Exam Results: ఎఫ్ఎస్ఎల్ ఉద్యోగ నియామక పరీక్ష ఫలితాలు విడుదల.. చెక్ చేసుకోండిలా..

తెలంగాణ స్టేట్ ఫోరెన్సిక్ సైన్స్ లేబరేటరీ (TG FSL)లో వివిధ ఖాళీల భర్తీకి సంబంధించి ఎంతో కాలంగా ఎదురుచూస్తున్న తుది ఫలితాలను తెలంగాణ రాష్ట్ర స్థాయి పోలీస్ నియామక బోర్డు (TGPRB) అధికారికంగా విడుదల చేసింది. నేర విచారణలో కీలక పాత్ర పోషించే ఈ విభాగంలో సిబ్బంది కొరతను తీర్చడమే లక్ష్యంగా ప్రభుత్వం ఈ నియామకాలను చేపట్టింది.

గత నవంబర్‌లో జారీ చేసిన నోటిఫికేషన్ ప్రకారం.. సైంటిఫిక్ ఆఫీసర్, సైంటిఫిక్ అసిస్టెంట్, ల్యాబ్ టెక్నీషియన్ , అటెండెంట్ వంటి మొత్తం 60 పోస్టులకు గాను 59 మంది అభ్యర్థులను తుది జాబితాకు ఎంపిక చేశారు. వీరిలో 39 మంది పురుషులు, 20 మంది మహిళలు మెరిట్ సాధించారు. అర్హత సాధించిన అభ్యర్థుల వివరాలు, కేటగిరీల వారీగా కటాఫ్ మార్కులను అభ్యర్థులు బోర్డు అధికారిక వెబ్‌సైట్ www.tgprb.in లో చెక్ చేసుకోవచ్చు.

ఎంపికైన అభ్యర్థులు తమ ధ్రువపత్రాల పరిశీలన కోసం మార్చి 23 నుంచి 25వ తేదీ లోపు తప్పనిసరిగా డిజిటల్ అటెస్టేషన్ ప్రక్రియను పూర్తి చేయాలని బోర్డు ఛైర్మన్ వీవీ శ్రీనివాసరావు ఆదేశించారు. నియామక ప్రక్రియ ముగిసిన వెంటనే వీరికి అత్యాధునిక నేర పరిశోధన పద్ధతులపై ప్రత్యేక శిక్షణ ఇవ్వనున్నారు.