ఆంధ్రప్రదేశ్‌ను పెట్టుబడులు, పారిశ్రామికాభివృద్ధికి కేంద్రంగా మార్చే లక్ష్యంతో విశాఖపట్నం ఆంధ్ర యూనివర్సిటీ ప్రాంగణంలో ఈ నెల 12, 13వ తేదీల్లో 31వ సీఐఐ పార్టనర్షిప్ సమ్మిట్-2026ను ప్రభుత్వం వైభవంగా నిర్వహించనుంది. ప్రభుత్వం, భారత పరిశ్రమల సమాఖ్య (CII) సంయుక్తంగా చేపడుతున్న ఈ ప్రతిష్ఠాత్మక సదస్సు ప్రారంభ కార్యక్రమాన్ని కేంద్ర హోంమంత్రి అమిత్ షా నవంబర్ 12న ఉదయం 10.30 గంటలకు ప్రారంభించనున్నారు.
ఈ అంతర్జాతీయ సదస్సుకు సింగపూర్, యూఏఈ, జపాన్, రష్యా, స్లోవేకియా, గ్వాటెమాలా దేశాలకు చెందిన ప్రభుత్వ ప్రతినిధులు, రాయబారులు, ప్రపంచ మేధోసంపత్తి సంస్థ (WIPO) డైరెక్టర్ జనరల్ డాక్టర్ డారెన్ టాంగ్‌తో పాటు గ్లోబల్ పారిశ్రామిక దిగ్గజాలు హాజరుకానున్నారు. కియా మోటార్స్, రెన్యూ, మాండెలెజ్, సెయింట్ గోబెయిన్ వంటి దిగ్గజ సంస్థలతో పాటు స్కైరూట్, అగ్నికుల్ వంటి అంతరిక్ష స్టార్టప్ కంపెనీల ప్రతినిధులతో సీఎం చంద్రబాబు ప్రత్యేకంగా భేటీ కానున్నారు. అలాగే విశాఖ నోవోటెల్‌లో జరగనున్న ‘విమెన్ అండ్ గ్రోత్ సమ్మిట్–2026’లో పాల్గొని మహిళా పారిశ్రామికవేత్తల ప్రోత్సాహంపై చర్చించనున్నారు.
సదస్సు ప్రారంభానికి ఒకరోజు ముందుగానే సీఎం చంద్రబాబు అమరావతి, విశాఖల్లో కీలక సమావేశాలు నిర్వహించనున్నారు. బుధవారం అమరావతిలో సింగపూర్ మంత్రి గాన్ సియో హువాంగ్‌తో సమావేశమైన అనంతరం విశాఖ చేరుకుని వివిధ దౌత్యవేత్తలు, సీఈవోలతో భేటీ అవుతారు. సదస్సు సమయంలో కేంద్రమంత్రులు నితిన్ గడ్కరీ, పీయూష్ గోయల్, చిరాగ్ పాశ్వాన్‌లతో కలిసి రాష్ట్రంలో మౌలిక సదుపాయాలు, తయారీ రంగం మరియు పెట్టుబడుల అవకాశాలపై చర్చించనున్నారు. గతేడాది సదస్సుల ద్వారా ఇప్పటికే రూ.86 వేల కోట్ల పెట్టుబడులు రాగా, ఈ 2026 పార్టనర్షిప్ సమ్మిట్ రాష్ట్ర పారిశ్రామిక ప్రగతిలో కీలక మైలురాయిగా నిలవనుంది.