Onion Prices Down: శుభవార్త.. భారీగా తగ్గనున్న ఉల్లి ధరలు..

సామాన్య ప్రజల జేబులకు చిల్లులు పెడుతున్న ఉల్లి ధరల నుంచి త్వరలోనే ఊరట లభించనుంది. గత కొన్ని రోజులుగా చుక్కలు చూపిస్తున్న ఉల్లి ధరలు రానున్న రోజుల్లో గణనీయంగా తగ్గే అవకాశం ఉందని మార్కెట్ నిపుణులు అంచనా వేస్తున్నారు. దేశ వ్యాప్తంగా నిత్యం వంటకాల్లో కీలక పాత్ర పోషించే ఉల్లిపాయల ధరలు త్వరలోనే దిగివచ్చే అవకాశాలు కనిపిస్తుండటంతో సామాన్య ప్రజలకు, వినియోగదారులకు ఉపశమనం కలగనుంది. గత కొంతకాలంగా వినియోగదారులను భయపెడుతున్న ఉల్లి ధరలు రాబోయే రోజుల్లో సాధారణ స్థాయికి చేరుకోనున్నాయి. దేశవ్యాప్తంగా సరఫరా పుంజుకోవడమే ఈ ఊరటకి ప్రధాన కారణం.

ప్రస్తుతం వివిధ రాష్ట్రాల నుంచి ఖరీఫ్ సీజన్‌కు సంబంధించిన కొత్త ఉల్లి పంట దిగుబడులు మార్కెట్‌లోకి భారీగా రావడం ప్రారంభమైంది. రాబోయే రోజుల్లో ఈ ప్రవాహం మరింత పెరిగే అవకాశం ఉండటంతో లభ్యత గణనీయంగా పెరిగి ధరలు క్రమంగా తగ్గుముఖం పడతాయని మార్కెట్ నిపుణులు అంచనా వేస్తున్నారు. డిమాండ్‌కు తగినంత సరుకు మార్కెట్‌లో అందుబాటులోకి వస్తుండటంతో విక్రయాలు సులభతరం అవుతున్నాయి.

అటు ప్రజలపై ఆర్థిక భారం పడకుండా కేంద్ర ప్రభుత్వం కూడా వేగంగా స్పందించింది. ధరల స్పెక్యులేషన్‌ను అరికట్టేందుకు బఫర్ స్టాక్ రూపంలో భద్రపరిచిన పాత ఉల్లి నిల్వలను మార్కెట్‌లోకి విడుదల చేసే ప్రక్రియను మరింత వేగవంతం చేసింది. దీనివల్ల కృత్రిమ కొరత ఏర్పడకుండా తగిన జాగ్రత్తలు తీసుకున్నారు.

ఇప్పటికే రిటైల్ మార్కెట్‌లో ఉల్లి ధరలు స్థిరపడుతున్న సూచనలు కనిపిస్తున్నాయి. ఇటీవల దేశవ్యాప్తంగా సగటు కిలో ఉల్లి ధర రూ.53 దాటకుండా నియంత్రణలోకి వచ్చింది. ప్రస్తుతం అనేక ప్రాంతాల్లో వంద రూపాయలకు రెండున్నర కిలోల వరకు లభిస్తోంది. కొత్త పంట రాక మరింత ముమ్మరమైతే ధరలు మరింత తగ్గి, సామాన్యుడికి పూర్తి స్థాయిలో ఊరట లభించనుంది.