దక్షిణాది సినీ ఇండస్ట్రీలో గ్లామర్ కంటే నటనకే పెద్దపీట వేసే అతికొద్ది మంది హీరోయిన్లలో సాయి పల్లవి ఒకరు. మేకప్ లేకుండా వెండితెరపై మెరిసే ఈ సహజ నటి, తాజాగా తన ఖాతాలో మరో అరుదైన మైలురాయిని చేర్చుకుంది. తాజాగా జరిగిన ఫిలింఫేర్ అవార్డుల వేడుకలో ‘అమరన్’ సినిమాకు గాను ఉత్తమ నటిగా అవార్డు అందుకోవడంతో, ఆమె కెరీర్లో మొత్తం 7 ఫిలింఫేర్ అవార్డులు చేరాయి.
మలయాళ చిత్రం ‘ప్రేమమ్’తో మొదలైన ఆమె ప్రస్థానం, నేడు భారతీయ సినిమాలోనే అత్యుత్తమ నటిగా (GOAT Actress) కీర్తించబడే స్థాయికి చేరింది. ఇప్పటివరకు ఆమె అందుకున్న ఫిలింఫేర్ అవార్డుల జాబితా చూస్తే ఎవరైనా ఆశ్చర్యపోవాల్సిందే..
1. ప్రేమమ్: బెస్ట్ యాక్ట్రెస్ డెబ్యూ (మలయాళం)
2. ఫిదా: ఉత్తమ నటి (తెలుగు)
3. శ్యామ్ సింగరాయ్: ఉత్తమ నటి (తెలుగు)
4. లవ్ స్టోరీ: ఉత్తమ నటి (తెలుగు)
5. గార్గి: ఉత్తమ నటి (తమిళం)
6. విరాటపర్వం: ఉత్తమ నటి – క్రిటిక్స్ (తెలుగు)
7. అమరన్: ఉత్తమ నటి (తమిళం – లేటెస్ట్)
ఒకే నటి వేర్వేరు భాషల్లో, విభిన్నమైన పాత్రలతో ఇన్ని అవార్డులు అందుకోవడం ఒక రికార్డు అనే చెప్పాలి. ముఖ్యంగా గతేడాది విడుదలైన ‘అమరన్’లో ఇందు రెబెకా వర్గీస్ పాత్రలో ఆమె పండించిన భావోద్వేగాలకు ఫిలింఫేర్ జ్యూరీ ఫిదా అయిపోయింది. ప్రస్తుతం ఆమె చేతిలో హిందీలో ‘రామాయణ’ వంటి భారీ ప్రాజెక్టులు ఉన్నాయి. ఈ వేగంతో వెళ్తే భవిష్యత్తులో ఆమె మరిన్ని రికార్డులు తిరగరాయడం ఖాయం.