Snakes Living in Groups: షాకింగ్ నిజాలు.. ఒక పాము కనిపిస్తే జాగ్రత్త..! దాని గుంపు మొత్తం సమీపంలోనే..!

Snakes Living in Groups: పాములు సాధారణంగా ఒంటరిగా జీవించే జీవులని చాలా మంది భావిస్తారు. ఇతర జంతువుల మాదిరిగా గుంపులుగా తిరగవని, తమకంటూ ప్రత్యేక ప్రదేశాల్లోనే ఉంటాయని అనుకుంటారు. అయితే తాజా పరిశోధనలు ఈ అభిప్రాయాన్ని పూర్తిగా మార్చేస్తున్నాయి. కొన్ని పాము జాతులు గుంపులుగా జీవించడమే కాకుండా, ఒకదానితో ఒకటి సామాజిక సంబంధాలు కూడా ఏర్పరుచుకుంటాయని శాస్త్రవేత్తలు వెల్లడించారు.

పాముల సామాజిక ప్రవర్తనపై నిర్వహించిన అధ్యయనాల్లో గార్టర్ పాములు ప్రత్యేకంగా నిలిచాయి. ఇవి గుంపులుగా జీవించడాన్ని ఇష్టపడతాయి. ఒక సమూహంలో వయసులో పెద్దదైన ఆడ పాము నాయకత్వం వహిస్తూ మిగతా పాములకు మార్గనిర్దేశం చేస్తుందని పరిశోధకులు గుర్తించారు. చిన్న గార్టర్ పాములు కూడా ఒంటరిగా ఉండటానికి కంటే ఇతర పాములు ఉన్న ప్రాంతాల్లోనే ఎక్కువగా గడపడానికి ఆసక్తి చూపుతున్నట్లు ప్రయోగాల్లో తేలింది. శాస్త్రవేత్తల ప్రకారం, ఈ పాములు తమ గుంపులోని కొన్ని సభ్యులను ప్రత్యేకంగా గుర్తుపెట్టుకుంటాయి. మనుషుల భాషలో చెప్పాలంటే, వాటికి కూడా ‘స్నేహితులు’ ఉంటారు. గుంపులుగా జీవించడం వల్ల శత్రువుల నుంచి రక్షణ, శరీర ఉష్ణోగ్రత నియంత్రణ, సురక్షిత ఆశ్రయాల ఎంపిక వంటి ప్రయోజనాలు లభిస్తాయి.

రాటిల్ పాములు కూడా సామాజిక స్వభావం కలిగినవే. ముఖ్యంగా ఉత్తర అమెరికాలో కనిపించే వెస్ట్రన్ డైమండ్‌బ్యాక్ రాటిల్ పాములు తమ సమూహంలోని పాములతోనే ఎక్కువగా సంచరిస్తాయి. టింబర్ రాటిల్ పాములు అయితే సంవత్సరాల తర్వాత కూడా తమ కుటుంబ సభ్యులను గుర్తుపట్టగలవని పరిశోధనలు సూచిస్తున్నాయి. శీతాకాలంలో అవి తిరిగి కలిసి ఒకేచోట ఆశ్రయం పొందడం ఈ విషయానికి నిదర్శనంగా చెబుతున్నారు.

కెనడాలోని మనిటోబా ప్రాంతంలో ప్రతి ఏడాది కనిపించే దృశ్యం శాస్త్రవేత్తలను సైతం ఆశ్చర్యపరుస్తుంది. అక్కడ సుమారు 10 వేల ఎర్రపక్కల గార్టర్ పాములు ఒకేచోట గుమిగూడుతాయి. ప్రపంచంలోనే అతిపెద్ద పాముల సమూహాల్లో ఇది ఒకటిగా గుర్తింపు పొందింది. ఈ పాములు ప్రతి ఏడాది అదే ప్రాంతానికి తిరిగి రావడం వాటి సామాజిక బంధాలను సూచిస్తుందని నిపుణులు చెబుతున్నారు.

ఇక కాటన్‌మౌత్ పాములు జంటలుగా వేటాడటం, బాల్ పైథాన్‌లు అందుబాటులో ఖాళీ ప్రదేశాలు ఉన్నప్పటికీ ఒకే ఆశ్రయంలో కలిసి ఉండటాన్ని కూడా పరిశోధకులు గమనించారు. దీంతో పాముల సామాజిక జీవనం ఒక్క జాతికే పరిమితం కాదని, అనేక జాతుల్లో ఈ లక్షణం ఉండొచ్చని భావిస్తున్నారు. అయితే, ఒక పాము కనిపించిందంటే దాని చుట్టుపక్కల మరికొన్ని పాములు కూడా ఉండే అవకాశం ఉందని నిపుణులు హెచ్చరిస్తున్నారు. అందువల్ల పాము కనిపించినప్పుడు నిర్లక్ష్యం చేయకుండా అప్రమత్తంగా ఉండటం, సురక్షిత దూరం పాటించడం మంచిదని సూచిస్తున్నారు.