NEET-UG 2026: నీట్- యూజీ 2026 కౌన్సెలింగ్‌ షెడ్యూల్ ఖరారు.. ఆగస్టు 4 నుంచే..

డాక్టర్ ఎన్టీఆర్ ఆరోగ్య విశ్వవిద్యాలయం ఉపకులపతి పులాల చంద్రశేఖర్ NEET-UG 2026 కౌన్సెలింగ్ షెడ్యూల్‌ను అధికారికంగా విడుదల చేశారు. యూజీ కోర్సుల విద్యా సంవత్సరం సెప్టెంబర్ 8, 2026 నుండి ప్రారంభం కానుంది. విద్యార్థులు, తల్లిదండ్రులు ఈ కౌన్సెలింగ్ తేదీలను గమనించి గడువులోగా ప్రక్రియను పూర్తి చేయాలని సూచించారు.

కౌన్సెలింగ్ మొదటి విడత అఖిల భారత కోటా (AIQ)లో ఆగస్టు 4 నుంచి 17 వరకు జరగనుండగా, చేరడానికి ఆగస్టు 22 చివరి తేదీ. రాష్ట్ర కోటాలో ఆగస్టు 13 నుంచి 22 వరకు జరిగి, చేరడానికి ఆగస్టు 28 చివరి తేదీగా నిర్ణయించారు. అభ్యర్థుల వివరాల ధృవీకరణ AIQ కి ఆగస్టు 23న, రాష్ట్ర స్థాయికి ఆగస్టు 29న జరుగుతుంది.

రెండో విడత కౌన్సెలింగ్ AIQ లో ఆగస్టు 24 నుంచి సెప్టెంబర్ 2 వరకు (చివరి తేదీ సెప్టెంబర్ 8), రాష్ట్ర కోటాలో ఆగస్టు 31 నుంచి సెప్టెంబర్ 8 వరకు (చివరి తేదీ సెప్టెంబర్ 14) నిర్వహించనున్నారు.

మూడో విడత AIQ కౌన్సెలింగ్ సెప్టెంబర్ 10 నుంచి 18 వరకు జరిగి, సెప్టెంబర్ 26 నాటికి చేరాల్సి ఉంటుంది. రాష్ట్ర కోటాలో సెప్టెంబర్ 16 నుంచి 26 వరకు జరిగి, అక్టోబర్ 1 నాటికి చేరాల్సి ఉంటుంది.

చివరిగా స్ట్రే వేకెన్సీ రౌండ్ AIQ కి సెప్టెంబర్ 28 నుంచి అక్టోబర్ 3 వరకు, రాష్ట్ర కోటాకు అక్టోబర్ 3 నుంచి 5 వరకు జరుగుతాయి. ఈ రౌండ్‌లో సీటు పొందిన అభ్యర్థులు అక్టోబర్ 10, 2026 లోపు నిర్దేశిత కళాశాలల్లో చేరాల్సి ఉంటుంది.