Lava Smart Phone: లావా నుంచి బడ్జెట్ ఫోన్.. 6,000mAh బ్యాటరీ, ఎల్సీడీ టచ్‌స్క్రీన్.. సెప్టెంబర్ 18న లాంచ్..

భారతీయ బ్రాండ్ లావా నుంచి వస్తున్న కొత్త స్మార్ట్‌ఫోన్ ‘లావా బోల్డ్ ఎన్4 ప్రో 5జీ’ సెప్టెంబర్ 18న మధ్యాహ్నం 12 గంటలకు దేశంలో లాంచ్ కానుంది. లాంచ్‌కు ముందే అమెజాన్ ఈ ఫోన్‌కు సంబంధించిన మైక్రోసైట్‌ను లైవ్ చేసింది. ఈ ఫోన్ డిజైన్, ప్రధాన ఫీచర్ల వివరాలను కంపెనీ వెల్లడించింది. ఈ స్మార్ట్‌ఫోన్ గోల్డ్ , బ్లూ కలర్ ఆప్షన్లలో లభిస్తుందని సమాచారం. దీని వెనుక భాగంలో ఒక ఫ్లాట్ ప్యానెల్ ఉంటుంది. టాప్-లెఫ్ట్ కార్నర్‌లో కెమెరా మాడ్యూల్ ఇవ్వబడింది. ఇందులో డ్యూయల్ రేర్ కెమెరా సెటప్ ఉండగా, 50 మెగాపిక్సెల్ మెయిన్ కెమెరా, ఎల్ఈడీ ఫ్లాష్ ఉన్నాయి. ముందు భాగంలో సెల్ఫీల కోసం వాటర్‌డ్రాప్-స్టైల్ నాచ్ డిజైన్ ఇవ్వబడింది. ఫోన్ కుడి వైపున పవర్ బటన్, వాల్యూమ్ కంట్రోల్స్, సిమ్ ట్రే అమర్చబడి ఉన్నాయి.

ఈ అప్ కమింగ్ ఫోన్‌లో అత్యంత ముఖ్యమైన హైలైట్ ఏమిటంటే.. ఇందులో 6,000mAh బ్యాటరీని అందించారు. దీని ధర, ప్రాసెసర్, డిస్‌ప్లే సైజ్, ఛార్జింగ్ సపోర్ట్ వంటి పూర్తి వివరాలు లాంచ్ తేదీ దగ్గర పడే కొద్దీ వెల్లడయ్యే అవకాశం ఉంది. గత నెలలో లావా కంపెనీ ‘లావా బోల్డ్ ఎన్4 లైట్’ను భారత్‌లో విడుదల చేసింది. దీని ప్రారంభ ధర రూ. 8,099గా ఉంది. ఇది ఎంపైర్ గోల్డ్, ఘోస్ట్ సిల్వర్ రంగుల్లో లభిస్తుంది. ఈ మోడల్ 6.56 అంగుళాల ఎల్సీడీ టచ్‌స్క్రీన్, యూనిసోక్ 9863ఏ చిప్‌సెట్, 5000mAh బ్యాటరీ, 10డబ్ల్యూ ఛార్జింగ్ సపోర్ట్‌తో వస్తుంది. ఇప్పుడు రాబోతున్న ప్రో వేరియంట్ మరింత మెరుగైన ఫీచర్లతో వినియోగదారులను ఆకట్టుకోనుంది. అమెజాన్ వేదికగా ఈ ఫోన్ కొనుగోలు చేయడానికి అందుబాటులోకి రానుంది. దేశీయ బ్రాండ్‌గా లావా తన 5జీ పోర్ట్‌ఫోలియోను వేగంగా విస్తరిస్తోంది.