World Cup 2027: ఆ కాటేరమ్మ కొడుకు అంటే గంభీర్‌కు ఎంతో ఇష్టం.. వరల్డ్ కప్‌లో స్థానం పక్కా.

టీ-20 ప్రపంచకప్ 2026, ఐపీఎల్ హడావుడి ముగియడంతో క్రికెట్ ప్రపంచంలో ఇప్పుడు అందరి దృష్టి 2027 వన్డే ప్రపంచకప్ ఎంపికలపై పడింది. ఈ నేపథ్యంలో భారత మాజీ క్రికెటర్, దిగ్గజ ఫీల్డర్ మహమ్మద్ కైఫ్ తన యూట్యూబ్ ఛానెల్‌లో ఆసక్తికర వ్యాఖ్యలు చేశారు. 2027 ప్రపంచకప్‌లో వికెట్ కీపర్ బ్యాటర్‌గా ఎవరిని ఎంపిక చేయాలనే ప్రశ్నకు కైఫ్ ఎటువంటి సంకోచం లేకుండా కేఎల్ రాహుల్ వైపే మొగ్గు చూపారు.

కేఎల్ రాహుల్‌కే మొదటి ప్రాధాన్యత..
మహమ్మద్ కైఫ్ అభిప్రాయం ప్రకారం.. గత కొన్ని సంవత్సరాలుగా వన్డేల్లో కేఎల్ రాహుల్ ప్రదర్శన అద్భుతంగా ఉంది. వన్డే క్రికెట్‌లో రాహుల్ 50 సగటు కలిగి ఉన్నాడని, నంబర్ 5 లేదా 6 స్థానాల్లో బ్యాటింగ్‌కు వచ్చి మ్యాచ్‌లను ముగించడం అంత సులువు కాదని ఆయన పేర్కొన్నారు. కెరీర్‌లో ఎన్నో విమర్శలు, ట్రాన్స్‌ఫర్లు, కెప్టెన్సీ మార్పులు చూసిన తర్వాత రాహుల్ ఎంతో పరిణతి చెందాడని కైఫ్ కొనియాడారు. కీపింగ్, స్లిప్ ఫీల్డింగ్, అవసరమైతే కెప్టెన్సీ చేయగల సామర్థ్యం రాహుల్‌కు అదనపు బలాలు.

అయితే టీమిండియా హెడ్ కోచ్ గౌతమ్ గంభీర్ మనస్తత్వాన్ని కూడా కైఫ్ ప్రస్తావించారు. గంభీర్‌కు ఇషాన్ కిషన్ అంటే చాలా ఇష్టమని, ఈ సమీకరణం భవిష్యత్తులో కీలక పాత్ర పోషిస్తుందని చెప్పారు. 2023 ఆసియా కప్‌లో భారత్-పాకిస్తాన్ మ్యాచ్ సందర్భంగా లైవ్ షోలో గంభీర్.. రాహుల్ కంటే ఇషాన్ కిషన్‌కే ప్రాధాన్యత ఇచ్చారని కైఫ్ గుర్తు చేశారు. ప్రస్తుతానికైతే నంబర్ 6 స్థానంలో నిలకడగా రాణిస్తున్న కేఎల్ రాహుల్ స్థానం సురక్షితంగా ఉంటుందని, ఒకవేళ రాహుల్ ఫామ్ కోల్పోతే గంభీర్ ఇష్టపడే ఇషాన్ కిషన్‌కు త్వరగానే అవకాశం దక్కుతుందని కైఫ్ విశ్లేషించారు. అయితే, ఇషాన్ కిషన్ జట్టులోకి వచ్చినా విరాట్ కోహ్లీ స్థానమైన నంబర్ 3లో మాత్రం ఆడలేరని స్పష్టం చేశారు.