RBI: విదేశీ మారక, బంగారు నిల్వలు భారీ పతనం.. ఆర్‌బీఐ తాజా గణాంకాలు

RBI: భారతదేశ విదేశీ మారక నిల్వలు, బంగారు నిల్వలు గణనీయంగా తగ్గినట్లు భారతీయ రిజర్వ్ బ్యాంక్ (ఆర్‌బీఐ) తాజా గణాంకాలు వెల్లడించాయి. జూన్ 26, 2026తో ముగిసిన వారంలో దేశ విదేశీ మారక నిల్వలు 5.654 బిలియన్ డాలర్లు తగ్గి 666.933 బిలియన్ డాలర్లకు చేరాయి. అంతకుముందు వారంలో మాత్రం విదేశీ మారక నిల్వలు 963 మిలియన్ డాలర్లు పెరిగి 672.587 బిలియన్ డాలర్లకు చేరిన విషయం తెలిసిందే. ఆర్‌బీఐ వివరాల ప్రకారం, విదేశీ మారక నిల్వల్లో ప్రధాన భాగమైన విదేశీ కరెన్సీ ఆస్తులు 150 మిలియన్ డాలర్లు తగ్గి 541.067 బిలియన్ డాలర్లకు చేరాయి. యూరో, పౌండ్, యెన్ వంటి అమెరికేతర కరెన్సీల మారకపు విలువల్లో వచ్చిన హెచ్చుతగ్గులు కూడా ఈ తగ్గుదలపై ప్రభావం చూపినట్లు పేర్కొంది.

ఇక బంగారు నిల్వల్లో ఒకే వారంలో భారీ క్షీణత నమోదైంది. బంగారు నిల్వలు 5.394 బిలియన్ డాలర్లు తగ్గి 102.536 బిలియన్ డాలర్లకు చేరాయి. ఇదే కాలంలో స్పెషల్ డ్రాయింగ్ రైట్స్ (SDRs) విలువ 89 మిలియన్ డాలర్లు తగ్గి 18.558 బిలియన్ డాలర్లకు చేరగా, అంతర్జాతీయ ద్రవ్య నిధి (IMF) వద్ద భారత రిజర్వ్ పొజిషన్ కూడా 21 మిలియన్ డాలర్లు తగ్గి 4.7772 బిలియన్ డాలర్లుగా నమోదైంది. గత ఫిబ్రవరి 27, 2026తో ముగిసిన వారంలో భారత విదేశీ మారక నిల్వలు 728.494 బిలియన్ డాలర్లతో రికార్డు స్థాయికి చేరుకున్నాయి. అయితే అనంతరం పశ్చిమ ఆసియాలో పెరిగిన భౌగోళిక ఉద్రిక్తతలు, అంతర్జాతీయ పరిణామాలు రూపాయిపై ఒత్తిడిని పెంచాయి. రూపాయి విలువను స్థిరీకరించేందుకు ఆర్‌బీఐ మార్కెట్‌లో డాలర్లను విక్రయించడం వంటి చర్యలు చేపట్టడంతో విదేశీ మారక నిల్వలు తగ్గినట్లు విశ్లేషకులు భావిస్తున్నారు.

ఇదిలా ఉండగా, దేశంలో విదేశీ మారక వ్యయాన్ని తగ్గించేందుకు బంగారం దిగుమతులపై ప్రభుత్వం కఠిన చర్యలు తీసుకుంది. బంగారం కొనుగోళ్లను తగ్గించాలని ప్రజలకు విజ్ఞప్తి చేయడంతో పాటు దిగుమతి సుంకాలను కూడా పెంచింది. దీంతో బంగారం దిగుమతులు తగ్గి, బంగారు నిల్వలపై కూడా ప్రభావం పడినట్లు తెలుస్తోంది. ఆర్‌బీఐ విడుదల చేసిన తాజా గణాంకాలు దేశ విదేశీ మారక నిల్వల్లో తాత్కాలిక ఒత్తిడిని సూచిస్తున్నప్పటికీ, అంతర్జాతీయ ఆర్థిక పరిస్థితులు, రూపాయి మారకపు విలువ, ప్రపంచ మార్కెట్ పరిణామాలు రానున్న రోజుల్లో ఈ నిల్వల దిశను నిర్ణయించే కీలక అంశాలుగా మారనున్నాయి.