Baloch Liberation Front: 80 మంది పాకిస్థాన్ సైన్యాన్ని హతమార్చాం.. బలోచ్ లిబరేషన్ ఫ్రంట్ సంచలన ప్రకటన..

Baloch Liberation Front: బలోచ్ లిబరేషన్ ఫ్రంట్ (BLF) చేపట్టిన ‘ఆపరేషన్ అల్మాస్’ దాడిలో దాదాపు 80 మందికి పైగా పాకిస్థాన్ సైనిక, నిఘా వర్గాల సిబ్బంది హతమైనట్లు ఆ సంస్థ సంచలన ప్రకటన చేసింది. ఈ వివరాలను BLF ప్రతినిధి మేజర్ గ్వారామ్ బలోచ్ అక్టోబర్ 27న విడుదల చేసిన ఓ ప్రకటనలో వెల్లడించారు. అక్టోబర్ 22న ప్రారంభమైన ఈ ప్రత్యేక ప్రచారంలో భాగంగా గ్వాదర్ పరిసర ప్రాంతాల్లోని పాకిస్థాన్ సైనిక స్థావరాలు, నిఘా సంస్థల కార్యాలయాలు, భద్రతా దళాల చెక్‌పోస్టులను లక్ష్యంగా చేసుకుని దాడులు చేసినట్లు తెలిపారు.

ఈ ఆపరేషన్ సమయంలో తమ పోరాట యోధులు గ్వాదర్‌లోని ‘ఫ్రాంటియర్ వర్క్స్ ఆర్గనైజేషన్’ (FWO) ప్రధాన క్యాంప్‌పై మెరుపు దాడి చేశారని బీఎల్‌ఎఫ్ పేర్కొంది. దీంతో పాటు గబ్ద్, రిమందాన్ ప్రాంతాల్లోని మిలటరీ స్థావరాలపై కూడా విరుచుకుపడ్డారు. ఈ దాడుల్లో 12 సాయుధ రవాణా వాహనాలు, సైనిక సరఫరా ట్రక్కులను ధ్వంసం చేయడమే కాకుండా, శత్రువులకు చెందిన నాలుగు క్వాడ్‌కాప్టర్లు, రెండు నిఘా డ్రోన్లను కూల్చివేసినట్లు బీఎల్‌ఎఫ్ తెలిపింది. అంతేకాకుండా, రెండు పోలీస్ స్టేషన్లను తమ ఆధీనంలోకి తీసుకుని, ప్రధాన సైనిక క్యాంప్‌ను 20 గంటలకు పైగా తమ నియంత్రణలోనే ఉంచుకున్నామని స్పష్టం చేసింది. ఈ మొత్తం దాడికి ఓ మహిళా కమాండర్, కీలక వ్యూహకర్త అయిన ‘అల్మాస్ బలోచ్’ జ్ఞాపకార్థం ‘ఆపరేషన్ అల్మాస్’ అని పేరు పెట్టారు. చైనా-పాకిస్థాన్ ఆర్థిక కారిడార్ (CPEC) ప్రాజెక్టులపై మున్ముందు మరిన్ని దాడులు చేస్తామని కూడా బీఎల్‌ఎఫ్ హెచ్చరించింది.

మరోవైపు పాకిస్థాన్ సైనిక విభాగం ISPR ఈ వ్యవహారంపై భిన్నమైన ప్రకటన విడుదల చేసింది. గ్వాదర్‌లో తీవ్రవాదులకు వ్యతిరేకంగా తాము చేపట్టిన ఆపరేషన్ పూర్తయిందని, ఇందులో 10 మంది తీవ్రవాదులు మరణించారని తెలిపింది. ఈ ఘటనలో ఒక పౌరుడు ప్రాణాలు కోల్పోగా, కొన్ని వాహనాలు దెబ్బతిన్నాయని, అయితే తమ భద్రతా దళాలకు ఎలాంటి నష్టం వాటిల్లలేదని పేర్కొంది. రాజ్య అధికారాన్ని సవాలు చేసేందుకు భారత్ మద్దతుతోనే ఈ దాడి జరిగిందని ISPR ఆరోపించింది. ఒక, ఇరుపక్షాలు చేసిన ఈ విరుద్ధ ప్రకటనల వల్ల అసలు నిజమేమిటనేది స్వతంత్రంగా ధృవీకరణ కాలేదు. బలూచిస్తాన్ ప్రాంతంలో తమ సహజ వనరుల దోపిడీకి నిరసనగా, సైనిక చర్యలకు వ్యతిరేకంగా వేర్పాటువాద బృందాలు చాలా కాలంగా పోరాడుతున్నాయి. వ్యూహాత్మకంగా ఎంతో కీలకమైన గ్వాదర్ ప్రాంతం CPEC ప్రాజెక్టులో ముఖ్య భాగం కావడంతో, ఇక్కడ జరుగుతున్న వరుస దాడులు ఆర్థిక పురోగతిని, వ్యాపార ప్రాజెక్టులను తీవ్రంగా దెబ్బతీస్తున్నాయి. సాధారణంగా ఇలాంటి దాడులు జరిగినప్పుడు వేర్పాటువాద సంస్థలు పెద్ద సంఖ్యలో ప్రాణనష్టం జరిగిందని ప్రకటించడం, ప్రభుత్వం మాత్రం దాన్ని కేవలం ప్రచారం అని కొట్టిపారేయడం నిత్యకృత్యంగా మారింది. ఈ తరహా సాయుధ ఘర్షణల వల్ల ఆ ప్రాంతంలో అస్థిరత పెరిగి, సాధారణ ప్రజల భద్రత, ప్రాంతీయ అభివృద్ధి తీవ్రంగా దెబ్బతింటున్నాయి.