ఐపీఎల్ 2026లో భాగంగా పంజాబ్ కింగ్స్ (PBKS), రాయల్ ఛాలెంజర్స్ బెంగళూరు (RCB) మధ్య జరిగిన కీలక పోరులో ఆర్సీబీ బ్యాటర్ వెంకటేశ్ అయ్యర్ అద్భుత ఇన్నింగ్స్తో ఆకట్టుకున్నాడు. గాయపడిన రజత్ పటీదార్ స్థానంలో నాలుగో నంబర్లో బ్యాటింగ్కు వచ్చిన వెంకటేశ్.. కేవలం 40 బంతుల్లోనే 8 ఫోర్లు, 4 సిక్సర్ల సాయంతో 73 పరుగులు చేసి నాటౌట్గా నిలిచాడు. పంజాబ్ బౌలర్లపై పూర్తి ఆధిపత్యం చలాయిస్తూ జట్టు స్కోరును 220 మార్కు దాటించడంలో కీలక పాత్ర పోషించాడు.
సోషల్ మీడియాలో వైరల్ అయిన విజయ్ స్టైల్..
ఈ మ్యాచ్లో హాఫ్ సెంచరీ మార్కును అందుకున్న తర్వాత వెంకటేశ్ అయ్యర్ చేసిన సెలబ్రేషన్స్ అందరి దృష్టిని ఆకర్షించాయి. స్టార్ నటుడు, తమిళనాడు ముఖ్యమంత్రి విజయ్ తన బ్లాక్బస్టర్ సినిమా ‘మెర్సల్’లో చేసిన ఒక పోజ్ను వెంకటేశ్ మైదానంలో రీ-క్రియేట్ చేశాడు. విజయ్ స్టైల్ను అనుకరిస్తూ అతను చేసిన ఈ సంబరాల వీడియో ప్రస్తుతం సోషల్ మీడియాలో విపరీతంగా వైరల్ అవుతోంది. సినిమా, క్రికెట్ అభిమానులు ఈ రెండు చేష్టల మధ్య ఉన్న పోలికలను ఎత్తిచూపుతూ పోస్టులు పెడుతున్నారు.
ఆర్సీబీ భారీ స్కోరు
టాస్ ఓడి మొదట బ్యాటింగ్ చేసిన ఆర్సీబీకి ఓపెనర్ జాకబ్ బెథెల్ త్వరగా అవుట్ అయినా.. విరాట్ కోహ్లీ (37 బంతుల్లో 58), దేవదత్ పడిక్కల్ (25 బంతుల్లో 45) రెండో వికెట్కు 76 పరుగుల భాగస్వామ్యంతో బలమైన పునాది వేశారు. కోహ్లీ తన 67వ ఐపీఎల్ అర్ధసెంచరీని నమోదు చేశాడు. ఆ తర్వాత క్రీజులోకి వచ్చిన వెంకటేశ్ అయ్యర్ మధ్య ఓవర్లలో పరుగుల వేగాన్ని అస్సలు తగ్గనివ్వలేదు. లాకీ ఫెర్గూసన్ వేసిన ఓవర్లో లాంగ్-ఆఫ్, లాంగ్-ఆన్ మీదుగా భారీ సిక్సర్లు బాదాడు. ఆఖర్లో టిమ్ డేవిడ్ (12 బంతుల్లో 28) కూడా మెరుపులు మెరిపించడంతో ఆర్సీబీ 4 వికెట్లకు 222 పరుగుల భారీ స్కోరు సాధించింది. ప్లేఆఫ్స్ రేసులో నిలవాలంటే పంజాబ్కు, ప్లేఆఫ్స్ బెర్త్ ఖాయం చేసుకోవాలంటే ఆర్సీబీకి ఈ మ్యాచ్ విజయం ఎంతో కీలకం.