Delhi-NCR Earthquake: ఢిల్లీ-ఎన్‌సీఆర్‌తో పాటు ఇటు ఉత్తర భారతదేశమంతటా మంగళవారం రాత్రి ఒక్కసారిగా భూమి కంపించడంతో జనం భయాందోళనకు గురయ్యారు. ఢిల్లీతో పాటే ఉత్తరాఖండ్‌లోని అన్ని జిల్లాల్లోనూ భూకంప ప్రకంపనలు స్పష్టంగా కనిపించాయి. రిక్టర్ స్కేలుపై దీని తీవ్రత 4.9గా నమోదైంది. ఉత్తరాఖండ్‌లోని చమోలి ఈ భూకంపానికి ప్రధాన కేంద్రంగా మారగా, పొరుగు రాష్ట్రాలైన హిమాచల్ ప్రదేశ్, పంజాబ్, హర్యానా సహా ఉత్తర భారత్‌లోని చాలా ప్రాంతాల్లో భూమి తీవ్రంగా ఊగింది. నేషనల్ సెంటర్ ఫర్ సీస్మోలజీ వివరాల ప్రకారం.. రాత్రి 10:23 గంటల సమయంలో ఉత్తరాఖండ్‌లోని ఉత్తరకాశీ ప్రాంతంలో భూమి కంపించింది. భూగర్భంలో ఉత్తరాఖండ్ ఖాదూన్ లగా గవాలీకి 22 కిలోమీటర్ల దూరంలో ఈ భూకంప కేంద్రం ఉన్నట్లు అధికారులు గుర్తించారు.
భూకంపం వచ్చిన సమయంలో కంగారుపడకుండా కొన్ని జాగ్రత్తలు తీసుకోవడం చాలా ముఖ్యం. ప్రకంపనలు వస్తున్నప్పుడు అటూ ఇటూ ఎక్కువగా తిరగకుండా, త్వరగా ఏదైనా సురక్షితమైన చోటికి చేరుకోవాలి. భూకంపం పూర్తిగా తగ్గేంత వరకు ఇంట్లోనే ఉండటం మంచిది. వెంటనే కింద కూర్చుని, ఏదైనా బలంగా ఉన్న టేబుల్ లేదా ఫర్నిచర్ కింద దాక్కుని మిమ్మల్ని మీరు కాపాడుకోవాలి. ఒకవేళ టేబుల్ లాంటిది ఏదీ లేకపోతే, గదిలోని ఏదైనా మూలకు వెళ్లి మీ చేతులతో ముఖాన్ని, తలను కప్పుకుని వంగి కూర్చోవాలి. గది మూలలు, టేబుళ్లు లేదా మంచం కింద తలకు రక్షణగా ఉంచుకోవడం శ్రేయస్కరం. అద్దాలు, కిటికీలు, తలుపులు, గోడలు, పడిపోయే ప్రమాదమున్న గోడలకు దూరంగా ఉండాలి. భూకంపం వచ్చినప్పుడు మీరు మంచంపైనే ఉంటే, అటుఇటు పరుగెత్తకుండా తల కింద దిండు పెట్టుకుని జాగ్రత్తపడండి, పైన పడే ప్రమాదమున్న వస్తువులకు దూరంగా జరగండి. మీ పక్కనే బలమైన తలుపు ఉండి, అది సురక్షితమని తెలిస్తే తప్ప బయటకు పరుగెత్తే ప్రయత్నం చేయకండి. భూ ప్రకంపనలు పూర్తిగా ఆగిపోయే వరకు ఇంట్లోనే ఉండాలి, ఎందుకంటే భవనాల నుంచి హడావుడిగా బయటకు పరుగెత్తే క్రమంలోనే ఎక్కువ మందికి దెబ్బలు తగులుతాయని పరిశోధనలు చెబుతున్నాయి. ఈ సమయంలో విద్యుత్ సరఫరా నిలిచిపోవచ్చని, లేదా ఫైర్ అలారమ్‌లు, స్ప్రింక్లర్లు హఠాత్తుగా పనిచేయడం ప్రారంభించవచ్చని గుర్తుంచుకోవాలి. ఇక మీరు భూకంపం సమయంలో ఆరుబయట ఉంటే, ఎటు పరుగెత్తకుండా ఉన్నచోటే ఉండండి. పెద్ద పెద్ద భవనాలు, చెట్లు, వీధి దీపాలు, కరెంట్ వైర్లకు దూరంగా ఉంటే మంచిది.