Fatal Surgery: రోగి ప్లీహాన్ని తొలగించబోయి.. కాలేయాన్ని తొలగించిన డాక్టర్.. తర్వాత ఏం జరిగిందంటే..

అమెరికాలో ఒక డాక్టర్ చేసిన ఘోర తప్పిదం వల్ల ఒక ప్రాణం పోయింది. అసలు విషయం ఏమిటంటే, రోగికి ఆపరేషన్ చేసి ‘ప్లీహం’ (Spleen) తీసేయాల్సింది పోయి, డాక్టర్ పొరపాటున ‘కాలేయం’ (Liver) తీసేశాడు. ఈ షాకింగ్ ఘటనకు సంబంధించి డాక్టర్ థామస్ షాక్నోవ్స్కీపై పోలీసులు కేసు నమోదు చేశారు.

అసలు ఏం జరిగిందంటే..
బిల్ బ్రయాన్ అనే వ్యక్తి 2024 ఆగస్టులో అనారోగ్యంతో ఆసుపత్రిలో చేరారు. అతనికి ప్లీహం తొలగించాలని డాక్టర్ షాక్నోవ్స్కీ చెప్పారు. అయితే, తనకు ఆపరేషన్ వద్దు, తన సొంత రాష్ట్రమైన అలబామాకు వెళ్లి చికిత్స చేయించుకుంటానని బ్రయాన్ మూడు రోజుల నుంచి అతడికి చెబుతూనే ఉన్నాడు. కానీ, డాక్టర్ ఒత్తిడి చేయడంతో చివరికి ఆయన ఆపరేషన్‌కు ఒప్పుకున్నారు.

ఆపరేషన్ గదిలో ఏం జరిగింది..
ఆపరేషన్ సమయంలో డాక్టర్ చాలా నిర్లక్ష్యంగా వ్యవహరించారు. అవయవాలు సరిగ్గా కనిపించకపోయినా, తోటి సిబ్బంది సాయం తీసుకోకుండా తప్పుడు అవయవాన్ని కోసేశారు. దీనివల్ల బ్రయాన్ ఒంట్లో రక్తం అంతా పోయి.. ఆపరేషన్ టేబుల్ మీదనే ప్రాణాలు విడిచారు. విచిత్రం ఏమిటంటే.. తాను తీసిన కాలేయాన్ని చూపిస్తూ అది ప్లీహమే అని అక్కడి సిబ్బందిని నమ్మించే ప్రయత్నం చేశారు. కానీ, అది కాలేయమని గుర్తించిన సిబ్బంది డాక్టర్ చేసిన పనికి షాక్ తిన్నారు.

సాధారణంగా కాలేయం, ప్లీహం అనేవి శరీరంలో వేర్వేరు చోట్ల ఉంటాయి. వాటి రంగు, ఆకారం కూడా చాలా భిన్నంగా ఉంటాయి. అంత చిన్న తేడాను డాక్టర్ గుర్తించకపోవడం పెద్ద నేరమని అధికారులు తేల్చారు. ఈ ఘటన తర్వాత ఫ్లోరిడా రాష్ట్రం ఆ డాక్టర్ లైసెన్స్‌ను రద్దు చేసింది. తాజాగా ఆయన్ని పోలీసులు అరెస్ట్ చేశారు. కోర్టులో నేరం రుజువైతే ఆయనకు దాదాపు 15 ఏళ్ల జైలు శిక్ష పడే అవకాశం ఉంది. మే 19న ఈ కేసుపై కోర్టులో తదుపరి విచారణ జరగనుంది. ఒక వైద్యుడి బాధ్యతారాహిత్యం వల్ల ఒక కుటుంబం పెద్ద దిక్కును కోల్పోవడం అందరినీ కలచివేస్తోంది.