WhatsApp New Feature: ప్రపంచవ్యాప్తంగా అత్యంత ప్రజాదరణ పొందిన మెసేజింగ్ యాప్ అయిన WhatsApp మరో కొత్త ఫీచర్ను పరీక్షిస్తోంది. సీక్రెట్ మెసేజ్ల కోసం ప్రత్యేకంగా రూపొందించిన ఈ ఫీచర్ ద్వారా, మెసేజ్ చదివిన వెంటనే అది ఆటోమేటిక్గా డిలీట్ అవుతుంది. వాట్సాప్లో రాబోయే ఫీచర్లను ట్రాక్ చేసే WABetaInfo నివేదిక ప్రకారం, ఈ కొత్త ఫీచర్ ప్రస్తుతం బీటా దశలో ఉంది. కొంతమంది వినియోగదారులకు మాత్రమే పరీక్షార్థం అందుబాటులో ఉంది.
Read Also: Hanumantha Rao Chowdary: టీడీపీ మాజీ ఎమ్మెల్యే హనుమంతరాయ చౌదరి కన్నుమూత..
గూగుల్ ప్లే స్టోర్లో లభ్యమవుతున్న వాట్సాప్ ఆండ్రాయిడ్ బీటా వెర్షన్ 2.26.12.2లో ఈ కొత్త ఫీచర్ కనిపించింది. దీనికి “After Reading” అనే పేరు ఇచ్చారు. అంటే, ఒకసారి మెసేజ్ చదివిన తర్వాత అది స్వయంచాలకంగా తొలగిపోతుంది. ఇప్పటికే వాట్సాప్లో “Disappearing Messages” అనే ఫీచర్ ఉంది. ఇందులో వినియోగదారులు ఒక నిర్దిష్ట కాలపరిమితిని (ఉదాహరణకు 24 గంటలు, 7 రోజులు, 90 రోజులు) సెట్ చేస్తారు. ఆ సమయం పూర్తయ్యాక మెసేజ్లు డిలీట్ అవుతాయి. అయితే కొత్తగా తీసుకొస్తున్న “After Reading” ఆప్షన్లో, కాలపరిమితి అవసరం ఉండదు. మెసేజ్ చదివిన వెంటనే అది ఆటోమేటిక్గా మాయమవుతుంది.
ఉదాహరణకు, ఒక వినియోగదారు సీక్రెట్ మెసేజ్ పంపాలనుకుంటే, మెసేజ్ పంపే సమయంలో “After Reading” ఆప్షన్ను ఎంచుకోవాలి. అప్పుడు రిసీవర్ మెసేజ్ చదివిన వెంటనే అది డిలీట్ అవుతుంది. ఈ ఫీచర్కు సంబంధించిన స్క్రీన్షాట్ను కూడా WABetaInfo పంచుకుంది. ఇందులో “After Reading” ఆప్షన్తో పాటు 24 గంటలు, 7 రోజులు, 90 రోజులు, ఆఫ్ వంటి ఎంపికలు కూడా కనిపిస్తున్నాయి. అయితే ఈ ఫీచర్ సాధారణ వినియోగదారులకు ఎప్పుడు అందుబాటులోకి వస్తుందనే విషయంపై ఇంకా అధికారిక ప్రకటన వెలువడలేదు. మొత్తానికి, ఈ కొత్త ఫీచర్ వాట్సాప్లో ప్రైవసీని మరింత పెంచే అవకాశం ఉంది. సీక్రెట్ కమ్యూనికేషన్ కోసం ఇది వినియోగదారులకు ఉపయోగపడే అవకాశం ఉంది.