మీరు తరచుగా ఫోన్ పిన్ లేదా పాస్వర్డ్ మర్చిపోతుంటే ఇకపై మరింత జాగ్రత్తగా ఉండాల్సిందే. గూగుల్ తన కొత్త ఆపరేటింగ్ సిస్టమ్ ఆండ్రాయిడ్ 17లో లాక్ స్క్రీన్ భద్రతను మరింత కఠినతరం చేయనుంది. పదేపదే తప్పు పిన్ లేదా పాస్వర్డ్ నమోదు చేస్తే ఫోన్ ఎక్కువసేపు లాక్ అయ్యేలా కొత్త భద్రతా విధానాన్ని తీసుకురానుంది. ఆండ్రాయిడ్ కమ్యూనిటీ ఎంగేజ్మెంట్ మేనేజర్ మిషాల్ రెహమాన్ వెల్లడించిన వివరాల ప్రకారం, ఆండ్రాయిడ్ 17లో తప్పు పాస్వర్డ్ ప్రయత్నాలపై మరింత కఠినమైన పరిమితులు అమల్లోకి రానున్నాయి. దీంతో ఫోన్ను అనధికారికంగా అన్లాక్ చేయడానికి చేసే ప్రయత్నాలను అడ్డుకోవడం ప్రధాన లక్ష్యంగా గూగుల్ ఈ ఫీచర్ను తీసుకొస్తోంది.
ఎన్ని తప్పు ప్రయత్నాలకు ఎంతసేపు లాక్?
కొత్త ఆండ్రాయిడ్ 17లో పాస్వర్డ్ లేదా పిన్ను తప్పుగా నమోదు చేస్తే ఈ విధంగా లాకౌట్ అమల్లోకి వస్తుంది.
6 సార్లు తప్పు పాస్వర్డ్ – ఫోన్ 1 నిమిషం లాక్
7 సార్లు తప్పు పాస్వర్డ్ – 6 నిమిషాలు లాక్
8 సార్లు తప్పు పాస్వర్డ్ – 25 నిమిషాలు లాక్
12 సార్లు తప్పు పాస్వర్డ్ – 24 గంటలు లాక్
19 సార్లు తప్పు పాస్వర్డ్ – 5 సంవత్సరాల వరకు లాక్ అయ్యే అవకాశం
20 సార్లు తప్పు పాస్వర్డ్ – ఫోన్ శాశ్వతంగా లాక్ అయ్యే అవకాశం
పాత విధానంతో పోలిస్తే పెద్ద మార్పు
గతంలో ఆండ్రాయిడ్లో తప్పు పాస్వర్డ్ ప్రయత్నాలపై పరిమితులు అంత కఠినంగా ఉండేవి కాదు. ఒక నిమిషం, ఆరు నిమిషాలు, 25 నిమిషాలు, 24 గంటలు, చివరికి ఐదు సంవత్సరాల లాకౌట్ వంటి దశలకు చేరుకోవడానికి వందల నుంచి వేల వరకు తప్పు ప్రయత్నాలు అవసరమయ్యేవి. అయితే ఆండ్రాయిడ్ 17లో ఈ పరిమితిని గణనీయంగా తగ్గించడం వల్ల కొద్ది తప్పు ప్రయత్నాలకే ఫోన్ ఎక్కువసేపు లాక్ అయ్యే అవకాశం ఉంది.
కొత్తగా ‘డూప్లికేట్ గెస్ డిటెక్షన్’ ఫీచర్
యూజర్ల సౌకర్యాన్ని దృష్టిలో ఉంచుకుని గూగుల్ మరో కొత్త ఫీచర్ను కూడా అందిస్తోంది. డూప్లికేట్ గెస్ డిటెక్షన్ అనే ఈ ఫీచర్ వల్ల ఒకే తప్పు పాస్వర్డ్ను పదేపదే నమోదు చేసినా ప్రతి ప్రయత్నాన్ని విడిగా లెక్కించదు. అంటే పొరపాటున అదే తప్పు పిన్ను వరుసగా మళ్లీ నమోదు చేసిన సందర్భాల్లో అనవసరంగా లాకౌట్ వేగంగా పెరగకుండా ఈ ఫీచర్ సహాయపడుతుంది.
ఎప్పుడు విడుదల?
గూగుల్ ఇటీవల నిర్వహించిన Google I/O కార్యక్రమంలో ఆండ్రాయిడ్ 17ను పరిచయం చేసింది. ప్రస్తుతం దీని బీటా వెర్షన్ గూగుల్ పిక్సెల్ స్మార్ట్ఫోన్లకు అందుబాటులో ఉంది. పూర్తి స్థాయి వెర్షన్ త్వరలో విడుదల కానుంది. అయితే ఈ ఫీచర్ తుది (స్టేబుల్) వెర్షన్లో ఇదే విధంగా అమల్లోకి వస్తుందా లేదా విడుదలకు ముందు గూగుల్ మార్పులు చేస్తుందా అనే విషయంపై అధికారిక ప్రకటన కోసం వేచి చూడాల్సి ఉంది.