Chintur Rains: చింతూరు ఏజెన్సీలో తగ్గుముఖం పట్టిన వర్షాలు.. కూనవరం వద్ద 30 అడుగులకు చేరిన గోదావరి!

Chintur Agency Rains Update: పోలవరం జిల్లాలోని చింతూరు ఏజెన్సీలో వర్షాలు తగ్గుముఖం పట్టినా వరద ప్రభావం మాత్రం ఇంకా కొనసాగుతోంది. శబరి, గోదావరి నదుల్లో నీటిమట్టాలు ప్రమాదకర స్థాయిలో ఉండటంతో అధికారులు అప్రమత్తంగా వ్యవహరిస్తున్నారు. వరద ప్రభావిత ప్రాంతాల్లో జిల్లా కలెక్టర్ దినేష్ కుమార్ పర్యటించి పరిస్థితిని సమీక్షించారు. ఇళ్లు, పశువులు, పంటలకు జరిగిన నష్టాలపై 24 గంటల్లో సమగ్ర నివేదిక అందజేయాలని సంబంధిత శాఖల అధికారులను కలెక్టర్ ఆదేశించారు.

చింతూరు ఏజెన్సీలో గత కొన్ని రోజులుగా కురిసిన భారీ వర్షాలు తగ్గుముఖం పట్టాయి. ప్రస్తుతం చింతూరు వద్ద శబరి నది నీటిమట్టం 28.5 అడుగులుగా నమోదవగా.. కూనవరం వద్ద గోదావరి నీటిమట్టం 30 అడుగులకు చేరింది. వరద ప్రభావిత ప్రాంతాల్లో జిల్లా కలెక్టర్ దినేష్ కుమార్ పడవలో పర్యటించి బాధితులను పరామర్శించారు. ప్రజలు ఎదుర్కొంటున్న ఇబ్బందులను స్వయంగా తెలుసుకుని అధికారులకు పలు సూచనలు చేశారు.

వరద బాధితులకు వెంటనే నిత్యావసర వస్తువులు అందజేసి అవసరమైన సహాయ చర్యలు చేపట్టాలని అధికారులకు కలెక్టర్ దినేష్ కుమార్ సూచించారు. నది పరివాహక ప్రాంత ప్రజలు మరో 48 గంటల పాటు అప్రమత్తంగా ఉండాలని హెచ్చరిస్తూ, పరిస్థితిని నిరంతరం పర్యవేక్షిస్తున్నామని తెలిపారు. వరద ప్రభావిత గ్రామాల్లో సహాయక చర్యలను వేగవంతం చేసి బాధితులకు ఎలాంటి ఇబ్బందులు తలెత్తకుండా చర్యలు తీసుకుంటున్నట్లు అధికారులు వెల్లడించారు.