iPhone: ఐఫోన్ లవర్స్‌కు బిగ్ షాక్.. భారీగా పెరగనున్న ఐఫోన్ ధరలు..

ప్రీమియం స్మార్ట్‌ఫోన్ల మార్కెట్‌లో రారాజుగా వెలుగుతున్న యాపిల్ ఐఫోన్ (iPhone) ప్రియులకు బ్యాడ్ న్యూస్ అనే చెప్పాలి. ఇప్పటి వరకు ఆకర్షణీయమైన డిస్కౌంట్లు, క్యాష్‌బ్యాక్ ఆఫర్లతో వినియోగదారులను ఊరించిన పాత తరం ఐఫోన్ మోడళ్ల ధరలు ఇప్పుడు భారతీయ మార్కెట్‌లో పెరిగే అవకాశాలు ఎక్కువగా ఉన్నాయి.

సాధారణంగా యాపిల్ సంస్థ తన ఆఫ్‌లైన్ రిటైల్ పార్ట్‌నర్ల కోసం ప్రత్యేకమైన ప్రోత్సాహక కార్యక్రమాలను నిర్వహిస్తుంటుంది. దీని వల్ల రిటైలర్లు కస్టమర్లకు భారీ క్యాష్‌బ్యాక్ ఆఫర్లు, ప్రమోషనల్ డిస్కౌంట్లు ఇవ్వడానికి అవకాశం ఉండేది. అయితే.. తాజా నివేదికల ప్రకారం.. యాపిల్ ఈ ప్రోత్సాహక కార్యక్రమాన్ని నిలిపివేసింది. ఫలితంగా రిటైలర్లకు వచ్చే మార్జిన్లు తగ్గడంతో.. వారు గతంలో ఇచ్చినంత స్థాయిలో డిస్కౌంట్లు ఇవ్వలేరు. ఇది పరోక్షంగా ఫోన్ల అసలు ధర పెరగడానికి కారణమవుతోంది.

రూ. 5,000 వరకు భారం..

ముఖ్యంగా ఐఫోన్ 15 , ఐఫోన్ 16 సిరీస్ వంటి పాపులర్ మోడళ్లపై ఈ ప్రభావం స్పష్టంగా కనిపిస్తోంది. ప్రోత్సాహకాలు నిలిపివేయడంతో.. ఐఫోన్ల ధరలు దాదాపు రూ. 5,000 వరకు పెరిగే అవకాశం ఉందని మార్కెట్ వర్గాలు అంచనా వేస్తున్నాయి. ఐఫోన్ 16 లాంచ్ అయిన తర్వాత పాత మోడల్స్ ధరలు తగ్గుతాయని ఆశించిన కస్టమర్లకు ఇది నిజంగా పెద్ద షాక్ అని చెప్పవచ్చు. ఈ ధరల పెరుగుదల వల్ల బడ్జెట్ ప్లాన్ చేసుకున్న మధ్యతరగతి ఐఫోన్ లవర్స్‌కు ఇబ్బందులు తప్పవు.

మార్కెట్ ప్రభావం..

యాపిల్ ఈ నిర్ణయం తీసుకోవడం వెనుక ఉన్న ప్రధాన ఉద్దేశం తన లాభాలను పెంచుకోవడం కావచ్చు. అయితే.. ఆఫ్‌లైన్ స్టోర్లలో డిస్కౌంట్లు లేకపోవడం వల్ల కస్టమర్లు ఆన్‌లైన్ ప్లాట్‌ఫామ్స్ (Flipkart, Amazon) వైపు మళ్లే అవకాశం ఉంది. మరోవైపు, కొత్త మోడళ్లు కొనాలనుకునే వారి సంఖ్యపై కూడా ఇది ప్రభావం చూపుతుంది. రిటైలర్లు గతంలో ఉన్న డిమాండ్‌ను కొనసాగించడం కష్టతరమని భావిస్తున్నారు. పండగ సీజన్ ముగిసిన తర్వాతి కాలంలో ఇలాంటి మార్పులు రావడం ఐఫోన్ అమ్మకాలపై కొంత ప్రతికూల ప్రభావం చూపే అవకాశం ఉందని ఆర్థిక విశ్లేషకులు చెబుతున్నారు.