Snake Hiding Places: మీ ఇంట్లోకి పాము వచ్చిందా..? వాటికి ఇష్టమైన.. అవి దాక్కునే ప్రదేశాలు ఇవే..!

Snake Hiding Places: ఓవైపు ఎండలు.. మరో వైపు అకాల వర్షాల సమయంలో.. పుట్టల్లో నుంచి పాములు ఎక్కువగా బయటకు వస్తాయని చెబుతారు.. వేసవి, వర్షాకాలాల్లో పాములు చల్లని మరియు సురక్షితమైన ప్రదేశాల కోసం వెతుకుతూ తరచుగా ఇళ్లలోకి ప్రవేశిస్తుంటాయి. ముఖ్యంగా పొలాలు, చెట్లు, చెరువులు లేదా అడవులకు సమీపంలో నివసించే వారి ఇళ్లలో ఈ ప్రమాదం మరింత ఎక్కువగా ఉంటుంది. చాలామంది తలుపులు మూసి ఉంచితే సరిపోతుందని భావిస్తారు. కానీ, పాములు చాలా చిన్న రంధ్రాలు, పగుళ్ల ద్వారా కూడా ఇంట్లోకి చేరుకోగలవు.. ఇంట్లో కొన్ని ప్రదేశాలు మనం పెద్దగా పట్టించుకోము. అయితే అవే పాములకు ఆశ్రయాలుగా మారే అవకాశముంది. అందుకే ఇంట్లో ఎక్కడ జాగ్రత్తగా ఉండాలో తెలుసుకోవడం చాలా ముఖ్యం.

చీకటి, తేమగా ఉండే మూలలు
పాములు సాధారణంగా చల్లగా, చీకటిగా, ప్రశాంతంగా ఉండే ప్రదేశాలను ఇష్టపడతాయి. స్టోర్‌రూమ్‌లు, పాత పెట్టెలు ఉన్న మూలలు, పనికిరాని వస్తువులు పేరుకుపోయిన ప్రదేశాలు, మెట్ల కింద ఖాళీ ప్రదేశాలు వాటికి అనువైన దాక్కునే చోట్లుగా మారుతాయి. ఇలాంటి ప్రదేశాల్లో మనుషుల రాకపోకలు తక్కువగా ఉండటం వల్ల పాములు సురక్షితంగా భావిస్తాయి. కాబట్టి స్టోర్‌రూమ్‌ను తరచుగా శుభ్రం చేయడం మంచిది.

బాత్రూమ్‌లు, డ్రైనేజీ పైపులు
వింతగా అనిపించినా, పాములు బాత్రూమ్ సింక్‌లు, టాయిలెట్ పైపులు, డ్రైనేజీ లైన్ల ద్వారా కూడా ఇంట్లోకి రావచ్చు. పైపుల్లో ఉండే తేమ, అలాగే అక్కడ సంచరించే కప్పలు, ఎలుకలు వంటి జీవులు పాములను ఆకర్షిస్తాయి. డ్రైనేజీ గ్రిల్స్ విరిగిపోయి ఉంటే వెంటనే మరమ్మతు చేయించాలి.

వంటగది ఉపకరణాల వెనుక భాగాలు
వంటగదిలో ఫ్రిజ్ వెనుక భాగం, ఓవెన్ కింద ఖాళీ ప్రదేశం, గ్యాస్ స్టౌవ్ చుట్టూ ఉండే మూలలు పాములకు ఇష్టమైన దాక్కునే ప్రాంతాలు కావచ్చు. వేడి మరియు ప్రశాంత వాతావరణం ఉండటంతో అవి అక్కడ దాక్కుంటాయి. అందువల్ల వంటగది వెనుక భాగాలను కూడా తరచుగా పరిశీలించాలి.

అల్మారాలు, షూ ర్యాక్‌లు
నేలకు దగ్గరగా ఉండే అల్మారాలు, మూసి ఉంచిన కబ్బోర్డులు, షూ ర్యాక్‌లు కూడా పాములు దాక్కునే ప్రదేశాలుగా మారవచ్చు. ముఖ్యంగా బయట ఉంచిన బూట్లు, చెప్పుల్లో అవి చుట్టుకొని ఉండే అవకాశముంది. అందుకే బూట్లు వేసుకునే ముందు ఒకసారి బాగా చూసుకోవాలి.

శుభ్రం చేసే సమయంలో జాగ్రత్తలు
చాలా రోజులుగా మూసి ఉన్న గది, పెట్టె లేదా మూలను శుభ్రం చేయాలనుకుంటే నేరుగా చేతులతో తాకకండి. ముందుగా ఒక కర్ర లేదా పొడవైన వస్తువుతో కదిలించి చూసి, తర్వాత మాత్రమే శుభ్రం చేయాలి. అవసరమైతే గ్లౌజులు ధరించడం మంచిది.

ఎలా జాగ్రత్త పడాలి?
ఇంటి చుట్టూ చెత్త పేరుకోనివ్వకండి. గోడలలో పగుళ్లు ఉంటే మూసేయండి. తలుపుల కింద గ్యాప్ ఉంటే సీల్ చేయండి. ఎలుకలు, కప్పలు ఎక్కువగా తిరిగే ప్రదేశాలను శుభ్రంగా ఉంచండి. పాము కనిపిస్తే స్వయంగా పట్టుకోవడానికి ప్రయత్నించకుండా వెంటనే అటవీశాఖ లేదా స్థానిక స్నేక్ క్యాచర్‌కు సమాచారం ఇవ్వాలి. జాగ్రత్తగా ఉంటే పాముల ప్రమాదాన్ని చాలా వరకు తగ్గించుకోవచ్చు.