CGST Superintendent: రూ.50 వేలు లంచం.. రెడ్ హ్యాండెడ్‌గా పట్టుబడ్డ సీజీఎస్టీ (CGST) సూపరింటెండెంట్..

ఆంధ్రప్రదేశ్‌లోని విజయవాడ ఇబ్రహీంపట్నం సెంట్రల్ జీఎస్టీ రేంజ్ కార్యాలయంలో రూ. 50 వేల లంచం తీసుకుంటూ సీజీఎస్టీ సూపరింటెండెంట్ బానోతు మంగమ్మ సీబీఐకి చిక్కారు. ఓ ప్రైవేట్ సంస్థకు చెందిన పన్ను బకాయిల వ్యవహారంలో డిమాండ్ నోటీసు జారీ చేయకుండా, ఆ అంశాన్ని పూర్తిగా ముగించేందుకు ఆమె రూ. 1.50 లక్షల లంచం డిమాండ్ చేశారు. బాధితుడి ఫిర్యాదు మేరకు కేంద్ర దర్యాప్తు సంస్థ (CBI) అధికారులు ఆగస్టు 10న కేసు నమోదు చేసి, వెంటనే పక్కా వ్యూహంతో ట్రాప్ నిర్వహించారు.

అధికారులు వేసిన వ్యూహం ప్రకారం.. డిమాండ్ చేసిన మొత్తంలో తొలి విడతగా రూ. 50,000 నగదును ఫిర్యాదుదారుడి నుంచి స్వీకరిస్తుండగా సీబీఐ బృందం ఆమెను రెడ్‌హ్యాండెడ్‌గా పట్టుకుంది. లంచం సొమ్మును స్వాధీనం చేసుకున్న అనంతరం, ఆమెను వెంటనే అదుపులోకి తీసుకున్నారు. ఈ కేసు దర్యాప్తులో భాగంగా విజయవాడలోని మంగమ్మ నివాసంతో పాటు ఇతర ప్రాంగణాల్లో సీబీఐ అధికారులు విస్తృతంగా సోదాలు చేపట్టారు. ఈ సోదాల్లో కేసుకు సంబంధించిన పలు కీలక పత్రాలు, ఇతర ఆధారాలను సేకరించే పనిలో అధికారులు నిమగ్నమయ్యారు.

అరెస్టయిన అధికారిణి బానోతు మంగమ్మను ఆగస్టు 11న విజయవాడలోని సంబంధిత సీబీఐ ప్రత్యేక న్యాయస్థానంలో హాజరుపరచనున్నట్లు అధికారులు వెల్లడించారు. సీజీఎస్టీ కార్యాలయంలో సూపరింటెండెంట్ స్థాయి అధికారి లంచం కేసులో దొరికిపోవడం స్థానికంగా తీవ్ర కలకలం రేపింది. ఈ కేసు దర్యాప్తు ఇంకా కొనసాగుతోందని, శాఖాపరమైన మరియు చట్టపరమైన తదుపరి చర్యలను వేగవంతం చేశామని సీబీఐ వర్గాలు తెలిపాయి.