(మే 8న నటుడు జయప్రకాశ్ రెడ్డి జయంతి)
విలక్షణమే జయప్రకాశ్ రెడ్డికి సలక్షణం అని చెప్పకతప్పదు. భారీకాయంతోనే నవ్వించారు, కవ్వించారు, జడిపించారు. పలు పాత్రల్లో పరకాయప్రవేశం చేసి మెప్పించారు. దాసరి నారాయణరావు, డి.రామానాయుడు ప్రోత్సాహంతో చిత్రసీమలో బిట్ రోల్స్ తో పరిచయమైన జయప్రకాశ్ రెడ్డి, సురేశ్ ప్రొడక్షన్స్ ‘ప్రేమించుకుందాం…రా’తో మెయిన్ విలన్ గా నటించారు. అందులో రాయలసీమ యాసతో జనాన్ని ఆకట్టుకున్నారు. అదే ఆయనను బాలకృష్ణ వంటి టాప్ స్టార్ నటించిన ‘సమరసింహారెడ్డి’లోనూ మెయిన్ విలన్ గా నటించేలా చేసింది. కొన్ని చిత్రాలలో విలన్ గా భయపెట్టిన జయప్రకాశ్ రెడ్డి, ‘నరసింహనాయుడు’లో కామెడీతోనూ అలరించారు. అప్పటి నుంచీ కామెడీ విలన్ గానూ పలు చిత్రాలలో ప్రత్యక్షమయ్యారు జయప్రకాశ్ రెడ్డి.
పంతులుగా పనిచేసిన జయప్రకాశ్ రెడ్డి, తమ్ముళ్లను చెల్లెళ్ళను పెంచి పెద్ద చేయడంలోనే సంపాదన కరిగిపోయింది. అయితే ఆయనకు ఉన్న నటనాభిలాషనే జయప్రకాశ్ రెడ్డికి తరిగిపోని, చెరిగిపోని గుర్తింపు సంపాదించి పెట్టింది. వందలాది చిత్రాలలో విభిన్నమైన పాత్రలు పోషించిన జయప్రకాశ్ రెడ్డి, గత సంవత్సరమే కన్నుమూశారు. ఆయన భౌతికంగా లేకపోయినా, జేపీ ధరించిన పాత్రలు బుల్లితెరపై తెలుగువారిని పులకింప చేస్తూనే ఉన్నాయి.