World Cup 2011: అందుకే 2011 వరల్డ్ కప్‌లో రోహిత్ శర్మను తీసుకోలేదు.. ‘నన్ను క్షమించు’: శ్రీకాంత్
- రోహిత్ శర్మకు సారీ చెప్పానన్న మాజీ సెలెక్టర్ శ్రీకాంత్..
- 2011 వరల్డ్ కప్‌లో అతడిని తీసుకోలేకపోవడానికి కారణం వెల్లడి..
- Follow Us :
-
-
Add as a preferred
source on google
భారత క్రికెట్ జట్టు కెప్టెన్ రోహిత్ శర్మ నేడు ప్రపంచంలోనే అత్యుత్తమ బ్యాటర్లలో ఒకరు. తన నాయకత్వంలో భారత్‌కు ఎన్నో విజయాలు అందించిన రోహిత్ మనసులో ఒక తీరని కోరిక మాత్రం అలాగే ఉండిపోయింది. అదే 2011 వన్డే వరల్డ్ కప్ ఆడలేకపోవడం. అప్పట్లో ధోనీ నాయకత్వంలో భారత్ ప్రపంచకప్ గెలిచినప్పుడు రోహిత్ ఆ జట్టులో లేరు. ఆ సమయంలో జట్టు ఎంపిక చేసిన సెలెక్టర్లలో ఒకరైన మాజీ క్రికెటర్ కె. శ్రీకాంత్ ఇటీవల ఒక ఆసక్తికరమైన విషయాన్ని పంచుకున్నారు. రోహిత్‌ను జట్టులోకి తీసుకోనందుకు తాను స్వయంగా అతనికి క్షమాపణలు చెప్పానని శ్రీకాంత్ వెల్లడించారు.
మాజీ సెలెక్టర్ శ్రీకాంత్ ఒక పాడ్‌కాస్ట్‌లో మాట్లాడుతూ.. 2020లో తాను రోహిత్ శర్మను కలిసి సారీ చెప్పానని తెలిపారు. 2011 వరల్డ్ కప్ సమయంలో రోహిత్ చాలా మంచి ఫామ్‌లో ఉన్నాడని.. అతను జట్టులో ఉండటానికి అన్ని అర్హతలు ఉన్నాయని శ్రీకాంత్ ఒప్పుకున్నారు. కానీ.. ఆ సమయంలో సెలెక్టర్ల ఆలోచన మరోలా ఉందని ఆయన వివరించారు.
జట్టులో కేవలం బ్యాటింగ్ మాత్రమే చేసే ఆటగాళ్ల కంటే, బ్యాటింగ్ మరియు బౌలింగ్ రెండూ చేయగల ‘ఆల్ రౌండర్ల’కు ఎక్కువ ప్రాధాన్యత ఇవ్వాలని వారు నిర్ణయించుకున్నారు. 1983లో భారత్ వరల్డ్ కప్ గెలిచినప్పుడు కూడా జట్టులో చాలా మంది ఆల్ రౌండర్లు ఉండేవారని, అదే ఫార్ములాను 2011లో కూడా అనుసరించామని శ్రీకాంత్ చెప్పారు. ఆ కారణంగానే యువరాజ్ సింగ్ లాంటి ఆటగాళ్లు బ్యాటుతో పాటు బంతితోనూ మెరిసి ‘మ్యాన్ ఆఫ్ ది టోర్నమెంట్’ అయ్యారని ఆయన గుర్తు చేశారు.
“పాపం రోహిత్.. ఆ ఆల్ రౌండర్ల లెక్కల మధ్య అతను జట్టులో చోటు కోల్పోయాడు. ఇది కావాలని చేసిన పని కాదు. అప్పుడు ఎవరిని తీసేసి రోహిత్‌ను తీసుకోవాలనేది ఇప్పటికీ ఒక పెద్ద చర్చ. కానీ రోహిత్ మాత్రం ఆ బాధను ఎప్పుడూ తన ఇంటర్వ్యూలలో చెబుతూనే ఉంటాడు. అందుకే అతనికి ఎదురుగా వెళ్లి.. బాస్ నన్ను క్షమించు, అది కావాలని చేసింది కాదు అని చెప్పాను” అని శ్రీకాంత్ తెలిపారు.
రోహిత్ శర్మకు కూడా తన కెరీర్‌లో 2011 వరల్డ్ కప్ ఆడలేకపోవడం అతిపెద్ద లోటుగా మిగిలిపోయింది. ఆ కసితోనే 2015, 2019, 2023 వరల్డ్ కప్‌లలో రోహిత్ అద్భుతంగా రాణించారు. ఇప్పుడు 2027 వరల్డ్ కప్ కూడా ఆడాలనే పట్టుదలతో రోహిత్ ఉన్నారు. అప్పట్లో రోహిత్ కూడా మంచి ఆఫ్ స్పిన్ బౌలింగ్ చేసేవారు, కానీ వేలికి అయిన గాయం వల్ల తర్వాత బౌలింగ్‌కు దూరమయ్యారు. ఒకవేళ అప్పుడు రోహిత్ బౌలింగ్ కూడా బాగా చేసి ఉంటే.. ఆ ఆల్ రౌండర్ల కోటాలో కచ్చితంగా జట్టులో ఉండేవాడని శ్రీకాంత్ మాటలను బట్టి అర్థమవుతోంది.