Jammu Kashmir: నేషనల్ కాన్ఫరెన్స్ అధ్యక్షుడు, జమ్మూ కాశ్మీర్ మాజీ ముఖ్యమంత్రి ఫరూక్ అబ్దుల్లా శనివారం చేసిన వ్యాఖ్యలు తీవ్ర వివాదాస్పదంగా మారాయి. బారాముల్లాలో పార్టీ కార్యక్రమంలో పాల్గొన్న ఆయన ఢిల్లీ ఉద్దేశాలు మంచివి కావని, పాకిస్తాన్ ప్రపంచ వేదికలపై కాశ్మీర్ అంశాన్ని లేవనెత్తుతోందని, పాకిస్తాన్ మనల్ని రక్షిస్తోందని అన్నారు. ” మీరు ఢిల్లీ నుండి ఏమి ఆశించగలరు? వారు మీకు న్యాయం చేస్తారని అనుకుంటున్నారా? పోరాడే ధైర్యం చేయండి, లేకపోతే మీరు పూర్తిగా నాశనమవుతారు,మీ గుర్తింపు తుడిచివేయబడుతుంది.” అని అన్నారు.
ఫరూఖ్ అబ్దుల్లా వ్యాఖ్యలపై బీజేపీ తీవ్ర ఆగ్రహం వ్యక్తం చేస్తోంది. బీజేపీ ఎమ్మెల్యే యుధ్‌వీర్ సేథీ దేశద్రోహం కేసు నమోదు చేయాలని డిమాండ్ చేశారు. బీజేపీ జాతీయ అధికార ప్రతినిధి ఆర్‌పీ సింగ్ మాట్లాడుతూ.. సరిహద్దు అవతలి వైపు ఉన్న కాశ్మీరీల పరిస్థితని పరిశీలించాలని సూచించారు. ఆర్టికల్ 370ని రద్దు చేయడంతోనే జమ్మూ కాశ్మీర్ భారత్‌లో పూర్తిగా విలీనం చేయడం వల్లే ఇక్కడి పరిస్థితులు మెరుపడ్డాయని అన్నారు. ఆయన వ్యాఖ్యలు పాకిస్తాన్ వాదనకు మద్దతు ఇచ్చేలా ఉన్నాయని బీజేపీ విమర్శించింది.