Emmanuel Macron: భారత్ ఆవిష్కరణల దేశం.. మేక్ ఇన్ ఇండియాకు మా పూర్తి గౌరవం: మాక్రాన్

భారతదేశం ఆవిష్కరణల దేశమని, ఆర్టిఫిషియల్ ఇంటెలిజెన్స్ (AI), వాతావరణ మార్పుల వంటి కీలక రంగాలలో భారత్, ఫ్రాన్స్ దేశాల మధ్య నిజమైన భాగస్వామ్యం ఉందని ఫ్రాన్స్ అధ్యక్షుడు ఇమ్మాన్యుయేల్ మాక్రాన్ ప్రశంసించారు. ఫ్రాన్స్‌లోని నీస్ నగరంలో ప్రధానమంత్రి నరేంద్ర మోదీతో కలిసి ఆయన ‘భారత్ ఇన్నోవేట్స్ 2026’ సదస్సును ప్రారంభించిన సందర్భంగా ఈ వ్యాఖ్యలు చేశారు.

తాము భారతదేశపు ‘మేక్ ఇన్ ఇండియా’ చొరవను ఎంతో గౌరవిస్తామని, ఇప్పటికే వివిధ రంగాలలో ఫ్రాన్స్ ఇందులో భాగస్వామిగా కొనసాగుతోందని ఆయన స్పష్టం చేశారు. స్మాల్ మోడ్యులర్ రియాక్టర్ల ప్రాజెక్టులతో సహా సివిల్ న్యూక్లియర్ ఎనర్జీ రంగంలో ఇరు దేశాల మధ్య ద్వైపాక్షిక సహకారాన్ని మరింత విస్తరించేందుకు విస్తృత అవకాశాలు ఉన్నాయని మాక్రాన్ ఈ సందర్భంగా అభిప్రాయపడ్డారు.

భారత ప్రభుత్వ ప్రతిష్టాత్మక చొరవతో రూపొందిన ‘భారత్ ఇన్నోవేట్స్ 2026’ సదస్సు, దేశీయ డీప్-టెక్ స్టార్టప్‌లు, పరిశోధన సంస్థలను అంతర్జాతీయ వేదికపైకి తీసుకెళ్లడమే లక్ష్యంగా పనిచేస్తోంది. ఈ కార్యక్రమం భారత్, ఫ్రాన్స్ మరియు ఇతర దేశాల నుండి అగ్రశ్రేణి ఆవిష్కరణల స్టార్టప్‌లను, వెంచర్ క్యాపిటల్ ఫండ్స్‌ను ఒకే వేదికపైకి తీసుకువచ్చింది.

ప్రస్తుతం ఫ్రాన్స్ పర్యటనలో ఉన్న ప్రధానమంత్రి నరేంద్ర మోదీ, అధ్యక్షుడు మాక్రాన్‌తో ద్వైపాక్షిక చర్చలు జరపడంతో పాటు అక్కడ జరిగే ప్రతిష్టాత్మక జీ-7 (G-7) సదస్సులో కూడా పాల్గొననున్నారు. శనివారం నీస్ నగరంలో అడుగుపెట్టిన ప్రధాని మోదీ, తన వారం రోజుల విదేశీ పర్యటనను ఇక్కడి నుంచే ప్రారంభించారు. ఈ పర్యటనలో భాగంగా ఆయన స్లోవేకియా దేశంలో కూడా రెండు రోజుల పాటు పర్యటించనున్నారు. ఇరు దేశాల మధ్య సాంకేతిక, ఆర్థిక బంధాన్ని ఈ పర్యటన మరింత బలోపేతం చేయనుంది.