Akash Deep Takes 3 Wickets in IND vs ENG 4th Test at Lunch: ఇంగ్లండ్‌తో రాంచీలో ఆరంభమైన నాలుగో టెస్టులో భారత్ తరఫున అంతర్జాతీయ క్రికెట్లో అరంగేట్రం చేసిన బెంగాల్‌ పేసర్‌ ఆకాశ్‌ దీప్‌ శుభారంభం అందుకున్నాడు. నిప్పులు చెరిగే బంతులతో ఇంగ్లండ్ టాప్ ఆర్డర్‌ను పెవిలియన్ చేర్చాడు. అద్భుతమైన బౌలింగ్‌తో మూడు వికెట్లు పడగొట్టాడు. బెన్ డకెట్‌ (11), ఒలీ పోప్‌ (0), జాక్‌ క్రాలే (42) ఔట్ చేశాడు. ఆకాశ్‌ దెబ్బకు లంచ్‌ బ్రేక్‌ సమయానికి ఇంగ్లండ్ 5 వికెట్స్ కోల్పోయి 112 పరుగులు చేసింది. క్రీజ్‌లో బెన్ ఫోక్స్‌ (2), జో రూట్‌ (16 ) ఉన్నారు.
ఈ మ్యాచ్‌లో టాస్‌ గెలిచిన ఇంగ్లండ్ బ్యాటింగ్‌ ఎంచుకుంది. భారత స్టార్‌ పేసర్‌ మహ్మద్‌ సిరాజ్ బౌలింగ్‌ ఆరంభించగా.. రెండో ఓవర్లోనే కెప్టెన్‌ రోహిత్‌ శర్మ ఆకాశ్‌ దీప్‌కు బంతినిచ్చాడు. తన తొలి ఓవర్లో కట్టుదిట్టంగా బౌలింగ్‌ చేసిన ఆకాశ్‌.. రెండో ఓవర్లో జాక్‌ క్రాలే క్లీన్‌ బౌల్డ్‌ చేశాడు. అయితే అది నోబాల్‌గా తేలడంతో.. ఆకాశ్‌కు నిరాశ తప్పలేదు. ఓవైపు సిరాజ్ భారీగా పరుగులు ఇస్తున్నా.. ఆకాశ్‌ తన పేస్‌ పవర్‌ ఏంటో ఇంగ్లండ్ బ్యాటర్లకు రుచిచూపించాడు.
Also Read: Akash Deep: ఆకాష్‌ దీప్‌ను వెంటాడిన దురదృష్టం.. క్లీన్‌ బౌల్డ్‌ చేసినా దక్కని వికెట్! వీడియో వైరల్
ఆకాశ్‌ దీప్‌ పదో ఓవర్లో రెండు వికెట్లు పడగొట్టాడు. 10వ ఓవర్ రెండో బంతికి బెన్ డకెట్‌ను అవుట్‌ చేసిన ఆకాశ్‌.. నాలుగో బంతికి ఒలీ పోప్‌ను వికెట్ల ముందు దొరకబుచ్చుకున్నాడు. ఆ మరుసటి ఓవర్లోనే జాక్‌ క్రాలే (42)ను బౌల్డ్‌ చేశాడు. దాంతో కీలక మూడు వికెట్స్ కోల్పోయిన ఇంగ్లండ్ కష్టాల్లో పడింది. 22వ ఓవర్లో జానీ బెయిర్‌స్టో (38)ను ఆర్ అశ్విన్‌ వికెట్ల ముందు దొరకబుచ్చుకున్నాడు. ఇక లంచ్‌కు ముందు చివరి ఓవర్లో కెప్టెన్‌ బెన్ స్టోక్స్‌ (3)ను ఆర్ జడేజా ఔట్ చేశాడు. దాంతో లంచ్‌ సమయానికి ఇంగ్లండ్ 112/5తో నిలిచింది.
