టీమిండియా యువ ఓపెనర్ శుభ్మన్ గిల్ ఇటీవలి కాలంలో సాధిస్తున్న పరుగుల ప్రవాహం వెనుక ఒక కీలకమైన సాంకేతిక మార్పు ఉందని సీనియర్ స్పిన్నర్ రవిచంద్రన్ అశ్విన్ విశ్లేషించారు. అంతర్జాతీయ క్రికెట్లో నిలదొక్కుకునే క్రమంలో గిల్ తన బ్యాటింగ్ టెక్నిక్ను ఎంతో పరిణతితో మార్చుకున్నాడని, అదే అతడిని పరుగుల వరద పారించేలా చేస్తోందని అశ్విన్ అభిప్రాయపడ్డారు.
టెక్నిక్లో వచ్చిన ప్రధాన మార్పు ఏంటి..?
సాధారణంగా లోపలికి స్వింగ్ అయ్యే బంతులను ఎదుర్కోవడంలో గిల్ గతంలో కొన్ని ఇబ్బందులు పడేవాడు. ముఖ్యంగా బ్యాట్కు, ప్యాడ్కు మధ్య ఎక్కువ గ్యాప్ రావడం వల్ల బౌల్డ్ లేదా ఎల్బీడబ్ల్యూ రూపంలో అవుట్ అయ్యేవాడు.
“గిల్ ప్రస్తుతం బ్యాటింగ్ చేసేటప్పుడు తన బ్యాట్ను ప్యాడ్స్కు చాలా దగ్గరగా తీసుకువస్తున్నాడు. ఈ చిన్న మార్పు అతడిని మరింత ప్రమాదకరమైన బ్యాటర్గా మార్చింది.” – రవిచంద్రన్ అశ్విన్
దీని కారణంగా అతడికి.. బంతి గాల్లో స్వింగ్ అవుతున్నప్పుడు బ్యాట్ ప్యాడ్కు దగ్గరగా ఉండటం వల్ల డిఫెన్స్ మరింత పటిష్టంగా మారింది. బ్యాట్-ప్యాడ్ మధ్య గ్యాప్ లేకపోవడం వల్ల బంతి నేరుగా వికెట్లను తాకే అవకాశాలు తగ్గాయి. టెక్నిక్ పరంగా లోపాలు సరిచేసుకోవడంతో గిల్ క్రీజులో ఎక్కువ సమయం గడపగలుగుతున్నాడు.
గిల్ కేవలం స్టాన్స్లోనే కాకుండా, తన ఫుట్వర్క్లో కూడా స్వల్ప మార్పులు చేశాడు. బంతిని చివరి క్షణం వరకు చూసి ఆడటం, అనవసరమైన షాట్లకు పోకుండా లూజ్ బాల్స్ కోసం ఎదురుచూడటం అతనికి కలిసొచ్చింది. విదేశీ పిచ్లపై, ముఖ్యంగా పేస్, బౌన్స్కు అనుకూలించే ఇంగ్లాండ్, ఆస్ట్రేలియా లాంటి దేశాల్లో ఈ రకమైన టెక్నిక్ గిల్కు ఎంతగానో ఉపయోగపడుతుందని నిపుణులు భావిస్తున్నారు. టెక్నిక్ను త్వరగా మార్చుకోగల సామర్థ్యం ఉండటం వల్లే గిల్ మూడు ఫార్మాట్లలోనూ అత్యుత్తమ ప్రదర్శన ఇవ్వగలుగుతున్నాడు.