Jani Master: నిర్మాతల డబ్బులు దోచేస్తుంటే చూస్తూ ఊరుకోవాలా?

చలనచిత్ర పరిశ్రమలో అంతర్గత విభేదాలు, అవినీతి అక్రమాలు మరోసారి వీధిన పడ్డాయి. ప్రముఖ కొరియోగ్రాఫర్, తెలుగు ఫిల్మ్ అండ్ టెలివిజన్ డాన్సర్స్ అసోసియేషన్ (TFTDDA) మాజీ ప్రెసిడెంట్ జాని మాస్టర్  నేరుగా సినిమా నిర్మాతలకు రాసిన ఒక బహిరంగ లేఖ ఇప్పుడు ఇండస్ట్రీలో తీవ్ర సంచలనంగా మారింది. డ్యాన్సర్స్ యూనియన్‌లో జరుగుతున్న భారీ అవినీతిని, దానికి ఫెడరేషన్ పెద్దలు అందిస్తున్న మద్దతును ఆయన ఈ లేఖ ద్వారా బట్టబయలు చేశారు. సినిమా కార్మికులకు అన్నం పెట్టేది నిర్మాతలేనని, వారిని తాము దైవ సమానులుగా భావిస్తామని లేఖలో పేర్కొన్న జానీ.. ప్రస్తుతం నిర్మాతలు ఎదుర్కొంటున్న కష్టాలపై ఆవేదన వ్యక్తం చేశారు. పైరసీ, థియేటర్ల కొరత వంటి సమస్యలతో పాటు కొందరు స్వార్థపరుల అవినీతి వల్ల నిర్మాతలు తీవ్రంగా నష్టపోతున్నారని ఆరోపించారు. నిర్మాతలు కష్టపడి ఇస్తున్న డబ్బులు అసలైన డ్యాన్సర్లకు చేరకుండా మధ్యలో కొందరు దోచుకుంటున్నారని సంచలన నిజాలను బయటపెట్టారు.

యూనియన్‌లో జరుగుతున్న ఈ అక్రమాలకు అడ్డుకట్ట వేసేందుకు ప్రస్తుత ప్రెసిడెంట్ వి.వి. సుమలతా దేవి చొరవతో కీలక నిర్ణయాలు తీసుకున్నట్లు జాని తెలిపారు.ప్రొడక్షన్ కంపెనీల పేరుతో నకిలీ (అక్రమ) బిల్లులు సృష్టించి అవినీతికి పాల్పడుతున్న కొందరు ప్రోగ్రామ్ ఇంచార్జ్‌లను సస్పెండ్ చేశారు. జనరల్ బాడీ సమావేశంలో తీసుకున్న నిర్ణయం ప్రకారం, అవినీతికి సహకరించిన జనరల్ సెక్రటరీని పదవి నుంచి శాశ్వతంగా తొలగించారు. అవినీతిపరులకు మద్దతుగా నిలిచిన కమిటీ సభ్యులపై కూడా కఠిన చర్యలు తీసుకున్నారు. అయితే యూనియన్ బాగుకోసం అవినీతిపరులను ఏరివేస్తుంటే, ఫెడరేషన్ పెద్దలు మాత్రం ఆ అవినీతి తిమింగలాలకే కొమ్ముకాస్తున్నారని జాని తీవ్రస్థాయిలో ధ్వజమెత్తారు. “మేము చర్యలు తీసుకుంటుంటే, ఫెడరేషన్ మా అసోసియేషన్‌కు అడ్డుపడుతున్నారు. అవినీతి చేసిన వారి తప్పులను కప్పిపుచ్చుతూ, వారిని మళ్లీ వెనకేసుకొస్తున్నారు” అని ఆరోపించారు. అంతేకాకుండా, మహిళ అయిన ప్రెసిడెంట్ సుమలతా దేవిపై ఫెడరేషన్ పెద్దలు తీవ్ర మానసిక ఒత్తిడి తీసుకువస్తున్నారని, పదవి నుండి తొలగించబడిన అవినీతిపరులను మళ్లీ చేర్చుకోవాలని బెదిరిస్తున్నారని లేఖలో పేర్కొన్నారు. మాట వినకపోతే అసోసియేషన్ గుర్తింపు రద్దు చేస్తామని బెదిరింపులకు పాల్పడుతున్నట్లు సంచలన ఆరోపణలు చేశారు.

జూలై 16న జరిగిన జనరల్ కౌన్సిల్ మీటింగ్‌లో కొందరు సభ్యులు ఫెడరేషన్ వైఖరిని తీవ్రంగా తప్పుపట్టారు. “నిర్మాతల డబ్బులు దోచేస్తుంటే చూస్తూ ఊరుకోవాలా? తప్పు చేసిన వారిని ఎలా సమర్థిస్తారు?” అంటూ ఫెడరేషన్ ప్రతినిధులను నిలదీశారు. దీనికి ఫెడరేషన్ పెద్దలు సమాధానం చెప్పలేకపోయారని జాని తెలిపారు. ఫెడరేషన్ చేస్తున్న ఈ “నాటకీయ రాజకీయాలు” తక్షణమే ఆపాలని, డ్యాన్సర్ యూనియన్ అంతర్గత విషయంలో వారు జోక్యం చేసుకోకుండా చూడాలని జానీ తెలుగు సినిమా నిర్మాతలను, ఇండస్ట్రీ పెద్దలను వేడుకున్నారు. అవినీతిని అంతం చేసి, నిర్మాతలకు న్యాయం జరిగేలా చూడటం తమ లక్ష్యమని, ఈ పోరాటంలో నిర్మాతలకు తాము ఎల్లప్పుడూ అండగా ఉంటామని ఆయన స్పష్టం చేశారు.

Every producer who thrives gives ten families a livelihood. My open letter to the Telugu film industry.

Our Dancers’ Union acted against corruption within our ranks and instead of support, we’ve faced pressure to protect the guilty.

Standing firm for what’s right. 🙏 #TFTDDA pic.twitter.com/POOoBgd3nq

— Jani Master (@AlwaysJani) July 18, 2026