Cockroaches and Ants: ఎలాంటి కెమికల్స్, స్ప్రే లేవు.. ఈ చిట్కాతో ఇంట్లో బొద్దింకలు, చీమలు మాయం.. మళ్లీ వస్తే అడగండి..!
Cockroaches and Ants: వేసవి కాలం వచ్చిందంటే కేవలం ఎండలే కాదు.. ఇంట్లో బొద్దింకలు, చీమల సమస్య కూడా పెరుగుతుంది. ఉష్ణోగ్రతలు పెరిగే సమయంలో ఈ కీటకాలు తేమ, ఆహారం కోసం ఇళ్లలోకి చేరుతాయి. ముఖ్యంగా వంటగది, భోజన టేబుల్, అల్మారాలు, సింక్ దగ్గర ఎక్కువగా కనిపిస్తుంటాయి. చీమలు ఆహార పదార్థాలను పాడుచేస్తే, బొద్దింకలు మురికిని వ్యాప్తి చేసి ఆరోగ్య సమస్యలకు కారణమవుతాయి.
చాలామంది వీటిని తరిమికొట్టడానికి ఖరీదైన కెమికల్ స్ప్రేలు, పెస్ట్ కంట్రోల్ సేవలను ఆశ్రయిస్తారు. అయితే ఇంట్లోనే సులభంగా లభించే కొన్ని వస్తువులతో రసాయనాలు లేకుండానే ఈ సమస్యకు చెక్ పెట్టవచ్చు. అవేంటో ఇప్పుడు తెలుసుకుందాం.
బేకింగ్ సోడా – చక్కెర మిశ్రమం: బేకింగ్ సోడా మరియు పొడి చక్కెరను సమాన మోతాదులో తీసుకుని కలపాలి. బొద్దింకలు ఎక్కువగా తిరిగే ప్రదేశాల్లో ఈ మిశ్రమాన్ని చల్లాలి. చక్కెర వాసనకు అవి ఆకర్షితమవుతాయి. బేకింగ్ సోడా ప్రభావంతో అవి తగ్గిపోతాయి.
వెనిగర్ స్ప్రే: తెల్ల వెనిగర్ను నీటితో 1:1 నిష్పత్తిలో కలిపి స్ప్రే బాటిల్లో నింపాలి. చీమలు వెళ్లే దారుల్లో, మూలల్లో పిచికారీ చేయాలి. వెనిగర్ ఘాటైన వాసన వల్ల చీమలు దారి తప్పి తిరిగి రావడం తగ్గుతుంది.
బోరిక్ ఆమ్లం – పిండి ఉండలు: బోరిక్ ఆమ్లం, చక్కెర, కొద్దిగా పిండిని కలిపి చిన్న ఉండలుగా తయారు చేయాలి. వాటిని సింక్ కింద, అల్మారాల వెనుక, మూలల్లో ఉంచాలి. బొద్దింకలను తగ్గించడంలో ఇది ప్రభావవంతంగా పనిచేస్తుంది.
బే ఆకులు కూడా బాగా పనిచేస్తాయి: బొద్దింకలకు బే ఆకుల వాసన నచ్చదు. కొన్ని బే ఆకులను నలిపి వంటగది మూలల్లో, అల్మారాల్లో ఉంచితే అవి ఆ ప్రాంతాలకు రావడం తగ్గుతుంది.
పసుపు – దాల్చినచెక్క పొడి: చీమలు ఎక్కువగా వచ్చే ప్రదేశాల్లో పసుపు లేదా దాల్చినచెక్క పొడిని చల్లాలి. వీటి వాసన చీమలను దూరంగా ఉంచడంలో సహాయపడుతుంది.
పరిశుభ్రత కూడా ముఖ్యం: ఈ చిట్కాలతో పాటు ఇంటిని శుభ్రంగా ఉంచడం చాలా అవసరం. ఆహార పదార్థాలను మూతపెట్టి ఉంచడం, చెత్తను వెంటనే తొలగించడం, నీరు నిల్వ ఉండకుండా చూడడం వల్ల చీమలు, బొద్దింకల సమస్య తగ్గుతుంది. మొత్తంగా ఖరీదైన కెమికల్స్, స్ప్రేలు లేకుండానే ఇంట్లో లభించే సాధారణ వస్తువులతో బొద్దింకలు, చీమలను సులభంగా తరిమికొట్టవచ్చు. ఆరోగ్యానికి హానికరం కాకుండా సహజ పద్ధతుల్లో ఇంటిని కీటకాలు లేకుండా ఉంచుకోవచ్చు.