భారత ప్రభుత్వ సమాచార మంత్రిత్వ శాఖ పరిధిలోని పోస్టల్ శాఖ (ఇండియా పోస్ట్), సెంటర్ ఫర్ ఎక్సలెన్స్ ఇన్ పోస్టల్ టెక్నాలజీ (CEPT)లో ఖాళీగా ఉన్న పోస్టుల భర్తీకి నోటిఫికేషన్ విడుదల చేసింది. సాంకేతిక రంగంలో నైపుణ్యం కలిగిన అభ్యర్థులకు ఇది ఒక అద్భుతమైన అవకాశం. ముఖ్యంగా అసిస్టెంట్ మేనేజర్, టెక్నికల్ సూపర్వైజర్ వంటి కీలక విభాగాల్లో నియామకాలు చేపట్టనున్నారు.
ఈ నోటిఫికేషన్ ద్వారా మొత్తం 117 ఖాళీలను భర్తీ చేయనున్నారు. వీటిలో అసిస్టెంట్ మేనేజర్ హోదాలో 16 పోస్టులు, టెక్నికల్ సూపర్వైజర్ హోదాలో 101 పోస్టులు ఉన్నాయి. అయితే, ఇది నేరుగా కొత్త అభ్యర్థుల కోసం కాకుండా, ఇప్పటికే వివిధ ప్రభుత్వ శాఖల్లో పనిచేస్తున్న వారికి డెప్యుటేషన్ ప్రాతిపదికన అవకాశం కల్పిస్తున్నారు. కేంద్ర లేదా రాష్ట్ర ప్రభుత్వాల్లోని సంబంధిత విభాగాల్లో పనిచేస్తూ, అవసరమైన విద్యార్హతలు కలిగిన వారు ఈ ఉద్యోగాలకు దరఖాస్తు చేసుకోవచ్చు.
Also Read:Farmers: రైతులకు భారీ శుభవార్త చెప్పిన కేంద్ర ప్రభుత్వం.. ఆ సబ్సిడీకి గ్రీన్ సిగ్నల్ వచ్చేసింది..
ఎంపికైన అభ్యర్థులకు భారీ వేతనం లభిస్తుంది. అసిస్టెంట్ మేనేజర్ పోస్టుకు నెలకు రూ. 47,600 నుంచి రూ. 1,51,100 వరకు (పే లెవల్ 8), టెక్నికల్ సూపర్వైజర్ పోస్టుకు రూ. 35,400 నుంచి రూ. 1,12,400 వరకు (పే లెవల్ 6) జీతం ఉంటుంది. దరఖాస్తు చేసుకునే అభ్యర్థుల వయస్సు 56 ఏళ్లు మించకూడదు.
ఆసక్తి గల వారు ఆఫ్లైన్ ద్వారా తమ దరఖాస్తులను పంపాల్సి ఉంటుంది. సంబంధిత సర్టిఫికేట్లు , పత్రాలను నోటిఫికేషన్లో సూచించిన చిరునామాకు చేరేలా చూడాలి. దరఖాస్తులు సమర్పించడానికి చివరి తేదీ మే 27, 2026. జాయిన్ అయ్యే అభ్యర్థులు బెంగుళూరు, చెన్నై, మైసూర్ వంటి ప్రధాన నగరాల్లో ఉన్న CEPT కేంద్రాలలో పనిచేయాల్సి ఉంటుంది. సాంకేతిక అంశాలపై ఆసక్తి ఉండి, ప్రభుత్వ రంగంలో ఉన్నత హోదాలో పనిచేయాలనుకునే వారికి ఇది మంచి అవకాశం. మరిన్ని వివరాల కోసం అభ్యర్థులు ఇండియా పోస్ట్ అధికారిక వెబ్సైట్ను సందర్శించవచ్చు.