ఇంటర్నల్ స్టోరేజ్ ఉన్నాయి. అయితే microSD కార్డు ద్వారా స్టోరేజ్‌ను 32GB వరకు విస్తరించుకునే అవకాశం ఉంది.

HMD నుంచి కొత్త ఫీచర్ ఫోన్లు

HMD ఇటీవల నోకియా బ్రాండ్‌లో పలు కొత్త ఫీచర్ ఫోన్లను కూడా పరిచయం చేసింది. వాటిలో Nokia 235 4G, Nokia 215 4G, Nokia 210 4G, Nokia 200 4G వంటి మోడళ్లు ఉన్నాయి. ఈ ఫోన్లలో కొన్ని మోడళ్లలో AI ఆధారిత ఫీచర్లను కూడా అందించారు. ముఖ్యంగా వాయిస్ కమాండ్ల ద్వారా వివిధ ఫీచర్లను యాక్సెస్ చేసుకునేందుకు ప్రత్యేక AI Assistant Buttonను అందించారు.