SRH Vs KKR: టాస్ గెలిచిన కోల్కత్తా.. SRH బ్యాటింగ్.. 300 రన్స్ లోడింగ్..!
ఐపీఎల్-2026లో భాగంగా ఈడెన్ గార్డెన్స్ వేదికగా సన్రైజర్స్ హైదరాబాద్ (SRH), కోల్కతా నైట్ రైడర్స్ (KKR) మధ్య ఆసక్తికర పోరు మొదలైంది. ఈ మ్యాచ్లో టాస్ గెలిచిన కోల్కతా కెప్టెన్ అజింక్య రహానే మొదట బౌలింగ్ ఎంచుకున్నాడు. పిచ్పై కాస్త పచ్చిక ఉండటం, వర్షం సూచనలు ఉండటంతో బౌలింగ్కే మొగ్గు చూపినట్లు రహానే తెలిపాడు.
300 రన్స్ లోడింగ్ అంటూ ఫ్యాన్స్ జోష్..
సన్రైజర్స్ హైదరాబాద్ మొదట బ్యాటింగ్ చేస్తుండటంతో సోషల్ మీడియాలో ఆరెంజ్ ఆర్మీ సందడి మొదలైంది. అభిషేక్ శర్మ, ట్రావిస్ హెడ్, క్లాసెన్ వంటి హిట్టర్లు జట్టులో ఉండటంతో.. ఈసారి స్కోరు ‘300 లోడింగ్’ అంటూ అభిమానులు కామెంట్లు పెడుతున్నారు. గత మ్యాచ్ల్లో 200కు పైగా పరుగులు చేసినా బౌలర్లు విఫలం కావడంతో ఓటమి పాలైన ఎస్ఆర్హెచ్, ఈసారి భారీ స్కోరుతో పాటు విజయంపై కన్నేసింది.
గాయాల బెడద – కీలక ఆటగాళ్లు దూరం..
ఇరు జట్లను గాయాలు తీవ్రంగా వేధిస్తున్నాయి. ఎస్ఆర్హెచ్ కెప్టెన్ ప్యాట్ కమిన్స్, బ్రైడన్ కార్స్ ఫిట్నెస్ సమస్యలతో ఈ మ్యాచ్కు దూరం కావడంతో ఇషాన్ కిషన్ కెప్టెన్సీ బాధ్యతలు చేపట్టాడు. కేకేఆర్ వైపు పతిరానా, హర్షిత్ రానా వంటి కీలక బౌలర్లు అందుబాటులో లేరు. ఎస్ఆర్హెచ్ జట్టులోకి శివాంగ్ కుమార్ వచ్చి వికెట్లు తీసే ఆప్షన్ను పెంచాడు.
ఇరు జట్ల వివరాలు..
SRH: అభిషేక్ శర్మ, ట్రావిస్ హెడ్, ఇషాన్ కిషన్ (కెప్టెన్/కీపర్), హెన్రిచ్ క్లాసెన్, అనికేత్ వర్మ, నితీష్ కుమార్ రెడ్డి, సలిల్ అరోరా, హర్ష్ దూబే, శివాంగ్ కుమార్, జయదేవ్ ఉనద్కత్, డేవిడ్ పేన్.
KKR: అజింక్య రహానే (కెప్టెన్), కామరూన్ గ్రీన్, రఘువంశీ, రింకూ సింగ్, రమణదీప్ సింగ్, అనుకుల్ రాయ్, సునీల్ నరైన్, వరుణ్ చక్రవర్తి, వైభవ్ అరోరా, కార్తీక్ త్యాగి, ముజరబానీ.
రెండు జట్లూ తమ మొదటి మ్యాచ్ల్లో ఓడిపోవడంతో, ఈ మ్యాచ్లో గెలిచి పాయింట్ల పట్టికలో ఖాతా తెరవాలని పట్టుదలగా ఉన్నాయి. తాజా పరిస్థితుల దృష్ట్యా ఈడెన్ గార్డెన్స్లో పరుగుల వరద పారడం ఖాయంగా కనిపిస్తోంది.