ChatGPT for Teens: టీనేజర్లకు చాట్‌జీపీటీపై కఠిన ఆంక్షలు.. ఓపెన్‌ఏఐ కీలక నిర్ణయం.. ఇవే కొత్త ఫీచర్లు

ChatGPT for Teens: టీనేజర్ల కోసం ప్రత్యేకంగా రూపొందించిన ‘చాట్‌జీపీటీ ఫర్ టీన్స్’ వెర్షన్‌ను ఓపెన్‌ఏఐ మంగళవారం ప్రకటించింది. 13 నుంచి 17 ఏళ్ల మధ్య వయసున్న వినియోగదారులకు మరింత కఠినమైన భద్రతా ప్రమాణాలు, పర్యవేక్షణను అందించడమే లక్ష్యంగా ఈ కొత్త విధానాన్ని తీసుకొచ్చింది. ఖాతాలో నమోదైన వయసు లేదా వినియోగ విధానాల ఆధారంగా వినియోగదారు మైనర్‌గా గుర్తించబడితే ఈ పరిమితులు ఆటోమేటిక్‌గా అమలులోకి వస్తాయి.

టీనేజర్ల ఖాతాల్లో ఇప్పటికే అమలులో ఉన్న కొన్ని భద్రతా చర్యలను మరింత బలోపేతం చేశారు. ముఖ్యంగా స్వీయహాని, హింస, ఈటింగ్‌ డిజార్డర్స్, గ్రాఫిక్‌ లైంగిక కంటెంట్‌కు సంబంధించిన అంశాలపై కఠినమైన పరిమితులు ఉంటాయి. దీంతో పాటు తరచుగా విరామం తీసుకోవాలని సూచించే రిమైండర్లు, రాత్రి వేళల్లో ‘క్వైట్ అవర్స్’ వంటి ఫీచర్లను కూడా అందుబాటులోకి తెచ్చారు. విద్యార్థుల చదువుకు ఉపయోగపడేలా స్టడీ మోడ్‌ను కూడా ప్రత్యేకంగా అందిస్తున్నారు. ఇందులో ప్రశ్నలకు నేరుగా సమాధానాలు ఇవ్వకుండా, మార్గనిర్దేశం చేసే ప్రశ్నల ద్వారా విద్యార్థులు స్వయంగా విషయాన్ని అర్థం చేసుకునేలా చాట్‌జీపీటీ స్పందిస్తుంది.

టీనేజర్లు చాట్‌బాట్‌తో భావోద్వేగపరంగా అతిగా అనుబంధం ఏర్పరచుకోకుండా కూడా కొన్ని నియంత్రణలు విధించారు. చాట్‌జీపీటీ తనకు వ్యక్తిగత భావాలు ఉన్నాయని లేదా తనకు స్వీయచైతన్యం ఉందని సూచించేలా స్పందించకుండా పరిమితులు విధించారు. అలాగే వాయిస్‌ మోడ్‌ వంటి కొన్ని ఫీచర్లను టీనేజర్ల కోసం నిలిపివేశారు. తల్లిదండ్రులు తమ పిల్లల ఖాతాలను తమ ఖాతాలతో అనుసంధానం చేసుకునే అవకాశం కూడా ఉంది. స్వీయహాని లేదా ఆత్మహత్య వంటి అధిక ప్రమాదకర అంశాలపై చర్చ జరిగినప్పుడు తల్లిదండ్రులకు అలర్ట్‌ అందే విధానాన్ని ఓపెన్‌ఏఐ ప్రవేశపెట్టింది. అయితే ఈ అలర్ట్‌లను మానవ మోడరేటర్లు పరిశీలిస్తారు. పిల్లల గోప్యతను కాపాడేందుకు చాట్‌ వివరాల్లోని నిర్దిష్ట సమాచారాన్ని తొలగించే చర్యలు కూడా తీసుకుంటారు.

చాట్‌జీపీటీ వినియోగంతో కొందరు యువతకు ప్రమాదం కలిగిందన్న విమర్శలు, న్యాయపరమైన ఫిర్యాదుల నేపథ్యంలో ఓపెన్‌ఏఐ ఈ చర్యలు చేపట్టింది. 16 ఏళ్ల ఆడమ్‌ రైన్‌ ఆత్మహత్యకు సంబంధించి అతని తల్లిదండ్రులు దాఖలు చేసిన కేసుతో పాటు, ఓపెన్‌ఏఐపై పలు తప్పుడు మరణాల కేసులు కూడా ఉన్నాయి. ఇదే సమయంలో పిల్లలు, టీనేజర్లు ఉపయోగించే AI చాట్‌బాట్‌ల వల్ల కలిగే ప్రమాదాలపై అమెరికా ఫెడరల్‌ ట్రేడ్‌ కమిషన్‌ (FTC) కూడా దర్యాప్తు ప్రారంభించింది. చాట్‌బాట్‌లను డిజిటల్‌ సహచరులుగా ఉపయోగించే విధానంలో పిల్లల భద్రతకు సంబంధించిన అంశాలపై నియంత్రణ సంస్థలు దృష్టి సారిస్తున్నాయి.

సోషల్‌ మీడియా సంస్థల తరహాలోనే AI కంపెనీలపై కూడా అమెరికాలో నియంత్రణ ఒత్తిడి పెరుగుతోంది. చాట్‌బాట్‌ల నియంత్రణకు కాంగ్రెస్‌లో పలు బిల్లులు ప్రవేశపెట్టగా, కాలిఫోర్నియా కూడా AI అసిస్టెంట్లకు భద్రతా ప్రమాణాలను తప్పనిసరి చేసే చర్యలు చేపట్టింది. మరోవైపు ఆంథ్రపిక్‌ వంటి కొన్ని AI సంస్థలు తమ మోడళ్ల వినియోగాన్ని పెద్దలకు మాత్రమే పరిమితం చేసే దిశగా చర్యలు తీసుకుంటున్నాయి.